បវរកញ្ញាកែវ សេងលីហួរ ត្រៀមបង្ហាញអត្តសញ្ញាណជាតិខ្មែរលើទឹកដីហ្វីលីពីន ក្នុងកម្មវិធីប្រកួតបវរកញ្ញាផែនដី លើកទី ១៨
NEWS 6 years agoជិតដល់ដំណាច់ឆ្នាំ ២០១៨នេះ ការប្រកួតប្រជែងជម្រើសបវរកញ្ញាប្រចាំប្រទេសកម្ពុជាបាននឹងកំពុងទទួលបានការគាំទ្រយ៉ាងខ្លាំងពីសំណាក់មហាជន។ កញ្ញា កែវ សេងលីហួរ ដែលត្រូវបានគ្រងម្កុដជាបវរកញ្ញាផែនដីប្រចាំប្រទេសកម្ពុជានោះ បានផ្តល់បទសម្ភាសន៍ដល់សូវរីន ទាំងក្តីសោមនស្សរីករាយយ៉ាងក្រៃលែង។ ជាមួយនឹងជ័យលាភី បវរកញ្ញាផែនដីនេះដែរ នាដើមខែតុលា កញ្ញា ត្រូវបានជ្រើសរើសឲ្យចូលរួមប្រកួតក្នុងកម្មវិធីថ្នាក់អន្តរជាតិដែលមានបវរកញ្ញាមកពី ប្រទេសជាច្រើននៅលើពិភពលោក មកបង្អួតសម្រស់គ្នាក៏ដូចជាបង្ហាញពីសមត្ថភាពរៀងៗខ្លួន។ ថ្ងៃទី ០៦ ខែតុលា ជាថ្ងៃដែល លីហួរ ធ្វើដំណើរចាកចេញពីមាតុប្រទេស ទៅចូលរួមប្រកួតកម្មវិធីបវរកញ្ញាផែនដីពិភពលោក នៅទីក្រុងម៉ានីល ប្រទេសហ្វីលីពីន ដោយបានពាំនាំយកនូវ ក្តីសង្ឃឹម និងភាពជឿជាក់យ៉ាងមោះមុតបំផុត។ «ខ្ញុំពិតជាមានអារម្មណ៍ថា សប្បាយចិត្តខ្លាំងមែនទែន ភ័យផង អរផង តែយ៉ាងណា ខ្ញុំប្តេជ្ញាចិត្តប្រឹងប្រែងឲ្យអស់ពីសមត្ថភាពដើម្បីពាំនាំមុខមាត់កម្ពុជាបង្ហាញលើឆាកអន្តរជាតិឲ្យបាន» នេះជាសម្តីប៉ុន្មានឃ្លាដែលចេញពីបបូរមាត់ដ៏មានមន្តស្នេហ៍របស់យុវតីបវរកញ្ញាផែនដី ក្នុងទឹកមុខ ស្រស់ស្រាយ និងកាយវិការទន់ភ្លន់ជានារីខ្មែរ។ ក្នុងជម្រើសយ៉ាងតឹងរឹង ទៅលើបវរកញ្ញាផែនដីនេះ មិនមែនគ្រាន់តែគិតទៅលើរូបសម្រស់តែមួយមុខនោះទេ ក្នុងនោះកញ្ញា បានរៀនសូត្រខ្លះៗពីចំណេះដឹងទូទៅទាក់ទងនឹងកម្មវិធី និងការសិក្សាពីវប្បធម៌ អរិយធម៌ ប្រពៃណី ក៏ដូចជា តថភាពនៃសង្គមខ្មែរ ដើម្បីដើរឲ្យទាន់សម័យកាលនាពេលបច្ចុប្បន្ន។ មួយវិញទៀត ការរៀនដើរម៉ូដ គឺជាចំណុចមួយសំខាន់ខ្លាំង ដែលនេះត្រូវបានការណែនាំពីសំណាក់រៀមច្បងពីមុនៗ និងភ្នាក់ងារក្រុមហ៊ុនរបស់កញ្ញាទៀតផង។ មិនត្រឹមតែប៉ុណ្ណោះ កញ្ញាត្រូវហ្វឹកហាត់ខ្លួនឲ្យស្របទៅនឹងបរិយាកាសនៃជាតិសាសន៍ខាងក្រៅ ធ្វើយ៉ាងណាឲ្យខ្លួនមានទំនាក់ទំនងល្អផងដែរ។ ភ្ជាប់ជាមួយនឹងសំនួរថា តើកញ្ញាមានអ្វីពិសេសសម្រាប់កម្ពុជាជុំវិញការឈានជើងចូលទៅលើឆាកអន្តរជាតិនៃការប្រឡងបវរកញ្ញាផែនដីមួយនេះទេ? ដោយត្រៀមខ្លួនជាស្រេចជាមួយនឹងសំនួរចាក់ដោតរបស់សូវីរន លីហួរ បានឆ្លើយទាំងក្តីស្រឡាញ់ដែរថា ជាឱកាសដ៏ល្អដែលយើងអាចនាំយកអ្វីដែលបញ្ជាក់ពីភាពខ្ពង់ខ្ពស់នៃជាតិខ្លួន គឺតាមរយៈការស្លៀកសម្លៀកបំពាក់នៃ ឈុតតំណាងជាតិ ក្រោមប្រធានបទ «មាតាធម្មជាតិ» ដែលមើលទៅហាក់ដូចជាឃើញស្រី្តម្នាក់នៅឈរសំកាំងការពារព្រៃឈើ សត្វព្រៃ និងសម្បត្តិធម្មជាតិយ៉ាងដូច្នោះដែរ។ លើសពីនេះទៀត ដើម្បីជាភាពទាក់ទាញនៅក្នុងកម្មវិធីនោះទៀតសោត លីហួរ បានទិញផលិតផលដែលធ្វើពីស្នាដៃខ្មែរទៅជាមួយផង ដូចជាកាបូប និងក្រមា ដែលវត្ថុទាំងពីរនេះ អាចឲ្យគេស្គាល់ពីជាតិសាសន៍ខ្មែរបានយ៉ាងច្បាស់។ មួយវិញទៀត អ្វីដែលកាន់តែអស្ចារ្យទៀតនោះ កញ្ញា បានប្រឹងប្រែងហាត់របាំប្រពៃណីខ្មែរមួយប្រភេទឈ្មោះ« របាំតូណៃទីន» ជារបាំតំណាងឲ្យជនជាតិខ្មែរ ជាពិសេសតំណាងឲ្យខេត្តមួយចំនួន ដូចជាខេត្តរតគិរី និងខេត្តមណ្ឌលគិរីជាដើម។ ជាចុងក្រោយ កញ្ញា ក៏សូមថ្លែងអំណរគុណដល់អ្នកគាំទ្រខ្មែរទាំងអស់ ដែលបានលើកទឹកចិត្តឲ្យកញ្ញា មានកម្លាំងក្នុងការចូលរួមប្រកួតក្នុងកម្មវិធីនេះ និងវិលត្រឡប់មកវិញជាមួយនឹងពាន ឬម្កុដបវរកញ្ញាផែនដីពិភពលោកមកឲ្យកម្ពុជា នាថ្ងៃទី០៣ នៃដើមខែវិច្ឆិកា ដោយមោទនភាពដ៏វិសេសវិសាល និងក្រៃលែងបំផុត៕
Article by HEM SOKKHIM
Image Courtesy: Arise Agency