«៤០គីឡូម៉ែត្រទៅកាន់ប្រវត្តិសាស្ត្រ» ព្រឹត្តិការណ៍ថ្មីមួយដែលយុវជនគ្រប់រូបគួរគប្បីចូលរួមពុំខាន
NEWS 6 years agoនៅរសៀលថ្ងៃទី ១៦ ខែ តុលា នេះ សហភាពសហព័ន្ធយុវជនកម្ពុជា (ស.ស.យ.ក) បានរៀបចំធ្វើសន្និសីទសារព័ត៌មានស្តីអំពីគម្រោងរៀបចំព្រឹត្តិការណ៍ដ៏គួរឲ្យចាប់អារម្មណ៍មួយ ក្រោមប្រធានបទ «៤០ គីឡូម៉ែត្រទៅកាន់ប្រវត្តិសាស្ត្រ» ដោយមានការចូលរួមក្រោមអធិបតីយភាពដ៏ខ្ពង់ខ្ពស់ពី ឯកឧត្តម ហ៊ុន ម៉ានី ប្រធាន ស.ស.យ.ក ឯកឧត្តម សុខ សប្បាយណា ប្រធានក្រុមការងារប្រតិបត្តិ កីឡាការិនី ពៅ សុខា ម្ចាស់មេដាយមាសពិភពលោកកីឡា វ៉ូវីណាម លោក សាយ សិល្បករ លោកស្រី កុសល សុវណ្ណមរកត ក្រុមការងាររៀបចំព្រឹត្តិការណ៍ និងបណ្តាអ្នកសារព័ត៌មានកម្ពុជានានាមកពីគ្រប់ស្ថាប័ន។
ព្រឹត្តិការណ៍ថ្មីនេះបង្កើតឡើងក្នុងគោលបំណង ផ្តល់ជាវេទិកាដល់យុវជនឲ្យចេះរួបរួមគ្នាក្នុងគ្រាលំបាក និងគ្រាសុខសាន្ត ស្វែងយល់កម្រិតសមត្ថភាពរបស់ខ្លួន ក៏ដូចជាកម្រិតនៃការតស៊ូ ភាពអត់ធ្មត់ និងសមត្ថភាពដោះស្រាយបញ្ហាជាក់ស្តែង រួមជាមួយការស្វែងយល់បន្ថែមពីប្រវត្តិសាស្ត្រតាមរយៈការធ្វើដំណើរថ្មើរជើងរួមគ្នានៅលើគន្លងផ្លូវដែលមានចម្ងាយ ៤០ គីឡូម៉ែត្រ។ មិនត្រឹមតែប៉ុណ្ណោះ ព្រឹត្តិការណ៍នេះ គឺធ្វើឡើងដើម្បីបង្កើតបរិយាកាសស្និទ្ធស្នាល និងប្រកបដោយភាតរភាព ដែលក្នុងនោះយុវជនទាំងអស់ត្រូវបានលើកទឹកចិត្តឲ្យមានសកម្មភាពកសាងក្រុម ( Team Building) ការដើររួមគ្នា ច្រៀងចម្រៀងរួមគ្នា ការចម្អិនអាហាររួមគ្នា ការបោះជំរុំ ការដុតភ្លើងគប់ ការនិទានរឿង និងការបញ្ចេញសមត្ថភាព ទេពកោសល្យផ្ទាល់ខ្លួន ក៏ដូចជាការច្រៀងរាំកម្សាន្តផ្សេងៗ។
ជាមួយគ្នានេះដែរ ឯកឧត្តម ហ៊ុន ម៉ានី បានមានប្រសាសន៍ដែរថា៖ «ការបង្កើតព្រឹត្តិការណ៍នេះឡើងក៏ជាថ្នូរមួយក្នុងការរំឭកខួប ៤០ ឆ្នាំនៃការបង្កើតឡើងសហភាពសហព័ន្ធយុវជនកម្ពុជា និងចង់រំឭកទៅដល់វីរភាព ក៏ដូចជាភាពអង់អាចក្លាហានរបស់យុវជនជំនាន់មុន ដែលតស៊ូរើបម្រះក្រោមការគ្រប់គ្រងរបស់ខ្មែរក្រហម។ ចំពោះការធ្វើដំណើរក្នុងចម្ងាយ ៤០គីឡូម៉ែត្រនេះដែរ គឺមិនត្រឹមតែចង់ឲ្យយុវជនចេះរួមសាមគ្គីគ្នា មានភាពអត់ធ្មត់ និងមានទំនួលខុសត្រូវដើម្បីសម្រេចនូវអ្វីមួយប៉ុណ្ណោះទេ តែថែមទាំងចង់ឲ្យមានភាពក្លាហានក្នុងការជម្នះគ្រប់ឧបសគ្គដើម្បីប្រទេសជាតិផងដែរ»។
គួរបញ្ជាក់ដែរថា ព្រឹត្តិការណ៍នេះនឹងបើកឲ្យមានការចូលរួមពីគ្រប់មជ្ឈដ្ឋាន ដែលប្រព្រឹត្តិទៅរយៈពេល ២យប់ ៣ថ្ងៃ គឺចាប់ពីថ្ងៃទី ២៩ ខែ វិច្ឆិកា ដល់ថ្ងៃទី ០១ ខែធ្នូ ឆ្នាំ ២០១៨ នៅក្នុងបរិវេណស្រុកស្នួលនៃខេត្តក្រចេះ។ សម្រាប់យុវជនមានបំណងចូលរួមត្រូវមានអាយុចន្លោះពី ១៨ ទៅ៤៥ឆ្នាំ មានកាយសម្បទារឹងមាំ មានសុខភាពផ្លូវចិត្តប្រក្រតី គោរពតាមបទបញ្ជាផ្ទៃក្នុងនៃព្រឹត្តិការណ៍ ដោយឆ្លងកាត់ការវិនិច្ឆ័យ និងការសម្ភាសន៍ផ្ទាល់មាត់ពីក្រុមការងាររៀបចំ។ បន្ទាប់ពីទទួលបានភាពជោគជ័យនៃការវិនិច្ឆ័យ និងការសម្ភាសន៍រួចរាល់ អ្នកចូលរួមត្រូវមានឆន្ទៈក្នុងការបង់វិភាគទានចូលរួមចំនួន ៤០០០០ រៀល ដោយមានប្រាក់តម្កល់ចំនួន ៣៦០០០០ រៀលបន្ថែម។ ប្រាក់តម្កល់ ៣៦០០០០ រៀលនេះ នឹងប្រគល់ជូនអ្នកចូលរួមវិញ ក្រោយចប់កម្មវិធី ដរាបណាអ្នកចូលរួមទាំងអស់បានអនុវត្តពេញលេញនូវបទបញ្ជាផ្ទៃក្នុង និងលក្ខន្តិកៈរបស់ព្រឹត្តិការណ៍តាមការព្រមព្រៀងជាមុន។
អ្នកដែលមានបំណងក្នុងការចូលរួមអាចទាញយក ពាក្យសុំចូលរួម និងលក្ខន្តិកៈផ្សេងៗតាមរយៈតំណនេះ www.bit.ly/20sgjHW ឬទាក់ទងទៅកាន់សហភាពសហព័ន្ធយុវជនកម្ពុជាស្នាក់ការកណ្តាល ដែលមានអាសយដ្ឋាន៖ ផ្ទះលេខ ២៤ ផ្លូវ ២២៨ កែង ៥៥ សង្កាត់ចតុមុខ ខណ្ឌដូនពេញ រាជធានីភ្នំពេញ ឬទាក់ទងតាមលេខទូរសព្ទ ០១០ ៥៥៥ ៩៨៧ ឬ ០១៥ ២៩ ៣៣ ៩៩ (សម្រាប់ការចូលរួម និងពាក្យសុំចូលរួម) ឬទៅកាន់លេខទូរសព្ទ ០៩៦ ៩៩៩ ៣៩៣៣ (សម្រាប់ផ្នែកទំនាក់ទំនងសាធារណៈ និងផ្សព្វផ្សាយ)៕
Article by HEM SOKKHIM