«សួរមួយ»គេហទំព័រដែលចាំជួយផ្តល់ជាទីប្រឹក្សាសម្រាប់យុវជនជំនាន់ក្រោយដោយឥតគិតថ្លៃ
NEWS 5 years ago «សួរមួយ» គឺជាគេហទំព័រមួយដែលបង្កើតឡើងដើម្បី ជួយបង្ហាញផ្លូវ និងផ្តល់ជាយោបល់ឲ្យយុវជនកម្ពុជាក្នុងការបានជួបជាមួយនឹងអ្នកមានបទពិសោធន៍ក្នុងផ្នែកណាមួយដូចជា៖ ការស្វែងរកអាហារូបករណ៍, ការជ្រើសរើសមុខវិជ្ជាសិក្សា និងចាប់ផ្តើមអាជីវកម្មជាដើម។ យ៉ាងហោចណាស់ក៏មានវាគ្មិនដែលមានបទពិសោធន៍ជោគជ័យប្រមាណជា៨៣ រូបបាននឹងកំពុងរង់ចាំជួយបើកផ្លូវជូនយុវជនកម្ពុជា ដោយផ្តល់ជាការប្រឹក្សាយោបល់ ផ្តល់ជាគំនិត ជាដំបូន្មាននិងចែករំលែកនូវបទពិសោធន៍របស់ខ្លួនទៅដល់យុវជនជំនាន់ក្រោយដែលកំពុងតែជួបនូវបញ្ហានានាដោយ ឥតគិតថ្លៃ។
លោកអ៊ូ រិទ្ធី ដែលជាអ្នកផ្តួចផ្តើមគំនិតបង្កើតគេហទំព័រនេះ និងជាអ្នកធ្លាប់បម្រើការឲ្យអង្គការក្រៅរដ្ឋាភិបាលដែលបានធ្វើការជាមួយនឹងយុវជនជាច្រើនកន្លងមកនោះបានលើកឡើងថា ដោយសារតែលោកត្រូវបាន សិស្សវិទ្យាល័យជាច្រើនតែងតែចោទសួរអំពីការជ្រើសរើសមុខវិជ្ជាសិក្សានៅឯសាកលវិទ្យាល័យ ការស្វែងរកអាហារូបករណ៍ និងការជ្រើសរើសមុខជំនាញវិជ្ជាជីវៈផ្សេងៗទៀតជាដើមនោះ ទើបធ្វើឲ្យលោកសម្រេចចិត្តបង្កើតនូវគេហទំព័រ «សួរមួយ» ជាមួយនឹងក្រុមនិស្សិតផ្នែកព័ត៌មានវិទ្យាមួយក្រុមនេះឡើង។ លោកបានបន្តថាមិនត្រឹមតែសិស្សវិទ្យាល័យនោះទេ ក៏មានផងដែរនូវបុគ្គលិកអង្គការនានាតែងតែចោទសួរអំពីការផ្តាស់ប្តូរការងារ ការអភិវឌ្ឍន៍ខ្លួននិងការបន្តការសិក្សាបន្ថែមជាច្រើនផងដែរ។ គេហទំព័រ ដែលចាប់បើកដំណើរការតាំងពីខែមីនា ឆ្នាំ២០១៨នេះ យ៉ាងហោចណាស់មានអ្នកប្រឹក្សាដែលមានជំនាញផ្សេងៗនិងមានបទពិសោធន៍ជោគជ័យ ជាមួយនឹងផ្នែកចំនួន ប្រាំដូចជា៖ ជ្រើសរើសមុខវិជ្ជា អាហារូបករណ៍ សហគ្រិន អាជីព និងវិជ្ជាជីវៈ។ «សួរមួយ» ជាវេទិកាដែលអាចឲ្យអ្នកដែលត្រូវការជំនួយនិងអ្នកដែលចង់ជួយពិតប្រាកដអាចជួបគ្នាបានតាមរយៈការប្រើប្រាស់នូវអ៊ីម៉ែលដែលមានការបង្ហាញជូនក្នុងគេទំព័រនេះតែម្តង។
ជាមួយគ្នានេះដែរគេហទំព័រ «សួរមួយ» នេះក៏បានបង្ហាញពីពេលវេលា ក៏ដូចជាប្រវត្តិរូបសង្ខេបរបស់អ្នកប្រឹក្សានីមួយៗ ដែលអាចឲ្យអ្នកចង់ណាត់ជួបអាចស្វែងរកនូវអ្នកប្រឹក្សាត្រូវជាមួយនឹងបញ្ហាដែលខ្លួនកំពុងតែជួបប្រទះផងដែរ។ លោកអ៊ូ រិទ្ធី៖ «ខ្ញុំសម្លឹងឃើញថាអ្នកដែលចង់ជួយដល់យុវជនខ្មែរយើងនេះមានច្រើននាក់ណាស់ពិសេសគឺអ្នកដែលមកពីខេត្តមកបន្តការសិក្សានៅភ្នំពេញ ហើយពួកគេរីករាយ និងស្វាគមន៍ចាំផ្តល់ជាយោបល់ និងចែករំលែកនូវបទពិសោធន៍ខ្លួន ខ្ញុំចង់មាន platform មួយដើម្បីប្រមូលផ្តុំអ្នកដែលមានបទពិសោធន៍ឲ្យចែករំលែកបទពិសោធន៍របស់ខ្លួនផងដែរ»។ ដូច្នេះប្រសិនបើអ្នកមានបំណងចង់ក្លាយជាអ្នកផ្តល់ប្រឹក្សានៅក្នុងគេហទំព័រ «សួរមួយ» និងចង់ចែករំលែកនូវបទពិសោធន៍ដើម្បីជួយដល់យុវជនជំនាន់ក្រោយនោះ លោកអ្នកអាចទាក់ទងជាមួយនឹងលោក អ៊ូ រិទ្ធីផ្ទាល់តែម្តង។ បច្ចុប្បន្ន លោកអ៊ូ រិទ្ធីនិងក្រុមការងារក៏កំពុងតែចុះផ្សព្វផ្សាយពីអត្ថប្រយោជន៍នៃគេហទំព័រនេះជាដំណឹងជូនសិស្សវិទ្យាល័យនៅតាមបណ្តាខេត្តនានាផងដែរ៕
Article by KEO SONG