ចំណាយពេលត្រឹមតែ២នាទីប៉ុណ្ណោះ ធានាថាអ្នកនឹងគេងលក់យ៉ាងងាយស្រួល
TRAVEL & LIVING 5 years agoដំណេក គឺជាផ្នែកមួយដ៏មានសារៈសំខាន់បំផុតចំពោះរាងកាយទាំងមូល។ ជាទូទៅរយៈពេលទទួលទានដំណេកគ្រប់គ្រាន់គឺយ៉ាងហោចណាស់ក៏៨ម៉ោងដែរក្នុងមួយថ្ងៃ ហើយការគេងគ្រប់គ្រាន់នឹងផ្តល់នូវអត្ថប្រយោជន៍ជាច្រើនចំពោះសុខភាពដូចជា ជួយពង្រឹងដល់សុខភាពខួរក្បាល ការចងចាំ និងធ្វើឲ្យស្មារតីល្អប្រសើរផងដែរ។ បច្ចុប្បន្ន មនុស្សភាគច្រើនចូលចិត្តចំណាយពេលវេលាជាមួយនឹងគ្រឿងអេឡិចត្រូនិចផ្សេងៗ ដែលនេះជាកត្តាមួយបង្កផលរំខានដល់ដំណេក ក៏ដូចជាជះឥទ្ធិពលអាក្រក់ចំពោះសុខភាពពីមួយថ្ងៃទៅមួយថ្ងៃដោយមិនដឹងខ្លួន។ ជាក់ស្តែងប្រសិនបើអ្នកទទួលទានដំណេកមិនគ្រប់គ្រាន់ នោះវាអាចបង្កហានិភ័យខ្ពស់ចំពោះអាយុជីវិតដូចជាធ្វើឲ្យប៉ះពាល់ដល់សុខភាពខួរក្បាល និងសតិអារម្មណ៍ជាខ្លាំង ហើយថែមទាំងធ្វើឲ្យអារម្មណ៍ឆាប់តានតឹងផងដែរ។ ដូចនេះ ដើម្បីបញ្ចៀសរាល់បញ្ហាទាំងអស់នេះ សូវរីន សូមណែនាំលោកអ្នកនូវវិធីសាស្ត្រសាមញ្ញៗដែលធ្វើឲ្យលង់លក់ជាមួយដំណេកបានយ៉ាងងាយស្រួល ដោយគ្រាន់តែចំណាយពេលត្រឹមតែ២នាទីប៉ុណ្ណោះ។
១. សម្រួលអារម្មណ៍ : ពីមួយថ្ងៃទៅមួយថ្ងៃមនុស្សគ្រប់រូបរមែងមមាញឹកជាមួយការប្រកបការងារ និងរបររកស៊ីស្ទើរតែរកពេលសម្រាកគ្មាន ហើយពេលខ្លះអាចនឹងជួបបញ្ហាស្មុគស្មាញបណ្តាលឲ្យអារម្មណ៍តានតឹងផងដែរ។ ដូចនេះដើម្បីទទួលបានដំណេកលង់លក់ស្រួល មុនពេលចូលគេងអ្នកអាចសម្រួលអារម្មណ៍តានតឹងឲ្យរសាយ ដោយធ្វើការអង្គុយបិទភ្នែកដកដង្ហើមចេញចូលឲ្យបានវែងៗរយៈពេល១នាទី។
២. ទម្រេតខ្លួន : ក្រោយពីអ្នកបានសម្រួលអារម្មណ៍តាមរយៈការដកដង្ហើមរួចមក អ្នកអាចចាប់ផ្តើមទម្រេតខ្លួន ដោយលាតសន្ធឹងស្មារបស់អ្នកឲ្យស្របទៅនឹងដងខ្លួន។ បន្ទាប់មក ដាក់ដៃរបស់អ្នកស្របតាមដងខ្លួនសន្សឹមៗ រួចហើយចាប់ផ្តើមដាក់ជើងឲ្យស្របទៅនឹងដងខ្លួនជាមួយការដកដង្ហើមវែងៗ។
៣. បង្កើនអារម្មណ៍ល្អ : បន្ទាប់ពីបានទម្រេតខ្លួនប្រមាណជា ១០វិនាទីរួចមក ដល់ពេលដែលអ្នកងាកមកស្រមើលស្រមៃគិតរឿងល្អៗដាក់ក្នុងខួរក្បាលដូចខាងក្រោម៖
• សាកស្រមើលស្រមៃថាអ្នកកំពុងតែគេងបណ្តែតអារម្មណ៍នៅលើទូកដ៏ធំមួយពោរពេញទៅដោយទេសភាពបៃតងខៀវខ្ចីលាយឡំជាមួយនឹងក្លិនផ្កាដ៏ក្រអូបសាយអមដោយបរិយាកាសដ៏ស្រទន់។
• បន្ទាប់មក បង្វែរអារម្មណ៍របស់អ្នកមករកភាពស្ងប់ស្ងាត់ដែលមានភាពកក់ក្តៅ រួចចាប់ផ្តើមបិទភ្នែកបន្តិចម្តងៗរហូតដល់លង់លក់នឹងការស្រមើលស្រមៃនោះ។
ជាការពិតណាស់គ្រាន់តែវិធីសាស្ត្រដ៏សាមញ្ញៗទាំងប៉ុន្មានខាងលើនេះ នឹងធ្វើឲ្យអ្នកគេងលក់យ៉ាងឆាប់រហ័ស ហើយការគេងបានគ្រប់គ្រាន់ ក៏ប្រៀបបានទៅនឹងឱសថទិព្វដែលអាចព្យាបាលជំងឺ ១០០មុខផងដែរ។ លើសពីនេះដើម្បីគេងលក់ស្រួល ជៀសវាងប្រើប្រាស់គ្រឿងអេឡិចត្រូវនិច និងទុកវានៅឆ្ងាយពីខ្លួនយ៉ាងហោចណាស់ ២ ទៅ៣ម៉ោង មុនពេលចូលដំណេក បើពុំនោះទេអ្នកនឹងត្រូវចំណាយពេលវេលាយ៉ាងច្រើនជាមួយវាដែលនេះជាកត្តាមួយបង្អាក់ដល់ការទទួលទានដំណេករបស់អ្នក៕
Article by PAN SIVLY