ក្នុងអំឡុងពេលកំពុងសិក្សាសិស្សានុសិស្សគួរតែមានសម្ភារមួយចំនួនជាចាំបាច់ ដើម្បីជាជំនួយការក្នុងការរកចំណុចសំខាន់នៃមេរៀនឬកត់ត្រាទុកនូវអ្វីដែលលោកគ្រូអ្នកគ្រូបានពន្យល់។ អ្នកអាចគិតថាសម្ភារសិក្សាមាននៅក្នុងដៃដូចជា ប៊ិក ខ្មៅដៃ និង សៀវភៅគឺអាចគ្រប់គ្រាន់ណាស់ទៅហើយ ប៉ុន្តែជាមួយគ្នានេះ អ្នកនៅភ្លេចសម្ភារសិក្សាសំខាន់មួយចំនួនទៀតដែលមានអត្ថប្រយោជន៍ជួយសម្រួលដល់ការសិក្សារបស់អ្នកឲ្យកាន់តែមានភាពរលូនឡើងផងដែរ។ ចុះតើសម្ភារសិក្សាទាំងអស់នោះមានអ្វីខ្លះ?
• ប៊ិកហាយឡាយ
ជាទូទៅប៊ិកហាយឡាយមានច្រើនពណ៌ ច្រើនជម្រើស ដែលអាចឲ្យយើងប្រើប្រាស់ដើម្បីកំណត់ចំណាំនូវចំណុចសំខាន់ណាមួយនៅក្នុងមេរៀនឬក្នុងសៀវភៅ។ វាជាភាពចាំបាច់មួយដែលអ្នកគួរតែមានក្នុងចំណោមសម្ភារសិក្សាប្រចាំថ្ងៃ ហើយអ្វីដែលសំខាន់ទៀតនោះ អ្នកគួរតែកំណត់ពណ៌ទៅតាមមុខងារនីមួយៗ មានន័យថាអ្នកអាចប្រើប្រាស់ប៊ិកហាយឡាយពណ៌លឿងសម្រាប់គូសចំណាំពាក្យពិបាក ឬពណ៌ផ្កាឈូកសម្រាប់ឃ្លាដែលសំខាន់ជាដើម។
• ស្ទីកគ័រតូចៗ
ស្ទីកគ័រក្រដាសតូចៗពិតជាមានសារៈសំខាន់ចំពោះការសិក្សា ពីព្រោះវាផ្តល់នូវភាពងាយស្រួល និងឆាប់រហ័សក្នុងការស្វែងរកនូវទំព័រសៀវភៅណាដែលយើងបានកត់ចំណាំពីមុនមក។ ម៉្យាងវិញទៀត វាក៏អាចជាផ្នែកមួយដែលអាចដាស់តឿនអ្នកមិនឲ្យភ្លេចនូវកិច្ចការមួយចំនួនក្រោយពេលត្រលប់មកពីសាលារៀនវិញផងដែរ។
• ក្រដាសកត់ត្រា
ដូចគ្នាទៅនឹងស្ទីកគ័រតូចៗដែរ ក្រដាសកត់ត្រាមានប្រយោជន៍ក្នុងការសរសេរភ្លាមៗនូវរាល់ពាក្យសម្តីរបស់លោកគ្រូអ្នកគ្រូ ខណៈពេលដែលពួកគាត់កំពុងពន្យល់។ លើសពីនេះ យើងក៏អាចកត់ត្រាត្រួសៗជំនួសសៀវភៅក្នុងករណីបន្ទាន់ផងដែរ។
• សៀវភៅកត់ត្រា
ជឿជាក់ថាអ្នកប្រាកដជាមានសៀវភៅព្រាងមួយក្បាលសម្រាប់សរសេរក្នុងករណីចាំបាច់ ហើយជាមួយគ្នានេះ អ្នកក៏គួរមានសៀវភៅកត់ត្រាបន្ថែមមួយទៀតសម្រាប់សង្ខេបរាល់មេរៀនដែលបានសិក្សារួច ឬក៏អាចនិយាយបានថាសៀវភៅកត់ត្រានេះប្រើសម្រាប់ធ្វើលំហាត់តេស្តសមត្ថភាព ឬសរសេរកាលវិភាគធ្វើកិច្ចការសាលាតាមជំហាននីមួយៗឲ្យទាន់ពេលវេលាផងដែរ៕
Article by PAN SIVLY