ទីបំផុតម៉ាកដ៏ល្បី CHANEL បញ្ចេញគ្រឿងតុបតែងមុខដំបូងបំផុតសម្រាប់បុរស
NEWS 5 years agoកន្លងមកម៉ាកដ៏ល្បីល្បាញលំដាប់ពិភពលោក Chanel តែងតែអង្រួនឧស្សាហកម្មហ្វេហ្សិនយ៉ាងកក្រើកគ្រប់រដូវកាលជាមួយនឹងខូឡិកហ្សិនថ្មីហើយប្លែកមិនថាសម្លៀកបំពាក់ គ្រឿងបំពាក់លម្អ និងគ្រឿងសម្អាងសុទ្ធសឹងមានគុណភាពខ្ពស់ ជាពិសេសតម្លៃពិតជាមិនធម្មតាឡើយ។ ហើយអ្វីកាន់តែពិសេស និងអស្ចារ្យទៀតនោះ ថ្មីៗនេះ Chanel ទើបតែបញ្ចេញនូវគ្រឿងតុបតែងមុខសម្រាប់បុរសជាលើកដំបូងបំផុតមកកាន់ម៉ាករបស់ខ្លួន ដែលធ្វើឲ្យពិភពហ្វេហ្សិនរបស់បុរសកាន់តែមានភាពសម្បូរបែបឡើង។
ខូឡិកហ្សិនគ្រឿងផាត់មុខបុរសដំបូងនេះត្រូវបានដាក់រហ័សនាមឲ្យថា «Boy de Chanel» ដែលមានគ្រឿងតុបតែងមុខចំនួន ៣ ប្រភេទដូចជា ម្សៅលាបមុខប្រភេទទឹកមានប្រាំបីពណ៌តម្រូវទៅតាមពណ៌សម្បុរស្បែក ក្រែមបបូរមាត់បែបរលោង(ពណ៌ធម្មជាតិ) និងខ្មៅគូសចិញ្ចើមមានបួនពណ៌តម្រូវទៅតាមពណ៌រោមភ្ជាប់មកជាមួយនឹងក្រាសសិតចិញ្ចើមផងដែរ។ ផ្អែកតាមវេបសាយដាក់លក់ផ្លូវការរបស់ Chanel ម្សៅទឹកនេះមានតម្លៃ ៦៥ ដុល្លារ រីឯក្រែមបបូរមាត់តម្លៃ ៣៨ដុល្លារ ចំណែកខ្មៅគូសចិញ្ចើមតម្លៃ ៤០ដុល្លារ។ អមនឹងការបញ្ចេញលក់មកកាន់ទីផ្សារពិភពលោក Chanel បានបង្ហោះសារមួយដែរថា « Boy de Chanel គឺជាខូឡិកហ្សិនគ្រឿងតុបតែងមុខដំបូងបំផុតសម្រាប់បុរស ហើយចក្ខុវិស័យរបស់ Chanel គឺ ភាពស្រស់ស្អាតគឺមិនសំខាន់លើភេទឡើយ អ្វីដែលសំខាន់គឺជាស្ទីលរបស់មនុស្សម្នាក់ៗ»។ ខូឡិកហ្សិន Boy de Chanel ត្រូវបានធ្វើការផ្សព្វផ្សាយកាលពីខែកញ្ញាឆ្នាំទៅមិញនៅឯកូរ៉េខាងត្បូង ហើយទើបតែដាក់លក់ជាផ្លូវការកាលពីចុងឆ្នាំ ២០១៨ នេះឯង។
គួរបញ្ជាក់ដែរថា ក្រៅពីម៉ាក Chanel កន្លងមកម៉ាកល្បីៗចំនួនពីរទៀតដូចជា Tom Ford និង Mmuk ក៏ពង្រីកសក្តានុពលម៉ាករបស់ខ្លួនដោយបញ្ចេញនូវខូឡិកហ្សិនគ្រឿងផាត់មុខសម្រាប់បុរសផងដែរ៕
Article by Hem Sokkhim