«ឈូកក្រៀមដាក់ក្នុងផ្កាឈូកស្រស់» ជាវិធីធ្វើតែឈូកប្លែកមិនធ្លាប់មាននៅកម្ពុជា
TRAVEL & LIVING 5 years ago នៅពេលឮថាមានតែឈូក ប្រិយមិត្តច្បាស់ជាឆ្ងល់ហើយថាតើគេយកផ្នែកណាមួយនៃឈូកមកធ្វើតែ ហើយវាមានលក្ខណៈពិសេសយ៉ាងណានោះ ដោយហេតុកន្លងមកប្រជាជនខ្មែរយើងបានត្រឹមតែយកឈូកមកធ្វើជាប្រយោជន៍ផ្សេងៗដូចជា ក្រអៅឈូកធ្វើជាបន្លែចម្អិនឈ្ងុយឆ្ងាញ់ ផ្កាយកទៅថ្វាយព្រះឬគ្រឿងលម្អ ស្លឹកខ្ចប់ចំណី ផ្លែខ្ចីហូបឆៅ និងផ្លែទុំយកទៅធ្វើក្រលីងឈូក ដំណាប់គ្រាប់ឈូក បង្អែមឬម្សៅឈូកជាដើម។
ជាការពិតណាស់ ផ្កា ស្លឹក និងដើម នៃឈូកត្រូវបានគេយកមកច្នៃធ្វើជាតែដ៏មានឱជារសឈ្ងុយឆ្ងាញ់ ដែលនេះគឺជាសមិទ្ធផលផលិតផលធម្មជាតិថ្មីសន្លាង និងដំបូងគេនៅកម្ពុជា ក្រោមសង្វាក់ផលិតកម្មរបស់សហគមន៍ SAMATOA ដែលមានទីតាំងស្ថិតនៅលើវិថី ៦៣ ក្នុងភូមិក្រាញ់ ស្រុកសៀមរាប ខេត្តសៀមរាបដែនដីអង្គរនៃយើង។ លោក អាវិន ដេឡាវ៉ាល (Awen Delaval) ស្ថាបនិកផលិតតែឈូកបានឲ្យដឹងថា រយៈពេលប្រាំឆ្នាំនេះយើងមិនត្រឹមតែយកឈូកមកធ្វើជាតែដ៏ឈ្ងុយឆ្ងាញ់ប៉ុណ្ណោះទេ តែឈូកក៏ប្រៀបបីដូចជាឱសថធម្មជាតិដែលផ្តល់អត្ថប្រយោជន៍យ៉ាងច្រើនចំពោះសុខភាព និងសម្រស់ផងដែរ តួយ៉ាងភេសជ្ជៈតែដែលពិសាភ្លាមទទួលបាននូវអារម្មណ៍ស្រស់ស្រាយនេះសម្បូរទៅដោយសារធាតុប្រឆាំងអុកស៊ីតកម្ម សារធាតុប្រឆាំងការហើមរលាកនៅក្នុងរាងកាយ និងក្រុមវីតាមីន B និង C ដែលជួយដល់ ការបញ្ចុះទម្ងន់ រក្សាតុល្យភាពជាតិស្ករក្នុងឈាម បន្ថយសម្ពាធឈាម កាត់បន្ថយស្ត្រេស បន្ថយអាការឈឺក្បាល ជំរុញដល់ប្រព័ន្ធរំលាយអាហារ និងប្រព័ន្ធការពារជាដើម។
ឈានជើងមកដល់សហគមន៍ផ្ទាល់ យើងចាប់អារម្មណ៍បំផុតចំពោះសង្វាក់ផលិតកម្មធ្វើតែឈូកដែលខុសប្លែកពីការធ្វើតែទូទៅដាច់ដោយឡែក។ ដៃបើកបង្ហាញកម្ទេចឈូកដាក់ក្នុងប្រអប់សូឡាបណ្តើរ កញ្ញា ឡុង ស្រីណា ជំនួយការផ្ទាល់របស់ម្ចាស់សហគមន៍បានបង្ហើបអំពីដំណាក់កាលនៃការធ្វើតែឈូកយ៉ាងក្បោះក្បាយថា ដំបូងគេត្រូវកាត់ឈូកឲ្យល្អិតៗ និងដាក់ហាលក្រោមកំដៅថ្ងៃក្នុងប្រអប់សូឡាដោយបែងចែកស្លឹកដោយស្លឹក ផ្កាដោយផ្កា និងដើមដោយដើម ការហាលក្នុងប្រអប់សូឡានេះគឺដើម្បីឲ្យកំដៅក្តៅងំល្អ ម្យ៉ាងការពារពីកម្ទេចធូលីហុយចូល។ រយៈពេលហាលទម្រាំស្ងួតត្រូវចំណាយពេលយ៉ាងហោចណាស់មួយអាទិត្យ លុះស្ងួតកាលណាគេចាប់ផ្តើមប្រមែប្រមូលតែទាំងប៉ុន្មានធ្វើដំណើរយកទៅដាក់ក្នុងផ្កាឈូកនៅឯបឹង។ គេត្រូវជិះទូកស្វែងរកផ្កាឈូកណាដែលក្រពុំឬចាប់ផ្តើមរីក ហើយដាក់កម្ទេចផ្កាឈូកក្រៀមចូលបរិមាណតិចឬច្រើនទៅតាមទំហំផ្កា បន្ទាប់មកក្រសោបត្របកផ្កាចូលគ្នាហើយយកខ្សែចងឲ្យជាប់។ ការរក្សាកម្ទេចឈូកក្រៀមក្នុងឈូកស្រស់ត្រូវចំណាយពេលបីថ្ងៃ ដោយក្នុងមួយថ្ងៃត្រូវផ្លាស់ប្តូរផ្កាឈូកមួយ មានន័យថាក្រោយពេលទុកក្នុងផ្កាឈូកថ្ងៃទីមួយបានមួយថ្ងៃ នាព្រឹកបន្ទាប់គេត្រូវយកកម្ទេចឈូកនោះទៅដាក់ក្នុងផ្កាថ្មីមួយទៀតហើយថ្ងៃទីបីក៏អនុវត្តដូចគ្នាផងដែរ។ គម្រប់បីថ្ងៃបីផ្កាទើបគេយកមកវេចខ្ចប់ និងឆុងពិសាបាន។ តាមការឲ្យដឹងបន្ថែមពី កញ្ញា ឡុង ស្រីណា វិធីយកឈូកក្រៀមដាក់ក្នុងផ្កាឈូកស្រស់នេះ គឺដើម្បីអប់យកក្លិនបរិសុទ្ធនៃផ្កាធម្មជាតិ ក៏ដូចជាដើម្បីបង្កើនរសជាតិឈ្ងុយឆ្ងាញ់ផងដែរ។
តែឈូកមានជាប្រភេទ ស្លឹកសុទ្ធ ផ្កាសុទ្ធ និងលាយចម្រុះគ្នាផ្កាស្លឹកនិងដើម ហើយជាមួយគ្នានេះយើងក៏បានភ្លក់រសជាតិផងដែរ ឃើញថាមិនទាន់ដាក់មាត់ដល់កែវផងចំហាយផ្សែងតែហុយៗបានសាយក្លិនក្រអូបឈ្ងុយដល់ច្រមុះធ្វើឲ្យអារម្មណ៍កាន់តែទោរទន់ បើមិនបានសាកមិនបានដឹងរសជាតិគឺពិតជាមិនអស់ចិត្តឡើយ។ ទឹកក្តៅឧណ្ហៗពណ៌រាងទឹកក្រូចស្រាលគ្រាន់តែក្រេបភ្លាម រសជាតិចត់តិចៗលាយឡំក្លិនដ៏ប្រហើរឈ្ងុយឆួលពេញច្រមុះហាក់ធ្វើឲ្យអារម្មណ៍តានតឹងទាំងអម្បាលម៉ានប្រែជាស្រស់ស្រាយភ្លាមមួយរំពេចប្រៀបបានកំពុងតែអង្គុយស្រង់ក្លិនផ្កាធម្មជាតិពិតៗនៅឯបឹងឈូកផ្ទាល់។
សម្រាប់តម្លៃតែឈូកនេះ ចំពោះផ្កាសុទ្ធ និងស្លឹកសុទ្ធ ក្នុងមួយកញ្ចប់បរិមាណ ៦០ក្រាមតម្លៃ ៧ដុល្លារ ចំណែកតែលាយចូលគ្នាបីមុខគឺស្លឹកផ្កានិងដើមមានតម្លៃ ៩ដុល្លារ។ តែឈូកមានលក់តែនៅសហគមន៍ SAMATOA ប៉ុណ្ណោះ ដូចនេះសម្រាប់អ្នកមានបំណងចង់ជាវអាចធ្វើដំណើរទៅដល់សហគមន៍ផ្ទាល់ឬចូលទៅបញ្ជាទិញនៅលើគេហទំព័រហ្វេប៊ុករបស់សហគមន៍ SAMATOA LOTUS TEXTILES៕
Article by HEM SOKKHIM