មជ្ឈមណ្ឌលរូបថតកម្ពុជាដំបូងបំផុត បើកសម្ពោធផ្លូវការនិងបើកឲ្យចូលទស្សនាដោយសេរី
NEWS 5 years agoរូបថត និង វីដេអូឯកសារទាក់ទិននឹងប្រវត្តិសាស្ត្រនយោបាយកម្ពុជាទាំងប៉ុន្មានរាប់តាំងពីសម័យសង្គមរាស្ត្រនិយមមុនឆ្នាំ ១៩៧០ រហូតមកដល់បច្ចុប្បន្ន ត្រូវបានប្រមែប្រមូលយកមកដាក់តាំងបង្ហាញបង្កើតជាមជ្ឈមណ្ឌលមួយឈ្មោះថា «មជ្ឈមណ្ឌលរូបថតកម្ពុជា» ដែលនេះគឺជាមជ្ឈមណ្ឌលប្រវត្តិសាស្ត្រដំបូងគេបំផុតដែលទើបនឹងបើកសម្ពោធជាផ្លូវការនៅព្រឹកថ្ងៃទី ០៤ ខែ មេសានេះ។
«សារធារណៈជន ជាពិសេសយុវជន យុវនិស្សិតទាំងអស់អាចចំណាយពេលត្រឹមតែមួយម៉ោងប៉ុណ្ណោះ នឹងបានស្វែងយល់ក៏ដូចជាដឹងអំពីព្រឹត្តិការណ៍ប្រវត្តិសាស្ត្រនយោបាយកម្ពុជាតាមរយៈការទស្សនារូបថត និងខ្សែវីដេអូ ដែលបង្ហាញអំពីសកម្មភាពពិតកើតឡើងទៅតាមសម័យកាលនីមួយៗនៅក្នុងប្រទេសរបស់ខ្លួននៅឯមជ្ឈមណ្ឌលរូបថតកម្ពុជានេះផ្ទាល់»។ នេះជាការលើកឡើងរបស់ លោកឆាយ សុផល ស្ថាបនិកមជ្ឈមណ្ឌលរូបថតកម្ពុជា និងជាអតីតអ្នកសារព័ត៌មាន ក៏ដូចជាសាស្ត្រាចារ្យសារព័ត៌មានល្បីឈ្មោះមួយរូប។ ជាមួយនឹងការចាយទុនប្រមាណ ២៣ម៉ឺនដុល្លារ លើការស្ថាបនាមជ្ឈមណ្ឌលនេះឡើង លោក ឆាយ សុផល បានរៀបចំនៅក្នុងផ្ទះកម្ពស់ពីរជាន់ដោយរាប់តាំងពីជាន់ផ្ទាល់ដីដល់ជាន់ខាងលើ រូបថតរាប់រយសន្លឹក និងវីដេអូ ត្រូវបានបែងចែកដាក់ទៅតាមលំដាប់លំដោយនៃសម័យកាលនីមួយៗ ហេតុដូច្នេះអ្នកចូលទស្សនាងាយនឹងយល់ពីព្រឹត្តិការណ៍ដែលកើតឡើងតាំងពីដើមរហូតដល់បច្ចុប្បន្ន។ លោក ឆាយ សុផល បានលើកឡើងទៀតថា ទីនេះមិនមែនជាមជ្ឈមណ្ឌលលក់រូបថតនោះទេ តែជាមជ្ឈមណ្ឌលជំនួយស្មារតីផ្នែករូបភាព ដើម្បីឲ្យយុវជនជំនាន់ថ្មីបានយល់ដឹងអំពីអតីតកាលប្រវត្តិសាស្ត្រកម្ពុជា ម្យ៉ាងលោកចង់ឲ្យយុវជនចំណាយពេលមកស្វែងយល់អ្វីជាចំណេះដឹងជាជាងចាយពេលលើការប្រើប្រាស់បណ្តាញសង្គមសម្រាប់តែការកម្សាន្ត។ «ខ្ញុំចង់ឲ្យទីនេះក្លាយទៅជាកន្លែងប្រឹក្សាផ្នែកប្រវត្តិសាស្ត្រតាមរយៈរូបភាព ឬអាចនិយាយបានថាជាមជ្ឈមណ្ឌលដែលភ្ញៀវទេសចរមិនអាចមើលរំលេងបានរាល់ពេលធ្វើដំណើរកម្សាន្តមកកាន់ប្រទេសកម្ពុជា»។
ឆ្លៀតក្នុងឱកាសសម្ពោធនេះ លោក ឆាយ សុផល ក៏មានមតិជាសារដែរថា«ប្រជាពលរដ្ឋ ជាពិសេសយុវជនគួរតែដឹងពីប្រវត្តិពង្សាវតារ ក៏ដូចជាព្រឹត្តិការណ៍នយោបាយដែលកើតមានឡើងនៅក្នុងប្រទេសរបស់ខ្លួន ហើយទីនេះគឺជាកន្លែងដែលបង្ហាញពីប្រវត្តិសាស្ត្រពិត រូបភាពពិត និងព្រឹត្តិការណ៍ពិតដែលជាភស្តុតាងជាក់ស្តែងតែម្តង»។
ក្រោយថ្ងៃសម្ពោធជាផ្លូវការ សារធារណៈជនអាចចូលទស្សនាបានដោយសេរី និងឥតគិតថ្លៃ ចាប់ពីម៉ោង ៨ព្រឹកដល់ម៉ោង ៥ល្ងាច ដែលមានទីតាំងនៅក្នុងបរីមហាសែនសុខ សង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ៕
Article by HEM SOKKHIM