Sovrin
Sovrin
ចាប់ផ្ដើមដំណើរកម្សាន្តជាមួយសូវរីន ទៅកាន់តំបន់ដែលពេញនិយមបំផុតទាំងក្នុងនិងក្រៅប្រទេស
TRAVEL & LIVING 5 years ago
សម្រាប់ថ្ងៃចូលឆ្នាំថ្មីដែលនឹងកៀកជិតមកដល់នាថ្ងៃខាងមុខនេះ សូវរីន សូមធ្វើជាមគ្គុទេសទេសចរណ៍ម្ដងទៀត បង្ហាញពីតំបន់ទេសចរណ៍ដែលកំពុងតែទទួលបានការគាំទ្រយ៉ាងខ្លាំងហើយជាតំបន់សម្រាកលម្ហែកម្សាន្តយ៉ាងមនោរម្យ និងពោរពេញដោយប្រណីតភាពផងដែរ។
SONG SAA private island : “ជាមួយនឹងសម្រស់ដែនកោះដ៏ស្រស់បំព្រងអមដោយ អាកាសធាតុត្រូពិច និងឡោមព័ទ្ធដោយវីឡាស្បូវប្រណីតៗធ្វើឱ្យកោះសង្សារក្លាយជាកោះ លម្ហែកាយដ៏សុខសាន្ត”។
កោះម៉ាល់ឌីវ: “ដំណើរកម្សាន្តទៅកាន់ដែនកោះឋានសួគ៌បែបប្រណីតស្ថិតលើមហាសមុទ្រឥណ្ឌាដ៏ធំល្វឹងល្វើយ និងជាទីកន្លែងឋានសួគ៌ល្អផ្តាច់សម្រាប់ភ្ញៀវអភិជនទាំងឡាយដែលស្រឡាញ់បរិស្ថានធម្មជាតិ ការស្នាក់នៅប្រកបដោយលក្ខណៈស្តង់ដារអន្តរជាតិ និងមានការបម្រើលក្ខណៈផ្ទាល់ខ្លួនយ៉ាងយកចិត្តទុកដាក់មិនឱ្យខកបំណងឡើយ”។
ទឹកដីព្រះនិមិត្តស្ទឹងត្រែង ក្រចេះ “ឈ្លក់វង្វេងជាមួយទឹកដីដែលមានសម្រស់ស្រស់ស្អាតគ្មានពីរ ហាក់បីដូចជាឋានទេវលោក នាភូមិភាគឦសាន្តនៃព្រះរាជាណាចក្រកម្ពុជា”។
ទីក្រុងហ្លួងព្រះបាង “ដំណើរកម្សាន្តទៅកាន់អតីតរាជធានីបុរាណរបស់ទឹកដីខ្ពង់រាបនៃប្រទេសឡាវ ដែលមានសម្រស់ដ៏ល្អឯក និងប្រពៃណីយ៉ាងល្អផូរផង់របស់ប្រជាជននៃទីក្រុងហ្លួងព្រះបាង។ ក្នុងនោះផងដែរហ្លួងព្រះបាងពិតជាសម្បូរទៅដោយវត្តអារាមដែលមានរចនាបទយ៉ាងល្អប្រណីតតែមួយគ្មានពីរពិតជាធ្វើឱ្យដក់ជាប់ក្នុងក្រអៅបេះដូងអ្នកទេសចរមិនអាចបំភ្លេចបានឡើយ”។
ខេត្ត ឈៀងម៉ៃ ឈៀងរ៉ៃ និងឡាំបាង “ដំណើរកម្សាន្តលើទឹកដីភាគខាងជើងនៃប្រទេសថៃនឹងបង្កប់នូវមន្តស្នេហ៍មួយបែបផ្សេងទៀត ដែលអាចអន្ទងដួងចិត្តអ្នកទេសចរឱ្យត្រេកត្រអាលជក់ចិត្តនឹងសម្រស់ធម្មជាតិដ៏ស្រស់ត្រកាលយ៉ាងមនោរម្យនឹងប្រមូលផ្ដុំដោយទីអារាមចាស់ៗ ដែលសុទ្ធសឹងជាកន្លែងប្រវត្តិសាស្រ្ត បង្កប់ដោយរឿងរ៉ាវកាលពីបុរាណ”។
ប្រាសាទសម្បូរព្រៃគុហ៍ “ជាអតីតរាជធានីខ្មែរដ៏ល្បីល្បាញនាសម័យចេនឡា និងជាទីកន្លែងយ៉ាងពិសេសអស្ចារ្យសម្រាប់អ្នកទេសចររូបណាប្រាថ្នាស្វែងរកភាពស្ងប់ស្ងាត់។ ខ្យល់បក់ត្រសៀកៗប៉ះនឹងមែកឈើរណ្ដំជាមួយសម្លេងបក្សីព្រៃបំពេរអារម្មណ៍ អ្នកទេសចរគ្រប់គ្នាឱ្យលង់លក់ក្នុងសុបិនដែលនឹងនាំយើងទៅកាន់អតីតកាលមួយដ៏អស្ចារ្យ ក្នុងទឹកដីខេត្តកំពង់ធំ”។
ឧទ្យានជាតិព្រះសីហនុរាម និង កោះរាជ្យបុត្រ “ជាសសៃឈាមទាក់ទាញទេសចរណ៌ លម្អដោយធម្មជាតិសមុទ្រប្រៀបឋានកិន្នរ បង្កជាឆ្នេរខ្សាច់ស្អាតល្អបន្តរក្សាអេកូធម្មជាតិប្រៀបផ្ទឹមពុំបានបីដូចកល្យាណក្នុងព្រៃព្រឹក្សា ឆ្នេររាមសែនស្អាតចង់ទៅទស្សនាដែលភ្ញៀវទេសចរជាតិនឹងអន្តរជាតិមិនគួររំលង”។
ប្រាសាទបន្ទាយឆ្មារ ស្ថិតនៅក្នុងស្រុកថ្មពួកខេត្តបន្ទាយមានជ័យ “ថ្វីត្បិតតែប្រាសាទបន្ទាយឆ្មារមានសភាពទ្រុធទ្រោមបន្តិចមែន ប៉ុន្តែសម្រស់ប្រាសាទនៅតែអាចអន្ទងដួងចិត្តភ្ញៀវទេសចរឱ្យទៅកម្សាន្តទស្សនានៅប្រាង្គប្រាសាទមួយនេះមិនចេះដាច់ ព្រោះតែចម្លាក់ដ៏ល្អវិចិត្រនេះបានទាញចិត្តអ្នកទស្សនាឱ្យឈ្លក់វង្វេងជាមួយសម្រស់ធម្មជាតិដ៏ស្រស់បំព្រងអមផ្កាស្មៅដុះមីរដេដាស ប្រៀបដូចជាកម្រាលព្រំពណ៌សរលាយពណ៌បៃតង កំពុងតែក្រាលរងចាំភ្ញៀវទេសចរដែលនឹងទៅកម្សាន្តនៅតំបន់ប្រាសាទនោះយ៉ាងដូច្នោះដែរ”។
បាត់ដំបងបេះដូងនៃទីក្រុងអាណានិគមប្រមូលផ្តុំដោយរឿងរ៉ាវកាលពីអតីតកាលរុញច្រានដួងចិត្តភ្ញៀវទេសចរ “ចាប់ផ្ដើមដំណើរកម្សាន្តថ្មីមួយទៅកាន់ភាគពាយ័ព្យនៃប្រទេសកម្ពុជា ខេត្តក្រុងបាត់ដំបងដែលបន្សល់នូវមរតកដ៏សម្បូរបែបផ្នែកបេតិកភណ្ឌក្រុងប្រវត្តិសាស្រ្ត ដែលអ្នកទេសចរទាំងឡាយច្រើនតែរំលងនឹងនឹកមិនឃើញដល់ការធ្វើដំណើរកម្សាន្តនៅខេត្តមួយនេះ ដែលប្រមូលផ្ដុំដោយតំបន់ទេសចរណ៍យ៉ាងសម្បូរបែប”។
កោះបាលី “ដំណើរកម្សាន្តទៅកាន់ Bali ជាឋានសួគ៌មួយលើលោកីយ៍នៅភាគខាងកើតនៃប្រទេសឥណ្ឌូនេស៊ី ដែលអ្នកទេសចរទាំងឡាយគួរមកទស្សនាកម្សាន្តទទួលយកអនុស្សាវរីយ៍ដែលមិនអាចបំភ្លេចបានជាមួយសម្រស់ធម្មជាតិដ៏ល្អត្រកាល រីឯផ្ទៃទឹកសមុទ្រដ៏ថ្លាឈ្វេងដូចកញ្ចក់ពោរពេញដោយពពួកផ្កាថ្មប៉ប្រះទឹកគួរជាទីមនោរម្យក្រៃលែង”។
Magical Island KOH RONG “កោះរ៉ុងគឺជាកោះឋានសួគ៌ធម្មជាតិ ដែលមានផ្ទៃទឹកសមុទ្រខៀវស្រងាត់ដ៏ស្រស់អស្ចារ្យ ក្នុងចំណោមកោះមួយចំនួននៅលើទឹកដីខេត្តព្រះសីហនុដែលជាប់នឹងមាត់សមុទ្រនាភាគនិរតីនោះ ហើយក៏ត្រូវបានចាត់ទុកថាជាឆ្នេរខ្សាច់ស្រស់ស្អាតបំផុតនៅឥណ្ឌូចិនថែមទៀតផង”។
ក្រោយពីការអត្ថាធិប្បាយខ្លីៗពីតំបន់ទេសចរណ៍ល្បីៗ ទាំងក្នុងនិងក្រៅប្រទេសហើយនោះ សូវរីន សង្ឃឹមនឹងជឿជាក់ថានឹងអាចជាជម្រើសថ្មីមួយសម្រាប់ប្រិយមិត្តមួយចំនួនតូចក្នុងការរៀបចំដំណើរកម្សាន្តរបស់ខ្លួននាថ្ងៃសម្រាកលម្ហែចុងឆ្នាំខាងមុខនេះ៕
Artical by SOVRIN
