Sovrin
Sovrin
ឈានចូលដល់រដូវក្តៅមិនបានប៉ុន្មានផង ឧស្សាហកម្មហ្វេហ្សិននៅកម្ពុជាហាក់ហក់ស្ទុះឡើងយ៉ាងគំហុកដោយកំពូលអ្នកឌីហ្សាញជាន់ថ្មីវ័យក្មេងជាច្រើនរូបបានចេញមកបញ្ចេញសមិទ្ធផលស្នាដៃរៀងខ្លួនជាមួយនឹងសម្លៀកបំពាក់ក៏ដូចជាគ្រឿងបំពាក់តាក់តែងកាយជាខូឡិកហ្សិនប្លែកៗគួរឲ្យទាក់ចិត្ត ដែលធ្វើឲ្យហ្វេហ្សិននៅកម្ពុជាកាន់តែមានភាពគគ្រឹកគគ្រេងឡើង។ យ៉ាងណាមិញ ក្នុងចំណោមខូឡិកហ្សិនពិសេសៗប្រចាំរដូវក្តៅនេះ អ្នកឌីហ្សាញវ័យក្មេងមួយរូបបានបញ្ចេញនូវខូឡិកហ្សិនខុសប្លែកគេដោយមិនផ្តោតលើទំនោរទៅតាមរដូវកាល ប៉ុន្តែងាកមកផ្តោតលើភាពឆើតឆាយស័ក្តិសមសម្រាប់នារីស៊ីវិល័យចូលចិត្តសាកអ្វីដែលថ្មី និងជាហ្វេហ្សិនលំដាប់កំពូល។
«Mini» ជាខូឡិកហ្សិនថ្មីតែមួយគត់ដែលសម្រិតសម្រំាងយ៉ាងល្អិតល្អន់ក្រោមស្នាដៃអ្នកច្នៃម៉ូតកម្ពុជា Skyler ដែលនឹងធ្វើការបង្ហាញជាផ្លូវការណ៍នៅថ្ងៃនេះជាមួយនឹងសូវរីនផ្ទាល់។ បើកទំព័រប្រចំារដូវក្តៅជាមួយនឹងខូឡិកហ្សិន៤ឈុត Skyler បានឲ្យដឹងថា «វាគឺជាខូឡិកហ្សិនខ្នាតតូច ប៉ុន្តែវាមានលក្ខណៈពិសេសបំផុតដែលបង្ហាញពីភាពជានារីដែលហ៊ាន នារីដែលចង់សាកល្បងនូវអ្វីដែលថ្មី សំខាន់ជាមនុស្សស្រីស្រឡាញ់នូវការរៀបចំខ្លួនបែបហ្វេហ្សិនលំដាប់តែម្តង»។ រចនាឈុតឡើងពីស្បែកពស់ (ស្បែកសប្បនិម្មិត) ក្រឡេក្រឡាភ្លឺរលោង ឈុតនីមួយៗសុទ្ធសឹងស្ថិតក្នុងរាងរៅសាមញ្ញនិយម តែអ្វីដែលគួរជាទីចាប់អារម្មណ៍គឺបានបង្កប់នូវភាពសិចស៊ីទាក់ទាញបញ្ចេញសាច់រំលេចម៉ូតលម្អដោយរូត តម្ពក់ ខ្សែរឹបរាងខ្វាត់ខ្វែង និងមានប្រទាក់ម៉ូតដោយកងមាសតូចធំបណ្តុំជាភាពស៊ីវិល័យស័ក្តិសមឥតទាស់សម្រាប់នារីសម័យថ្មីដែលហ៊ានសាកល្បងនូវអ្វីដែលថ្មីដូចដែល Skyler បានលើកឡើង។ «រយៈពេលជាង ៥០ម៉ោងដើម្បីសម្រេចឈុតនេះឡើង ខ្ញុំបានបោះបង់គំនិតដែលធ្លាប់តែខ្លាច ធ្លាប់តែអៀនខ្មាស់ចោលទាំងអស់ ហើយងាកមកផ្តោតលើសេរីភាពក្នុងការច្នៃប្រឌិដ្ឋឡើងវិញ។ «កំឡុងពេលធ្វើឈុតនេះបណ្តើរ ខ្ញុំរៀនពីវាបណ្តើរ ថ្វីដ្បិតតែទំនោរមិនតម្រូវទៅតាមរដូវកាលទាំងស្រុងដូចជាការប្រើប្រាស់ស្បែកជាដើម ប៉ុន្តែនេះជាខូឡិកហ្សិនថ្មីមួយដែលខ្ញុំធ្វើសម្រាប់ខ្លួនឯងផង ចង់បង្ហាញពីសេរីភាពច្នៃម៉ូតផង ក៏ជាសមិទ្ធផលថ្មីប្លែកសម្រាប់វិស័យហ្វេហ្សិននៅកម្ពុជាក៏ដូចជាការបង្ហាញស្នាដៃចំពោះការវិលត្រឡប់មកវិស័យច្នៃម៉ូតវិញបន្ទាប់ពីខ្ញុំផ្អាក(រវល់ការងារផ្ទាល់ខ្លួន)រយៈពេលមួយឆ្នាំកន្លងមកផងដែរ»។ Skyler បានបន្ថែម។
ដោយសារតែខូឡិកហ្សិន «Mini» ភ្ជាប់មកជាមួយសម្លៀកបំពាក់ជាឈុតរ៉ូបរាងរៅបែបក្លាសិក និងលម្អិតភាពសិចស៊ីស៊ីវិល័យលើដងខ្លួន អ្នកច្នៃម៉ូតវ័យ ២៤ឆ្នាំ រូបនេះ បានបញ្ជាក់បន្ថែមថា វាស័ក្តិសមចំពោះការស្លៀកពាក់ចូលរួមកម្មវិធីរាត្រីសមោលសរ កម្មវិធីហ្វេហ្សិន សម្រាប់ថតម៉ូត និងថតបទចម្រៀងជាដើម។
បច្ចុប្បន្នក្រោយពីវិលមកវិស័យច្នៃម៉ូដជាមួយនឹងខូឡិកហ្សិនថ្មីនេះ Skyler ក៏កំពុងតែមមាញឹកយ៉ាងខ្លាំងចំពោះការច្នៃម៉ូតសម្លៀកបំពាក់ឲ្យតារាល្បីៗក្នុងស្រុក ពិសេសច្នៃម៉ូតសម្លៀកបំពាក់សម្រាប់ការថតបទចម្រៀងថ្មីៗ ហើយក៏កំពុងតែសកម្មការងារជាមួយនឹងក្រុមហ៊ុនច្នៃម៉ូតគ្រឿងតាក់តែងកាយធំមួយដែលនាំចេញផលិតផលទៅក្រៅស្រុក៕
Article by Hem Sokkhim
