Sovrin
Sovrin
បទពិសោធន៍នៃការសម្រាកលម្ហែកាយយ៉ាងប្រណីតភាពនៅរីហ្សតថ្មីនៃដែនដីកោះឫស្សី
TRAVEL & LIVING 5 years ago
ជាបទពិសោធន៍ថ្មីដ៏គួរឲ្យសោមនស្សរីករាយជាទីបំផុតនៅពេលដែលក្រុមការងាររបស់ទស្សនាវដ្តីសូវរីន បានមកសម្រាកលម្ហែកាយនៅរីហ្សតដ៏ថ្មីសន្លាងមួយដែលគេទើបតែចាប់ផ្តើមបើកដំណើរការកាលពីថ្ងៃទី០១ ខែវិច្ឆិកា ឆ្នាំ២០១៨ ហើយរីហ្សតដ៏គួរឲ្យចង់ស្នាក់អាស្រ័យនៅនេះពិតជាបានទាក់អារម្មណ៍ខ្ញុំមិនឲ្យសោកសៅ និងដក់នូវការចងចាំដ៏ផ្អែមល្ហែមមួយនៅពេលដែលខ្ញុំនឹកឃើញអនុស្សាវរីយ៍នៃការសម្រាកលម្ហែកាយដ៏ស្រស់ស្រាយមួយនោះ។ អាលីឡា វីឡា គឺពិតជា រីហ្សតដ៏ប្រណិតលំដាប់ផ្កាយប្រាំដែលមានសាខាជាច្រើននៅទូទាំងពិភពលោក ហើយអាលីឡា កោះឫស្សីនេះគឺជាសមិទ្ធផលថ្មីមួយទៀតរបស់ក្រុមហ៊ុនអាលីឡា ដែលបានមកបោះទីតាំងនៅលើដីកោះនៃខេត្តព្រះសីហនុនេះ។ ស្ថិតនៅភាគខាងលិចឈៀងខាងជើងនៃកោះឫស្សី អាលីឡាគឺជារីហ្សតមួយដ៏ស្រស់ស្អាតដែលមានបន្ទប់ស្នាក់នៅជាច្រើនប្រភេទប្រកបដោយផាសុកភាពនិងមានទេសភាពដ៏ស្រស់ត្រកាល ដែលអាចអនុញ្ញាតិឲ្យយើងសម្រាកលម្ហែកាយយ៉ាងមានសេចក្តីសុខនិងរីករាយជាមួយនឹងសម្លេងរលកសាគរនិងវាយោសមុទ្រយ៉ាងពិរោះរណ្តំគ្រប់ពេលវេលា។ វាហាក់ដូចជាបាននាំពួកយើងឲ្យចាកចេញពីមនុស្សម្នារទាំងឡាយ មកលម្ហែកាយនៅពិភពមួយទៀតយ៉ាងស្ងប់ស្ងាត់ប្រកបដោយសម្មាធិក្នុងចិត្តជាទីបំផុត។
ធ្វើដំណើរតាំងពីព្រឹកព្រលឹមស្រាងៗ ក្រុមការងារយើងបានចាប់ផ្តើមធ្វើចរាចរណ៍តាមផ្លូវជាតិលេខបួនឈ្ពោះទៅកាន់ឧទ្យានជាតិព្រះសីហនុរាមក៏ប៉ុន្តែនៅពេលដែលបានមកដល់ត្រឹមចំណុចរង្វល់មូលផ្លូវបំបែកទៅកាន់ឧទ្យានសមុទ្ររាម យើងបានបន្តដំណើរតាមតាក់ស៊ីដែលគេបានច្នៃពីកូនរថយន្ត ឥតជញ្ជាំងនិងដំបូលខ្ពស់ហាក់ដូចជាតុកតុកកង់បួនធ្វើដំណើរពីអាកាសយានដ្ឋានក្រុងព្រះសីហនុរហូតដល់ឆ្នេរលម្ហែកាយរាម។បន្តដំណើរមកដល់ចំណុចនៃរង្វង់មូលព្រះនរាយណ៍ រថយន្តតាក់ស៊ីបាននាំពួកយើងទៅមុខទៀតរហូតដល់ផែឯកជននៃរីហ្សតអាលីឡា ដែលត្រូវបានគេសាងសងឡើងមានចំណតដ៏ធំអាចផ្ទុករថយន្តរបស់ភ្ញៀវដែលចង់មកលម្ហែកាយនៅរីហ្សតដ៏ប្រណិតនេះបានចំនួនជាច្រើនគ្រឿងទៀតផង។ ពិតជាកក់ក្តៅខ្លាំងណាស់នៅពេលដែលក្រុមការងាររបស់យើងបានដល់ផែឯកជនមួយនេះហើយត្រូវបានទទួលស្វាគមន៍ពីសំណាក់បុគ្គលិកប្រុសៗប៉ុន្មាននាក់យ៉ាងរួសរាយរាក់ទាក់ជាទីបំផុត។ នេះហាក់បានផ្តល់ជាសញ្ញាថាយើងបានដល់កន្លែងដ៏ស៊ីវិល័យ ដែលសូម្បីតែទីតាំងផែសោះក៏ធ្វើឲ្យយើងមានអារម្មណ៍ហាក់ដូចជាអភិជនមួយរូបផងដែរ។ កប៉ាល់ពណ៌សយ៉ាងថ្មីសន្លាង និងប្រណិតបំផុតកំពុងតែបណ្តែតខ្លួននៅលើផ្ទៃទឹកហាក់កំពុងរង់ចាំជូនដំណើរភ្ញៀវដើម្បីបន្តដំណើរទៅកាន់គោលដៅដែលជាកន្លែងកំសាន្តដ៏សប្បាយរីករាយ។ ដោយមិនបង្អង់យូរ ម៉ាស៊ីនកាណូតប្រណិតក៏ចាប់ផ្តើមបញ្ឆេះឡើង ដោយនាំយកនូវវាយោសមុទ្រដ៏លំហើយបោកបក់មកប៉ះកាយយ៉ាងត្រជាក់ល្ហឹម។ អារម្មណ៍មួយនេះពិតជាមិនអាចបំភ្លេចបានឡើយ នៅពេលដែលកាណូតបានបោះពួយទៅមុខយ៉ាងលឿន ហើយមិនអាចទប់ដៃរបស់ក្រុមការងារយើងឲ្យទាញទូរសព្ទមកផ្តិតយករូបថត និង ថតសេលហ្វីបាននោះឡើយ។ កាណូតដែលអាចផ្ទុកមនុស្សបានប្រមាណជា១៥ នាក់ បើកលឿនមែនទែន ក៏ប៉ុន្តែវាហាក់មិនធ្វើឲ្យយើងពុលរលកដោយសារតែកំលាំងទឹករលកបោកបក់ទេ តែវាបែរជាធ្វើឲ្យយើងរំភើបរកអ្វីប្រៀបផ្ទឹមពុំបានឡើយ។ រយៈពេល ១០នាទី នៅលើកាណូតនៅទីបំផុតយើងក៏បានមកដល់រីហ្សតអាលីឡាកោះឫស្សីជាមួយនឹងអារម្មណ៍ដែលនៅតែរឭករាល់បរិយាកាសទាំងអស់នៅលើកាណូត។ គ្រាន់តែមកដល់ផែភ្លាម អ្នកទទួលភ្ញៀវក៏រង់ចាំទទួលយើងស្រាប់នៅលើផែថ្មជាមួយនឹងទឹកផ្លែឈើនិង ក្រណាត់ត្រជាក់សម្រាប់ពួកយើងហើយស្រាប់។
Image Courtesy: ALILA KOH RUSSEY
ជាថ្មីម្តងទៀត អ្នកទទួលភ្ញៀវនៅតែរង់ចាំសំពះស្វាគមន៍ពួកយើងជាមួយនឹងស្នាមញញឹមពព្រាយនៅឯកន្លែងទទួលភ្ញៀវហើយនាំពួកយើងទៅកាន់បន្ទប់ជាមួយនឹងការធ្វើមគ្គុទេសន៍រៀបរាប់ពីកន្លែងមួយទៅកន្លែងមួយទៀត ដែលយើងគួរតែដឹង នៅអាលីឡាជាមួយនឹងសម្តីទន់ភ្លន់គួរសមជាទីបំផុត។ ពិតជាស្អាតខ្លាំងណាស់ អាលីឡាវីឡាបានរចនានូវទេសភាពដ៏គួរឲ្យទាក់ភ្នែកជាមួយនឹងដើមសារាយសមុទ្ររាប់ម៉ឺនដើមដុះទាបរាបស្មើរគ្នាចាប់តាំងពីច្រកចូលរហូតដល់ខាងក្នុងជាមួយនឹងអាងទឹកជាដំណាក់ៗ ខុសប្លែកពីអាងទឹកដែលយើងធ្លាប់ឃើញធម្មតា បង្កើតបានជាផ្ទាំងទស្សនីយភាពមួយបែបដែលធ្វើឲ្យភ្ញៀវគយគន់មិនចេះជិនណាយ។ ទេសភាពបែបនេះពិតជាស្អាតប្លែក និងគ្មានឡើយនៅតាមរីហ្សតមួយចំនួនដែលយើងធ្លាប់បានប្រទះនៅកម្ពុជា។ រវល់តែគយគន់ទិដ្ឋភាពដ៏ត្រជាក់ភ្នែកនៅជុំវិញរីហ្សតនេះ អ្នកជូនភ្ញៀវរបស់យើងក៏បាននាំយើងមកដល់កន្លែងដែលយើងសម្រាកទៅហើយ។ វីឡាដែលពួកយើងបានសម្រាកលម្ហែកាយនោះជាប្រភេទវីឡា Garden Pavilion ជាវីឡាហ៊ុំព័ទ្ធទៅដោយកញ្ចក់បែរមុខទៅកាន់មាត់សមុទ្រដែលអនុញ្ញាតិឲ្យយើងអាចគយគន់ទេសភាពដ៏ស្រស់ត្រកាលនៃមហាសាគរដ៏ខៀវស្រងាត់។ ក្នុងបន្ទប់បានបំពាក់នូវគ្រឿងសង្ហារិមនិងគ្រឿងបរិក្ខារប្រណិតៗជាច្រើន ជាមួយនឹងពាក្យស្វាគមណ៍ដ៏មានន័យហើយបានបង្ហាញឈ្មោះយើងនៅលើកញ្ចក់ទូរទស្សន៍ឆ្លាតវៃនោះថែមទៀតផង ដែលនេះរឹតតែធ្វើឲ្យពួកយើងហាក់ដូចជាអភិជនដ៏ថ្លៃថ្នូរនិងមានសុភមង្គលថែមមួយកម្រិត។
Image Courtesy: ALILA KOH RUSSEY
Image Courtesy: ALILA KOH RUSSEY
រយៈពេលកន្លះថ្ងៃដែលពួកយើងបានដើរលម្ហែកាយ ពិតជាមិនគ្រប់គ្រាន់សម្រាប់យើងនោះឡើយដើម្បីទទួលបាននូវអារម្មណ៍ល្អដែលកម្ររកបានបែបនេះ ក៏ប៉ុន្តែព្រះសុរិយាក៏រៀបនឹងអស្ដង្គត ក្រុមការងារយើងក៏ប្រញាប់ប្រញាល់សម្តៅឆ្ពោះទៅឆ្នេរឯកជនរបស់អាលីឡា ដើម្បីផ្តិតយករូបភាពព្រះអាទិត្យរៀបលិច។ នេះប្រហែលជាសំណាងរបស់ពួកយើង ដែលផ្ទៃមេឃស្រលះ គ្មានពពក បានបើកឱកាសឲ្យក្រុមការងាររបស់យើងផ្តិតយកទិដ្ឋភាពព្រះអាទិត្យរៀបលិចដែលចាំងពន្លឺភ្លឺបផ្លែតដូចគ្រាប់គ្រីស្តាល់នៅពាសពេញផ្ទៃសមុទ្រយ៉ាងស្រស់ស្អាត។ មិនយូរប៉ុន្មាន រស្មីព្រះសុរិយាក៏ឃ្លាតឆ្ងាយបាត់ទៅ ជំនួសមកវិញនូវស្បៃរាត្រីអន្ធិកា ហើយនេះជាភ័ព្វសំណាងដែលយើងអាចដេកគយគន់មើលទេពច្យុតហោះកាត់ផ្ទៃវេហាជាមួយនឹងដួងតារារាប់ពាន់រះពេញមេឃនារាត្រីខែមាឃហើយនេះគឺជាការបិទបញ្ចប់នៃការសម្រាកលម្ហែកាយនៅថ្ងៃទីមួយ។
Image Courtesy: ALILA KOH RUSSEY
ព្រឹកព្រហាមថ្ងៃទីពីរ បានធ្វើឲ្យយើងភ្ញាក់ពីដំណេកយ៉ាងស្រស់ស្រាយនៅពេលដែលទាញវាំងននដើម្បីមើលទេសភាពមាត់សមុទ្រនាពេលព្រឹក។ ក្រោយពីបានរៀបចំខ្លួនរួចមក គឺដល់ពេលល្មមដើម្បីឲ្យយើងទៅស្រុះស្រូបអាហារពេលព្រឹក នៅ Horizon ដែលជាភោជនីយដ្ឋានផ្ទាល់អាលីឡាបើកចាប់ពីម៉ោង ប្រាំពីរព្រឹករហូតដល់ម៉ោង ដប់កន្លះព្រឹក និងពេលល្ងាចពីម៉ោង ប្រាំមួយកន្លះ ល្ងាច ដល់ម៉ោង ដប់កន្លះយប់ជារៀងរាល់។ អាហារព្រឹកដែលចម្អិនដោយចុងភៅចំណាន និងមានបទពិសោធន៍បានធ្វើឲ្យយើងទទួលបាននូវអាហារពេលព្រឹកដ៏គួរឲ្យឆ្ងាញ់ពិសារបំផុត។ ការធ្វើដំណើរកំសាន្តជុំវិញរីហ្សតដើម្បីចង់ឃើញដោយផ្ទាល់ភ្នែកថាស្រស់ស្អាតយ៉ាងណាទៀតនោះ ក៏បានចាប់ផ្តើមសារជាថ្មីជាមួយនឹងកាមេរ៉ានៅគ្រប់ដៃរបស់ក្រុមការងារសូវរីនទាំងអស់គ្នាដែលយើងបានត្រៀមនឹងផ្តិតយករូបស្អាតៗជាច្រើន។ សឹងតែគ្រប់ប្លង់ទាំងអស់នៅអាលីឡាកោះឫស្សីដែលយើងបានថតហើយបានសង្កេតឃើញថាស្អាតមិនថានៅមាត់ទ្វារ ផ្លូវដើរ ក្បែររបង ឬក៏កៀនជញ្ជាំងនោះឡើយ គឺសុទ្ធតែរៀបចំឡើងប្រកបដោយសិល្បៈនិយមនិងភាពច្នៃប្រតិដ្ឋជាទីបំផុត។ ដើរទៅតាមឆ្នេរបន្តិច យើងបានទើបប្រទះនូវប្រភេទ Ocean Beach Villa ដែលមានអាងទឹកឯកជនស្ថិតនៅក្បែរមាត់ឆ្នេរ។ វីឡាប្រភេទនេះគឺជាប្រភេទវីឡាអភិជនដ៏ប្រណីតបំផុតជាងគេបំផុតនៅរីហ្សតនេះ ប្រសិនបើអាចស្នាក់នៅវីឡាប្រភេទនេះពិតជាធ្វើឲ្យយើងហាក់មានអារម្មណ៍ថារំភើបនិងរកអ្វីប្រៀបផ្ទឹមពុំបានឡើយ។
Image Courtesy: ALILA KOH RUSSEY
កណ្តាលថ្ងៃត្រង់ម៉ោង១២ ជាពេលបាយត្រង់ ដែលអាចឲ្យយើងទៅទទួលទានបាយថ្ងៃត្រង់នៅឯអាហារដ្ឋាន Beach Shack មួយកន្លែងទៀត នៅលើឆ្នេរខ្សាច់ផ្ទាល់តែម្តងដែលមានបម្រើទាំងម្ហូបខ្មែរ និងអ៊ឺរ៉ុបចាប់បើកបម្រើភ្ញៀវជារៀងរាល់ថ្ងៃពីម៉ោង ១០ព្រឹក រហូតដល់ម៉ោង ១១យប់។ រសៀលម៉ោងបី នៅពេលដែលថ្ងៃរៀងជ្រេបន្តិច គឺជាពេលដែលពួកយើងបានសប្បាយរីករាយជាមួយនឹងការអ៊ុំទូក កៃយ៉ាកដែលរីហ្សតបានផ្តល់ឲ្យសម្រាប់ភ្ញៀវកម្សាន្តដោយឥតគិតថ្លៃ។ ជាថ្មីម្តងទៀតនៅពេលដែលយើងបានអ៊ុំទូកលេងនៅលេងមហាសាគរក្រោមពន្លឺថ្ងៃពណ៌ក្រហមឆ្អិនឆ្អៅ ហាក់បានបង្ករជាបរិយាកាសមួយដ៏វិសេសវិសាលមួយទៀត ជាមួយនឹងការគយគន់ផ្កាថ្មនៅពីក្រោមទូក ដែលនេះពិតជាឱកាសដ៏កម្រមួយទៀតដែលយើងបានជួបទៀតផង ហើយនេះគឺជាការបិទបញ្ចប់សកម្មភាពថ្ងៃទីពីរនៃការស្នាក់នៅដ៏មានន័យនៅអាលីឡាវីឡា។
នេះពិតជាបទពិសោធន៍ដ៏អស្ចារ្យបំផុតដែលក្រុមការងារទស្សនាវដ្តីសូវរីនមានធ្លាប់ជួបប្រទះពីមុនមកនោះឡើយ ហើយយើងក៏សង្ឃឹមថានឹងអាចបានទៅសម្រាកលម្ហែកាយនៅអាលីឡាវីឡាកោះឫស្សីដែលប្រៀបបានដូចជាឋានសួគ៌លាក់កំបាំងកាយនាទិសនិរតីនៃប្រទេសកម្ពុជាយើងនេះ។ អាលីឡាវីឡានេះពិតជាបានផ្តល់នូវអារម្មណ៍រំភើបសប្បាយរីករាយ និងសុភមង្គលដែលពួកយើងរៀបរាប់មិនអស់នោះឡើយ៕
Article by KEO SONG
Image Courtesy: ALILA KOH RUSSEY
