«ស្អាត មហោស្រពសិល្បៈទីក្រុង ឆ្នាំ២០១៩» ប្រារព្ធឡើងជាលើកដំបូងក្នុងទីក្រុងបាត់ដំបង
NEWS 5 years agoកាលពីថ្ងៃទី១ ខែមិថុនា ឆ្នាំ២០១៩ កន្លងទៅថ្មីៗនេះ ស្ថិតនៅក្នុងទីក្រុងបាត់ដំបង បានរៀបចំគម្រោងដ៏អស្ចារ្យ និងគួរឲ្យចាប់អារម្មណ៍ដែលមានឈ្មោះថា៖ «ស្អាត មហោស្រពសិល្បៈទីក្រុង ឆ្នាំ២០១៩» ក្រោមប្រធានបទ «បាត់ដំបងខ្ញុំ»។ ជាមួយនឹងគម្រោងដែលមានការគាំទ្រយ៉ាងខ្លាំងពីប្រជាជនរស់នៅក្នុងទីក្រុងបាត់ដំបងនេះ បានរៀបចំរួមគ្នាឡើងដោយ អង្គការហ្វាពន្លឺសិល្បៈក្នុងគម្រោង «មហោស្រពសិល្បៈទីក្រុង ស្អាត» អាជ្ញាធរទេសចរណ៍ថៃក្រោមគម្រោង «បទពិសោធន៍សិល្បៈវប្បធម៌ប៉ុបប្រជាប្រិយរបស់អាស៊ាន» សមាគមតុក្តតាយក្ស ស្ថិតក្រោមគម្រោង «មហោស្រពតុក្តតាយក្ស» សមាគម រាំ បាក់ មន្ទីរទេសចរណ៍ខេត្តបាត់ដំបង មន្ទីរវប្បធម៌ និងវិចិត្រសិល្បៈបាត់ដំបង វិចិត្រសាល សង្កែ និងវិចិត្រសាល រំចេក ៥។
គួរបញ្ជាក់ផងដែរថា ព្រឹត្តិការណ៍នេះបានរៀបចំឡើងក្នុងគោលបំណង ជំរុញឲ្យមានការចូលរួមរបស់សហគមន៍តាមរយៈសិល្បៈ ដើម្បីផ្សព្វផ្សាយពីលក្ខណៈសិល្បៈទីក្រុងដែលជាទម្រង់សិល្បៈបែបកម្ពុជាតែមួយគត់ បង្ហាញ និងបង្កើតចីរភាពនៃគុណភាពតម្លៃវប្បធម៌របស់ខេត្តបាត់ដំបង តាមរយៈអាហារប្រចាំតំបន់ ម៉ូតសម្លៀកបំពាក់ និងស្ថាបត្យកម្ម កសាងទំនាក់ទំនងរវាងកម្ពុជា និងថៃ ដើម្បីទទួលបានផលចំណេញក្នុងការអភិវឌ្ឍន៍វិស័យទេសចរណ៍ឆ្លងដែនដែលមានក្នុងគម្រោង «បទពិសោធន៍សិល្បៈវប្បធម៌ប៉ុបរបស់អាស៊ាន» ផងដែរ៕
Article by PAN SIVLY