Sovrin
Sovrin
ពិព័រណ៍រូបចម្លាក់ធ្វើពីគ្រឿងដែកចាស់ៗនិងកុលាលភាជន៍ប្លែកៗដែលកម្របានឃើញ
NEWS 5 years ago
គ្រឿងដែកចាស់ៗ គ្រឿងបន្លាស់ម៉ូតូ ខ្ចៅខ្ចងជាច្រើនត្រូវបានសិល្បករមួយរូបផ្សារផ្គុំចេញជារូបចម្លាក់ រូបសត្វ គួរឲ្យទាក់ទាញជាទីបំផុត។ ចំណែកឯកុលាលភាជន៍ចម្លែកៗជាច្រើនត្រូវបានបង្កើតឡើងដោយសិល្បករមួយរូបទៀតដែលមើលទៅគួរឲ្យទាក់ភ្នែកផងដែរ។ រូបចម្លាក់ផ្គុំពីគ្រឿងដែក និងកុលាលភាជន៍ចម្លែកនេះ ត្រូវបានគេដាក់តាំងក្នុងពិព័រណ៍សាធារណៈរួមមួយនៅឯវិទ្យាស្ថានភាសាបារាំង ចាប់ពីថ្ងៃទី ២០ ខែមិថុនា រហូតដល់ថ្ងៃទី ១០ ខែ សីហាឆ្នាំ ២០១៩នេះ ។
រូបចម្លែកធ្វើពីគ្រឿងដែកនេះគឺជាស្នាដៃរបស់សិល្បករ «អ៊ូ វណ្ណឌី» ដែលជាម្ចាស់ស្នាដៃដើម រូបក្របីព្រៃ ដែលគេដាក់បង្ហាញនៅ មុខខ្លោងទ្វារចូល វិទ្យាស្ថានបារាំងសព្វថ្ងៃនេះ។ ស្នាដៃរបស់ លោក អ៊ូ វណ្ណឌី ស្ដែងចេញតាមការផ្គុំសម្ភារដែលគេប្រើប្រាស់រួច ហើយលោកយកមកកែច្នៃឡើងវិញ ធ្វើជារូបចម្លាក់ ដែលពេលខ្លះមានទំហំធំ និងពិតជាទាក់ទាញភ្នែកយ៉ាងពិតប្រាកដ។
រីឯកុលាលភាជន៍ គឺជាស្នាដៃរបស់សិល្បករ «អ៊ុក សុជាធី» ដែលជាសិល្បករមួយរូបធ្លាប់ទទួលបានសញ្ញាប័ត្របណ្ឌិតសភាសិល្បៈក្រុងហាងចូវ ប្រទេសចិន។ កុលាលភាជន៍នេះត្រូវបានលោក អ៊ុក សុជាធី ស្រាវជ្រាវនិងកែច្នៃបង្កើតថ្មីបង្កប់នូវអត្ថន័យប្រកបដោយសិល្បៈនិយមជាទីបំផុត។ ចាន ពែង រូបផ្ការំដួល និងពាងថូ ជាច្រើនស្រដៀងនឹងវត្ថុបុរាណ ត្រូវបានលោក អ៊ុកសុជាធី បានបង្កប់នូវអត្ថន័យ នៃភាពស្ងប់ស្ងាត់យកលំនាំតាមរបៀបវិបស្សនា ភាពច្នៃប្រឌិត តាមបែបព្រះពុទ្ធសាសនា។ កុលាលភាជន៍ទាំងអស់នេះ ធ្វើឡើងពីវត្ថុធាតុដើម សេរាមិចដែលបញ្ចូលសេចក្តីស្រលាញ់របស់លោកដែលចូលចិត្តនូវវិស័យមួយនេះទៀតផង៕
Article by KEO SONG
