ជំងឺគ្រុនឈាមនៅតែផ្ទុះខ្លាំងដដែលបើទោះបីជាមានការអប់រំយ៉ាងណាក៏ដោយ
TRAVEL & LIVING 5 years ago ជំងឺគ្រុនឈាមនៅតែកើតមានច្រើនមកលើកុមារកម្ពុជាដដែល បើទោះបីជាមានការផ្សព្វផ្សាយអប់រំយ៉ាងណាក៏ដោយ។ បើតាមទិន្នន័យប្រចាំថ្ងៃចន្ទ ទី១៧ ខែមិថុនា ឆ្នាំ២០១៩ របស់មូលនិធិគន្ធបុប្ផាដែលបានបង្ហោះផ្សព្វផ្សាយនៅលើទំព័រហ្វេសប៊ុកផ្លូវការរបស់ខ្លួនបានឲ្យដឹងថា «កុមារមានជំងឺចំនួន ៤ ៣០៥ នាក់ ត្រូវបានពិនិត្យ និងព្យាបាលនៅក្នុងផ្នែកពិគ្រោះជំងឺក្រៅ និងកុមារមានជំងឺធ្ងន់ៗចំនួន ២៩៩០នាក់ កំពុងសម្រាកព្យាបាលនៅក្នុងមន្ទីរពេទ្យគន្ធបុប្ផា។ ក្នុងចំណោមកុមារទាំងនោះ មាន ៥៧៧នាក់ ត្រូវបានរកឃើញថាមានជំងឺគ្រុនឈាមធ្ងន់ធ្ងរ កំពុងសម្រាកព្យាបាលនៅក្នុងមន្ទីរពេទ្យគន្ធបុប្ផា និង ៨៩ នាក់ ត្រូវបានវះកាត់។» ជាសាររំឭកដាស់តឿន មូលនិធិក៏បានអំពាវនាវឲ្យប្រជាពលរដ្ឋកម្ពុជា មេត្តាចូលរួមប្រុងប្រយ័ត្ន និងចូលរួមទប់ស្កាត់ជំងឺគ្រុនឈាមតាមរយៈការការពារកុមារកុំឲ្យមូសខ្លាខាំ។ អ្នកជំនាញ និងវេជ្ជបណ្ឌិតជាច្រើនបានណែនាំ ឲ្យប្រជាពលរដ្ឋទាំងអស់សូមមេត្តាជួយគ្នា លុបបំបាត់នូវជម្រកមូសខ្លា ដែលជាទូទៅគឺជាកន្លែងដែលមានទឹកដក់ ហើយក៏សូមឲ្យប្រជាពលរដ្ឋទាំងអស់មេត្តា យកសំបកកង់ម៉ូតូឡាន សំបកដូងទៅកប់ចោល ក៏ដូចជាលុបទឹកដក់ដែលនៅជុំវិញផ្ទះផងដែរ។
ជាទូទៅគេបានដឹងថា ជំងឺគ្រុនឈាមភាគច្រើនកើតមានលើកុមារដែលមានអាយុក្រោម១៥ឆ្នាំ។ ជំងឺនេះឆ្លងតាមរយៈមូលខ្លាដែលមានផ្ទុកជម្ងឺនេះខាំហើយវាអាចធ្វើឲ្យអ្នកជំងឺមានអាការគ្រុនក្តៅខ្លាំង ឈឺជុំវិញរង្វង់ភ្នែក ឈឺសាច់ដុំ ឈឺពោះ ក្អក និងរាគជាដើម។ ប្រសិនបើអាការធ្ងន់ធ្ងរនោះវាអាចធ្វើឲ្យហូរឈាមចេញពីសរសៃឈាម ដែលបណ្តាលឲ្យអ្នកជំងឺក្អួតចេញឈាមរហូតដល់ស្លាប់ប្រសិនបើមិនមានការព្យាបាលទាន់ពេលវេលាទេនោះ៕