ទៅលេងក្រចេះ! កុំភ្លេចឆៀងចូលសង្កាត់កោះទ្រង់ដែលជាសហគមន៍ទេសចរណ៍ដ៏មានសក្តានុពល
TRAVEL & LIVING 4 years ago« រំដួលក្រចេះ អូនដុះឆ្ងាយក្រុង បេះដូងបងលង់ សម្រស់ផូរផង់ប្រិមប្រិយ....» ជាមរតកសំនៀងដ៏លន្លង់លន្លោចក្រោមទឹកដមសំឡេងរបស់លោក កែវ សារ៉ាត់ ដែលបានបញ្ចេញសូរសៀង ច្រៀងរៀបរាប់ពីកុលាបមួយទង ដែលរីកលាក់ខ្លួននៅលើទឹកដីនៃខេត្តក្រចេះ។ បើយើងធ្វើដំណើរពីរាជធានីភ្នំពេញ ទៅកាន់ខេត្តនៃភូមិភាគឦសាននៃប្រទេសមួយនេះ គឺមានប្រវែង៣១៥ គីឡូម៉ែត្រ តាមបណ្តោយផ្លូវជាតិលេខ០៧ និងលេខ១៣ ដែលនេះអាចនិយាយបានថា វាជាទឹកដីមួយដែលស្ថិតនៅឆ្ងាយពីទីក្រុង ត្រូវប្រើរយៈពេលយូរម៉ោងទម្រាំតែទៅដល់ ប៉ុន្តែប្រសិនបើយើងដាក់ចិត្តដោយមនោសញ្ចេតនាទៅលើសម្រស់នៃទឹកដីក្រចេះនេះ នោះយើងហាក់ដូចជាមានអារម្មណ៍ថា ក្រចេះនៅជិតបង្កើយ នៅជាប់នឹងក្រអៅបេះដូង ដូចដែលសំនៀងលោក កែវ សារ៉ាត់ បង្ហើរចុងក្រោយឡើងថា ក្រចេះ ភ្នំពេញ វិលវិញមិនឆ្ងាយ ។ ជាការពិតណាស់ ក្រចេះ ជាខេត្តដែលសម្បូរទៅដោយសម្បត្តិវប្បធម៌ ប្រវត្តិសាស្ត្រ ធនធានធម្មជាតិ និងតំបន់ទេសចរណ៍ជាច្រើនកន្លែងដែលជាឱសថព្យាបាលអារម្មណ៍ភ្ញៀវដែលបានទៅកម្សាន្តនៅទីនោះ ឲ្យធូរស្បើយពីភាពតានតឹង នាថ្ងៃចុងសប្តាហ៍។ ក្នុងនោះ តំបន់កម្សាន្តក៏ដូចជាបណ្តុំនៃរមណីយដ្ឋានជាច្រើនកន្លែង ដែលរួមមានដូចជា ព្រែកកាំពី អន្លង់ផ្សោត ភ្នំសំបុក ភ្នំសុពណ៌កាឡី កោះទ្រង់ និងវិហារសសរមួយរយ ដែលជាអារាមប្រវត្តិសាស្ត្រស្ថិតនៅក្នុងស្រុកសំបូរជាដើម គឺសុទ្ធតែជាគោលដៅទេសចរណ៍ដ៏មានប្រជាប្រិយភាព ក្នុងចំណោមរមណីយដ្ឋានដទៃទៀតទាំង ១៦ នៃដែនដីដែលផ្សារភ្ជាប់ខ្លួនទៅនឹងគង្គាទន្លេមេគង្គនេះតែម្តង។ ជាទូទៅ ភ្ញៀវទេសចរជាច្រើន ដែលបានចូលទៅទស្សនាតាមរមណីយដ្ឋាននានានៅលើទឹកដីខេត្តក្រចេះហើយ តែងតែមិនភ្លេចឡើយ ជាមួយនឹងការឈាងចូលទៅភ្លក្សរសជាតិផ្លែក្រូចថ្លុង ដែលជាផល្លានុផលធម្មជាតិដ៏ល្បី និងទទួលបានការកោតសរសើរមិនដាច់ពីមាត់ឡើយ។ នោះគឺមានតែមួយគត់ ដែលស្ថិតនៅលើកោះទ្រង់ ដែលជាកោះមួយត្រូវបានប្រជាជនក៏ដូចជាភ្ញៀវទេសចរឧទ្ទេសនាមឲ្យថា ជាបេះដូងទេសចរណ៍ទាក់ទាញទីពីរ ប្រចាំខេត្ត បន្ទាប់ពីរមណីយដ្ឋានព្រែកកាំពីផងដែរ។
ដោយសង្កេតឃើញពីកំណើនភ្ញៀវទេសចរ ចេះតែកើនឡើងជាលំដាប់ ពោលគឺមានដល់ទៅជាង ១៨៧០០នាក់ក្នុងឆ្នាំ ២០១៨ ហើយកើនឡើងបន្ថែមទៀតក្នុងឆ្នាំ២០១៩ ដែលនេះជាការចាប់អារម្មណ៍មួយយ៉ាងខ្លាំង រហូតទាក់ទាញឲ្យក្រុមការងារ សូវរីន នាំគ្នាចំណាយពេលបន្ទាប់ពីហត់នឿយនឹងការងារមកធ្វើដំណើរកម្សាន្ត ហើយស្របពេលនេះដែរ យើងក៏សូមនាំអារម្មណ៍លោកអ្នកទៅកម្សាន្តសប្បាយនឹងដំណើរទេសចរណ៍បែបធម្មជាតិមួយនេះទៀតផង ក៏ដើម្បីផ្តិតយករូបភាព ក៏ដូចជាបណ្តែតចំណីចក្ខុទៅលើសោភ័ណភាព សម្រស់ដ៏ស្រស់ត្រកាលនៅលើទឹកដីសង្កាត់កោះទ្រង់នៃខេត្តក្រចេះនេះផងដែរ។
គ្រាន់តែចូលមកដល់ទឹកដីនៃខេត្តក្រចេះភ្លាម នៅតាមបណ្តោយផ្លូវឆ្ពោះទៅកាន់ទីរួមខេត្ត មិនឆ្ងាយប៉ុន្មានយើងឃើញ មានរូបសំណាកគ្រុឌ សំកាំងនៅលើបល្ល័ង្កមួយយ៉ាងធំ ដែលតំណាងឲ្យសភាវៈល្អ ភាពត្រជាក់ត្រជំ គ្រប់គ្រងគង្គា ព្រះពិរុណ និងព្រះអគ្គី នៅតាមដងទន្លេមេគង្គ។ បន្តមកទៀតនោះ យើងបន្តដំណើរដោយតម្រង់គោលដៅចម្បងគឺឆ្ពោះទៅកាន់កំពង់ផែលើ ដែលជាកំពង់ផែធំជាងគេរបស់ខេត្ត ដើម្បីធ្វើដំណើរឆ្លងកាត់ទន្លេតាមរយៈទូកចម្លង។ ខ្យល់បក់មកត្រសៀកៗ អមនឹងផ្ទៃនៃមាត់ច្រាំងទន្លេ ដែលក្រឡេកមើលទៅឃើញ ទូកចម្លងប្រហែលជា ៣ទៅ៤ទូក ត្រៀមខ្លួនត្រៀបត្រាទទួល មានទាំងប្រភេទទូកឈើ ទូកដែក និងមានសាឡាងផងដែរ ។ សម្រាប់សោហ៊ុយនៃតម្លៃធ្វើដំណើរទូកចម្លងនេះ យើងចំណាយត្រឹមតែ ១០០០រៀលប៉ុណ្ណោះ ក្នុងមួយនាក់ ហើយអាចអង្គុយលើទូកបណ្តើរ សម្លឹងទៅត្រើយម្ខាងនៃកោះទ្រង់បណ្តើរ ឃើញទៅដោយព្រៃឈើខៀវស្រងាត់លឹមៗ ដុះក្បែរនឹងឆ្នេរខ្សាច់ពណ៌មាសវែងអន្លាយ លាយឡំនឹងវាយោទន្លេបក់នាំយកភាពបរិសុទ្ធស្រស់ថ្លានៃធម្មជាតិ និងសរសៃទឹករលក ហាក់រុញច្រានទូកចម្លងអ្នកទេសចរឲ្យលឿនលយ ដើម្បីឆ្ពោះទៅដល់ដែនកោះឆាប់បំផុត។ បណ្តែតអារម្មណ៍លើផ្ទៃទឹកមិនទាន់បានប៉ុន្មានផង ភ្លេចខ្លួនប្រមាណប្រហែល ១៥នាទី យើងបានឆ្ពោះមកដល់ឆ្នេរខ្សាច់ដ៏ស្រស់ស្អាតដែលមានទិដ្ឋភាពប្រៀបបីដូចជាកោះឋានសួគ៌មួយនៅឯតំបន់សមុទ្រ។ ទូកចម្លងក៏រំកិលខ្លួនមកដល់មាត់ច្រាំងឆ្នេរខ្សាច់ពណ៌មាស មានរោងឈើប្រក់ម្លប់ស្បូវជាច្រើនសង់ជាជួរសម្រាប់ទទួលភ្ញៀវទេសចរអង្គុយលេង និងលើសពីនេះទៀត មានកន្លែងជិះទារទឹក និងកន្លែងជួលពោងផងដែរ។ លើសពីនេះទៀតនោះ ក្លិនដ៏ឈ្ងុយនៃ មាន់ដុត ត្រីដុត អន្ទង់ដុត ពីរោងលក់អាហារលើឆ្នេរខ្សាច់ ដែលកំពុងចម្អិនស្រស់ៗ ពិតជាមិនអាចអត់ទ្រាំនឹងមិនភ្លក្សរសជាតិបានឡើយ។ ទន្ទឹមនឹងនេះដែរ ដោយសារឆ្នេរខ្សាច់អំណោយផលលេងកម្សាន្តនៅពេលរសៀលជ្រេផងនោះ យើងក៏សម្រេចបន្តដំណើរឡើងទៅលេងភូមិនៅលើកោះជាមុនសិន ដើម្បីចង់ដឹងច្បាស់ថាតើមានអ្វីដែលពិសេសខ្លះដែលលាក់កំបាំងនៅលើកោះដ៏មានមន្តស្នេហ៍មួយនេះ។
គ្រាន់តែធ្វើដំណើរឡើងមកដល់មាត់ច្រាំងដីអ្នកភូមិភ្លាម យើងទទួលបានស្នាមញញឹមនៃការទទួលស្វាគមន៍រួមជាមួយភាពរួសរាយរាក់ទាក់របស់ប្រជាពលរដ្ឋរស់នៅលើទឹកដីសម្បូរដំណាំហូបផ្លែនេះ ឬអាចហៅម្យ៉ាងបានថា ជាដែនកោះផល្លាទៀតផង។ នៅផុតមាត់ច្រាំងបន្តិច ឃើញមានបដាឈើមួយផ្ទាំងដែលសរសេរជាខេមរៈភាសាថា « សហគមន៍ទេសចរណ៍សង្កាត់កោះទ្រង់» មានភ្ជាប់មកជាមួយឡូហ្គូស្លាកសញ្ញារូប ផ្លែក្រូចថ្លុង ដែលជាភោគផលដំណាំដ៏ល្បីល្បាញប្រចាំតំបន់ រួមទាំងមានបង្ហាញព័ត៌មានលម្អិតអំពីតម្លៃនៃការជ្រើសរើសមធ្យោបាយធ្វើដំណើរកម្សាន្តនៅលើកោះនេះផងដែរ។ តួយ៉ាង នៅមជ្ឈមណ្ឌលផ្តល់ព័ត៌មានក្បែរគ្នានេះដែរមានផ្តល់ជូននូវសេវាកម្មមធ្យោបាយធ្វើដំណើរកម្សាន្តផ្សេងៗគ្នា រីឯតម្លៃក៏អាស្រ័យទៅតាមយានជំនិះនីមួយៗ ក្នុងនោះតម្លៃទៀតសោត គឺគិតជួលសម្រាប់មួយថ្ងៃពេញ ដោយការ ជួលកង់មានតម្លៃ ១ឬ២ដុល្លារ ម៉ូតូឌុប ៥ដុល្លារ រទេះគោ ១៥ ដុល្លារ និង រទេះសេះ ១០ដុល្លារ។ ខណៈធ្វើដំណើរកម្សាន្តតាមខ្សែផ្លូវបេតុងសន្សឹមៗអមដោយម្លប់ឈើខៀវខ្ចី យើងសង្កេតឃើញថាផ្ទះប្រជាជននៅទីនេះភាគច្រើនសាងសង់ឡើងពីឈើ រចនាប័ទ្មផ្ទះបែបខ្មែរបុរាណជាហូរហែ មានដាំបន្លែបង្ការជាលក្ខណៈគ្រួសារ ដំណាំហូបផ្លែ ពិសេសគ្រួសារស្ទើរតែគ្រប់ផ្ទះសុទ្ធតែមានដាំក្រូចថ្លុងនៅជុំវិញបរិវេណផ្ទះរបស់ខ្លួន ដើម្បីជាការជំរុញដល់សេដ្ឋកិច្ចគ្រួសារផង និងទុកសម្រាប់បរិភោគប្រចាំគ្រួសារផងដែរ។ បើនិយាយពីដំណាំក្រូចថ្លុង អ្នកភូមិកោះទ្រង់បានបង្ហើបប្រាប់ថា ក្រូចថ្លុងរបស់កោះទ្រង់ គឺមានលក្ខណៈពិសេសបំផុត ឬអាចនិយាយបានថាមានរសជាតិឆ្ងាញ់ខុសប្លែកពី ក្រូចថ្លុងនៅតាមបណ្តាខេត្តដទៃដូចជា កំពង់ចាម ពោធិ៍សាត់ និងបាត់ដំបងជាដើម។ ដោយសារមានរសជាតិជូរអែមផ្អែមមុត សាច់ក្រមួតល្អ គ្មានជាតិហាង(ល្វីង) ម្យ៉ាងដាំឆ្ងាញ់តែលើទឹកដីកោះនេះទៀតនោះ ទើបក្រូចថ្លុងរបស់កោះទ្រង់ ត្រូវបានក្រសួងមហាផ្ទៃចុះបញ្ជីសម្គាល់ម៉ាកភូមិសាស្ត្រទំនិញរបស់ខ្លួនដែលជា ដំណាំក្រូចថ្លុងប្រចាំទឹកដី ដាំតាមបែបធម្មជាតិ និងគ្មានជាតិគីមី។ យើងក៏បានសាកល្បងភ្លក្សរសជាតិក្រូចថ្លុងបេះពីដើមផ្ទាល់នៅផ្ទះរបស់អ្នកភូមិផងដែរ ឃើញថាមានទឹកច្រើន រសជាតិផ្អែមឆ្ងាញ់ជាប់មាត់ដូចដែលគេល្បីតៗគ្នាពិតមែន។ ក្រូចមួយផ្លែមានទំហំធំគួរសម បើប្រមើលមើលទៅអាចមានទម្ងន់ជាងមួយគីឡូក្រាម ចំណែកឯតម្លៃវិញគឺត្រឹមតែ១០០០០រៀលប៉ុណ្ណោះក្នុងមួយផ្លែ។
ខណៈកំពុងស្លុងចិត្តនឹងសម្រស់ព្រៃព្រឹក្សា ពិសេសថែមទាំងបានពិសាផ្លែឈើឆ្ងាញ់ប្រចាំតំបន់ទៀតនោះ យើងបានបន្តដំណើរមកដល់អាហារដ្ឋានមួយកន្លែងនៅក្បែរផ្ទះអ្នកភូមិស្របចំពេលអាហារថ្ងៃត្រង់តែម្តង។ បើតាមម្ចាស់អាហារដ្ឋាន បានរៀបរាប់ឲ្យដឹងថា នៅលើកោះនេះមានអាហារដ្ឋានចំនួន ៤កន្លែង មានបម្រើម្ហូបកុម្មង់ បាយឆា មីឆា និងភេស្ជជៈតែកាហ្វេគ្រប់ប្រភេទ ហេតុដូច្នេះភ្ញៀវដែលមកកម្សាន្តនៅលើកោះនេះ មិនចាំបាច់ព្រួយបារម្ភចំពោះការស្វែងរកកន្លែងសម្រាប់ទទួលទានពេលធ្វើដំណើរកម្សាន្តឡើយ។ ក្រោយពីទទួលទានអាហារក្រោមម្លប់ឈើត្រជាក់ល្ហឹម និងឆ្លៀតសម្រាកស្រូបយកខ្យល់អាកាសមួយស្រឡេត យើងបានបន្តទៅទស្សនាកន្លែងដាំដើមឈើ ដែលទីនេះមានដើមឈើច្រើនប្រភេទ ដើមឈើទាំងអស់សុទ្ធតែត្រូវបានដាំដោយភ្ញៀវទេសចរជាតិ និងអន្តរជាតិ ហើយយើងសម្គាល់ឃើញកូនឈើច្រើនជាងគេគឺ ដើមគគី និងឈើទាល។ រសៀលរាងជ្រេបន្តិចកម្តៅថ្ងៃចាប់ផ្តើមថមថយអង្សា ដែលក្រើនរំឭកឲ្យដឹងថា ពេលវេលាអំណោយផលទៅសម្រាកលម្ហែនៅលើឆ្នេរខ្សាច់ និងហែលទឹកទន្លេដ៏ត្រជាក់បានយាងចូលមកដល់ហើយ។ ឈាងដំណើរតាមផ្លូវអ្នកភូមិត្រឡប់មកកាន់មជ្ឈមណ្ឌលផ្តល់ព័ត៌មានវិញ យើងចាប់អារម្មណ៍ថានៅទីនេះក៏មានវត្តអារាម សាលារៀន និងមានផ្ទះស្នាក់បែបអ្នកភូមិ (Home Stay) ដល់ទៅ៧ និងមានរីសតមួយដ៏ប្រណីតគឺ យ៉ារ៉ាបូរី វីឡា សម្រាប់ភ្ញៀវទេសចរស្នាក់នៅលើកោះនេះផងដែរ។ អ្វីដែលសំខាន់ថ្លៃជួលស្នាក់នៅគឺសមរម្យបំផុត ហើយភ្ញៀវអាចជ្រើសរើសស្នាក់នៅកម្សាន្តទៅតាមប្រភេទនៃកន្លែងស្នាក់ទាំងអស់នោះបាន ដោយសុវត្ថិភាព និងមានផាសុកភាពពីធម្មជាតិដែលនៅជុំវិញទីនោះ។
បន្ទាប់ពីធ្វើដំណើរកម្សាន្តនៅលើផ្ទៃកោះទាំងមូល ក៏ដូចជាថតរូបលេងជាមួយនឹងក្រុមការងាររួចហើយនោះ យើងក៏នឹងត្រឡប់មកដល់ឆ្នេរខ្សាច់ដ៏ស្រស់ស្អាតវិញ ក្រោមពន្លឺព្រះសូរិយាកាន់តែរសៀលជ្រាលជ្រេបន្តិចម្តងៗ ។ យើងឃើញភ្ញៀវទេសចរសម្រុកឆ្លងទូកចូលមកកម្សាន្តកាន់តែច្រើនឡើង មានអ្នកខ្លះមកកម្សាន្តជាលក្ខណៈមិត្តភ័ក្តិ ខ្លះជាគូស្នេហ៍ រីឯខ្លះទៀតជាលក្ខណៈក្រុមគ្រួសារ។ ភ្ញៀវទេសចរណ៍ភាគច្រើនមានការវេចខ្ចប់នូវម្ហូបអាហារមកចម្អិនផ្ទាល់នៅលើកោះ ចំណែកភ្ញៀវមិនបានត្រៀមម្ហូបអាហារមកជាមួយក៏ដើរទិញហូរហែតាមរោងលក់អាហារនៅលើឆ្នេរខ្សាច់ មានទាំងម្ហូបបែបកុម្មង់ និងគ្រឿងអាំងស្រស់ៗ និងបន្លែស្រស់ ដែលសុទ្ធតែរកបានមកពីការនេសាទ ចិញ្ចឹម និងដាំដុះតាមបែបធម្មជាតិសុទ្ធសាធរបស់អ្នកភូមិ។ យើងបានជួលរោងឈើប្រក់ស្បូវមួយសម្រាប់អង្គុយកម្សាន្តដោយចំណាយត្រឹមតែ ១០០០០រៀល។ ខ្យល់ត្រជាក់បក់មកប៉ះនឹងរាងកាយរបស់យើង ដែលកំពុងតែគេងយោលអង្រឹងទៅមកៗ ភ្នែករំពៃទៅត្រើយម្ខាងនៃទន្លេ ឃើញទៅដោយរុក្ខជាតិតូចធំដុះអបតាមបណ្តោយច្រាំង លាយឡំទឹកទន្លេចាំងភ្លឺផ្លេកពណ៌មាសពីរស្មីព្រះអាទិត្យនាជិតអស្តង្គត។ អារម្មណ៍បែបនេះ អាចឲ្យយើងដឹងបានកាន់តែច្បាស់ថា ក្រចេះគឺជាដែនដីមួយមានរូបឆោមស្រស់ និងមានមនុ្តស្នេហ៍ទាក់ទាញមិនចាញ់ខេត្តដទៃប៉ុន្មានឡើយ។ ខណៈពេលនេះ បើទោះបីជាយើងកំពុងតែបណ្តែតចិត្តនៅលើផ្ទៃទឹកដ៏រ៉ូម៉ែនទិកយ៉ាងណា ក៏វាមិនមែនជាលក្ខណៈស្ងប់ស្ងាត់នោះដែរ គឺមានការលាយឡំនឹងសំណើចក្អាកក្អាយខ្ញៀវខ្ញារ ជួបជុំទទួលទានអាហារយ៉ាងឈ្ងុយឆ្ងាញ់ ថែមទាំងបានងូតទឹកទន្លេមេគង្គដ៏ត្រជាត់ ពិតជាបង្កឲ្យបរិយាកាសពោរពេញទៅដោយភាពសប្បាយរីករាយ និងបង្កើតជាអនុស្សាវរីយ៍អស្ចារ្យមួយមិនអាចបំភ្លេចបាន។ នៅទីនេះ ក្រៅពីកម្សាន្តអង្គុយទទួលទានអាហារឈ្ងុយឆ្ងាញ់ និងហែលទឹកលេង ភ្ញៀវទេសចរក៏អាចជួលទូកធ្វើដំណើរជុំវិញកោះដើម្បីទស្សនាទិដ្ឋភាពព្រៃឈើ ស្ថានភាពរស់នៅរបស់ប្រជាជន ការដាំដុះបន្លែបង្ការនៅត្រើយខាងលិច និងមើលបងប្អូនប្រជាកសិករនេសាទជាដើម។
គួរបញ្ជាក់ផងដែរថា សង្កាត់កោះទ្រង់ គឺជាសហគមន៍ទេសចរណ៍ធម្មជាតិ ដែលបានបង្កើតឡើង កាលពីថ្ងៃទី២៥ ខែឧសភា ឆ្នាំ២០០៨ បើគិតមកទល់ពេលបច្ចុប្បន្នមានរយៈ ១២ឆ្នាំមកហើយ។ កោះរាងតូចច្រឡឹងនេះមានផ្ទៃដីទំហំសរុប ២២៣ហិកតា និងមានបែងចែកជាពីរភូមិគឺ ភូមិក្បាលកោះ និងភូមិចុងកោះ ចំណែកឆ្នេរខ្សាច់តាមបណ្តោយច្រាំងកោះមានប្រវែងរហូតដល់ទៅ ៦គីឡូម៉ែត្រកន្លះ និងប្រវែងពីច្រាំងមកដល់ទន្លេគឺ ជិតមួយគីឡូម៉ែត្រ។ សម្រាប់ប្រជាជនរស់នៅលើកោះទ្រង់មានប្រមាណ ៤២៤គ្រួសារ ប្រជាជនស្ទើរតែ ៩០ភាគរយប្រកបរបរដំណាំដាំដុះបន្លែបង្ការសម្រាប់ចិញ្ចឹមជីវិតជាជាងធ្វើស្រែចម្ការដែលទាមទារផ្ទៃដីធំទូលាយ តួយ៉ាងដំណាំសំខាន់ៗមានដូចជា ស្ពៃ សណ្តែក ត្រសក់ ប៉េងបោះ និងននោង ជាដើម ដែលសំខាន់ដំណាំហូបផ្លែដ៏ផ្អែមឆ្ងាញ់ប្រចាំទឹកដីនោះគឺ ក្រូចថ្លុង។ បើតាមលោក អ៊ុំ ប៊ុន បាន ជាប្រធានសហគមន៍បានមានប្រសាសន៍ឲ្យដឹងថា សង្កាត់កោះទ្រង់ មានភ្ញៀវទេសចរមកកម្សាន្តច្រើនបំផុតគឺចាប់ពីខែវិច្ឆិកា ដល់ខែឧសភា ដែលចន្លោះខែនេះគឺជារដូវទឹកទន្លេចាប់ផ្តើមស្រក ភ្ញៀវចូលចិត្តមកកម្សាន្តនៅលើឆ្នេរខ្សាច់ និងហែលទឹកទន្លេមេគង្គ ម្យ៉ាងរដូវបុណ្យទានក៏ចាប់ផ្តើមនៅអំឡុងខែនេះផងដែរ។ ជាចុងក្រោយនៃដំណើរកម្សាន្តស្ទើរពេញមួយថ្ងៃនេះ គឺទទួលបាននូវភាពសប្បាយរីករាយ និងមិនអាចបំភ្លេចបានឡើយជាមួយនឹងអនុស្សាវរីយ៍បែបធម្មជាតិនៅលើទឹកដីកោះដ៏ស្រស់ស្អាតមួយនេះ ហើយក៏ជាពេលវេលាសមល្មមមួយ វិលត្រឡប់មកកាន់កំពង់ផែចម្លងទូកវិញ ដើម្បីឆ្ពោះទៅកាន់ទឹកដីនៃក្រុងក្រចេះ។ ដោយហេតុថា មេឃកាន់តែបង្អុរចុះនូវស្បៃអន្ធកាបន្តិចម្តងៗហើយនោះ យើងក៏អាចស្វែងរកសណ្ឋាគារ ឬផ្ទះសំណាក់ស្អាតៗ ដែលមាននៅក្នុងក្រុង ដើម្បីបានសម្រាកបន្ទាប់ពីចំណាយកម្លាំងពេញមួយថ្ងៃនៅលើកោះ ហើយយ៉ាងណាមិញ ដល់ព្រឹកព្រលឹមសឹមបន្តដំណើរទៅរាជធានីភ្នំពេញវិញដោយសុវត្ថិភាព៕
Article by HEM SOKKHIM