Sovrin
Sovrin
លោក ចោម មួយ ពីក្មេងនេសាទក្លាយជាអ្នកច្នៃម៉ូដល្បីឈ្មោះនៅខេត្តសៀមរាប
NEWS 4 years ago
«MUOY CHORM» គឺជាស្លាកយីហោសម្លៀកបំពាក់ដ៏មានប្រជាប្រិយភាពមួយនៅលើទឹកដីខេត្តសៀមរាបដែលត្រូវបានបង្កើតឡើងដោយអ្នកច្នៃម៉ូដកូនខ្មែរមួយរូបគឺ លោក ចោម មួយ ដែលមានប្រវត្តិចេញមកពីក្មេងនេសាទនៅឯភូមិលិចទឹក ឃុំកំពង់ឃ្លាំង ស្រុកសូទ្រនិគម ខេត្តសៀមរាប។ ក៏ព្រោះជាក្មេងធំធាត់លើទឹកដីស្រុកស្រែចម្ការនេះហើយ ស្ថាបនិកស្លាកយីហោជាតិសម្បុរស្រអែមស្រស់រូបនេះតែងប្រមែប្រមូលទិដ្ឋភាពកាលពីអតីតកាលទាំងប៉ុន្មានមកឆ្លុះបញ្ចាំងក៏ដូចជាបង្កើតគំនិតច្នៃប្រតិដ្ឋទៅលើខូឡិកហ្សិនសម្លៀកបំពាក់របស់ខ្លួនរៀងរាល់រដូវកាលដែលទទួលបានការចាប់អារម្មណ៍ខ្លាំងពីសំណាក់ភ្ញៀវអន្តរជាតិ ហើយជារឿយៗលោកក៏ត្រូវបានគេអញ្ជើញទៅបង្ហាញស្នាដៃក្នុងកម្មវិធីធំៗនៅក្រៅប្រទេស ជាពិសេសមានទាំងប៉ែកអឺរ៉ុបទៀតផង។
មុនស្លាកយីហោ MUOY CHORM លេចរូបរាងជាមួយនឹងប៊ូទិកផ្ទាល់ខ្លួន លោក ចោម មួយ បានរៀបរាប់អំពីប្រវត្តិតស៊ូរបស់លោកមកកាន់សូវរីនដែរថា លោកកើតនៅក្នុងគ្រួសារក្រីក្រដែលប្រកបរបរជាកសិករនិងនេសាទ។ លោក ចោម មួយ មានបងប្អូនចំនួន៧នាក់(ស្រី៤ប្រុស៣)លោកជាកូនពៅ។ ចាប់កំណើតនៅភូមិលិចទឹកដែលរស់នៅលើតំបន់ទឹកម្ខាងដីម្ខាង ចោម មួយ បានក្លាយជាក្មេងនេសាទតាំងតែពីអាយុ៦ឆ្នាំ ដោយរៀងរាល់វស្សានរដូវទឹកជន់កុមារារូបនេះតែងចេញទូកទៅរកកំពឹសជាមួយបងប្រុសនៅតាមដងទន្លេសាប ហើយឈានមកដល់រដូវប្រាំងក៏មកជួយធ្វើស្រែចម្ការឪពុកម្តាយផងដែរ។ រៀនបណ្តើរធ្វើការទាំងវ័យក្មេងបណ្តើរដោយក្នុងស្រុកភូមិមានកម្រិតអប់រំត្រឹមថ្នាក់ទី៦ ដូច្នេះនៅពេលរៀនចប់ ចោម មួយ បានឡើងមករៀនបន្តកម្រិតធម្យមសិក្សាបឋមភូមិនៅឯទីរួមស្រុកដោយស្នាក់នៅជាមួយម្តាយមីង។ សិក្សាបានរយៈពេលពីរឆ្នាំដោយហេតុកត្តាជីវភាព និងឆ្ងាយពីផ្ទះផងនោះ ចោម មួយ បានសម្រេចចិត្តបោះបង់ការសិក្សាមកជួយការងារឪពុកម្តាយនៅឯស្រុកកំណើតវិញ។ ស្ថិតក្នុងវ័យជំទង់ ចោម មួយ ប្រកបរបរជាអ្នករត់ទូកផង និងធ្វើស្រែចម្ការផងរហូតដល់ឆ្នាំ ២០១១។ លោក ចោម មួយ បានប្រាប់ថាគ្រានៅស្រុកក្នុងវ័យជំទង់ឲ្យតែពេលមានកម្មវិធីម្តងៗលោកចូលចិត្តស្លៀកពាក់ប្លែកពីគេ ពោលលោកតែងគូរគំរូម៉ូដសម្លៀកបំពាក់រួចយកទៅឲ្យបងស្រីរបស់ខ្លួនដែលជាជាងកាត់ដេរបើកតូបតូចមួយនៅក្នុងភូមិផងនោះច្នៃកាត់តាមចំណង់ចំណូលចិត្តរបស់លោកជានិច្ច។ លោកថា “ ការច្នៃម៉ូដអាចជាចំណង់ចំណូលចិត្តរបស់ខ្ញុំ ខ្ញុំចូលចិត្តស្លៀកពាក់ប្លែកៗទៅកម្មវិធី ខ្ញុំមានក្តីស្រមៃផ្ទាល់ខ្លួនទាក់ទងនឹងការច្នៃម៉ូដ ប៉ុន្តែកាលនោះបានត្រឹមតែគិតមិនដែលរំពឹងថាអាចកើតឡើងឬអាចទៅរួចឡើយ ព្រោះគ្រួសារយើងគ្មានលទ្ធភាពម្យ៉ាងអ្នកស្រុកភូមិទម្លាប់រស់នៅធ្វើរបរដដែលៗតតគ្នាពីមួយជំនាន់ទៅមួយជំនាន់”។
ក្រោយត្រឡប់មកស្រុកកំណើតបានពីរឆ្នាំ យុវជន ចោម មួយ ដែលមានមហិច្ឆិតាលើការច្នៃម៉ូដបានឡើងមកខេត្តសៀមរាបស្នាក់នៅជាមួយបងប្រុសបង្កើតដើម្បីសិក្សាភាសាអង់គ្លេស។ ថ្វីដ្បិតឡើងមករៀននៅខេត្តក្តីប៉ុន្តែលោកមិនដែលចោលគ្រួសារឡើយដោយរៀងរាល់រដូវទឹកស្រកលោកតែងត្រឡប់ទៅស្រុកកំណើតជួយសម្រួលការងារធ្វើស្រែចម្ការរបស់ឪពុកម្តាយ។ នៅក្នុងឆ្នាំ២០១២ លោកបានចូលរួមក្នុងកម្មវិធីហ្វេហ្សិនមួយដែលប្រមូលផ្តុំទៅដោយអ្នកច្នៃម៉ូដទាំងជនជាតិខ្មែរនិងបរទេស ជាសំណាងល្អលោកមានឱកាសបានស្គាល់អ្នកច្នៃម៉ូដបរទេសល្បីឈ្មោះម្នាក់ អ្នកច្នៃម៉ូដបរទេសរូបនេះហើយដែលបានដឹងពីចំណង់ចំណូលចិត្តរបស់ ចោម មួយ ហើយក៏បានផ្តល់ឱកាសឲ្យយុវជនស្រឡាញ់ការស្លៀកពាក់ប្លែកៗមកពីស្រុកស្រែចម្ការនេះបានប្រឡូកការងារជាជំនួយការអ្នកច្នៃម៉ូដលើកដំបូងបំផុតនៅក្នុងឧស្សាហកម្មហ្វេហ្សិន។ ជាជំនួយការរៀបចំពុម្ពសម្លៀកបំពាក់កំឡុងរយៈពេលប្រមាណជាងបីឆ្នាំ ចោម មួយ បានព្យាយាមស្វែងយល់និងរៀនគ្រប់យ៉ាងពីការច្នៃម៉ូដ តិចនិចនៃការដេរ រួមទាំងសង្វាក់ផលិតកម្មសព្វគ្រប់រហូតមានឱកាសបានបញ្ចេញខូឡិកហ្សិនពីគំនិតច្នៃប្រតិដ្ឋរបស់ខ្លួនផ្ទាល់ទៀតផង។ កាលនោះយុវជនមកពីភូមិលិចទឹកក៏បានគិតដែរថាប្រសិនបើធ្វើការឲ្យគេ ៥ឆ្នាំ ១០ឆ្នាំ ឬទៅ១៥ឆ្នាំទៀត ខ្លួនក៏នៅតែជាជំនួយការគេដដែល ហេតុដូច្នេះខណៈគិតថាខ្លួនមានលទ្ធភាពគ្រប់គ្រាន់និងយល់ដឹងអំពីសង្វាក់ផលិតកម្មអស់ហើយ ក៏បានសម្រេចចិត្តថាងាកមកធ្វើជាអ្នកច្នៃម៉ូដឯករាជ្យវិញនិងបានបង្កើតស្លាកយីហោផ្ទាល់ខ្លួនឈ្មោះថា MUOY CHORM កាលពីថ្ងៃទី១១ខែមេសាឆ្នាំ ២០១៦មកដល់សព្វថ្ងៃ។
ជាអ្នកច្នៃម៉ូដឯករាជ្យនិងបង្កើតស្លាកយីហោលើទឹកដីអង្គរមែនពិត តែបើនិយាយអំពីការចេញម៉ូដទំនោរនិយមតាមរដូវកាលលោក ចោម មួយ ធ្វើមិនឲ្យចាញ់កម្មវិធីហ្វេហ្សិន Runway របស់ម៉ាកអន្តរជាតិល្បីៗនៅឯក្រៅប្រទេសប៉ុន្មានឡើយ។ លោកបានប្រាប់ដែរថាជារៀងរាល់ឆ្នាំលោកតែងរៀបចំកម្មវិធីបង្ហាញម៉ូដបញ្ចេញខូឡិកហ្សិនរបស់ខ្លួនពីរលើកគឺសម្រាប់ និទាឃរដូវនិងរដូវក្តៅ(Spring/Summer) និង រដូវស្លឹកឈើជ្រុះនិងរដូវត្រជាក់(Fall/Winter) ព្រមទាំងមានកម្មវិធីបង្ហាញស្នាដៃច្នៃម៉ូដប្លែកៗតូចធំសរុបមិនក្រោមបីទៅបួនដងឡើយក្នុងមួយឆ្នាំ។ ចំពោះគំនិតច្នៃម៉ូដផ្ទាល់ខ្លួនលោក ចោម មួយ បានបង្ហើបដែរថា “ ដោយសារតែខ្ញុំធំធាត់នៅជនបទ បើភ្នែកឡើងឃើញធម្មជាតិពណ៌ខៀវខ្ចីផ្កាចម្រុះពណ៌ដូច្នេះខ្ញុំតែងយករូបភាពទិដ្ឋភាពកាលពីអតីតកាលទាំងប៉ុន្មានមកបញ្ចូលក្នុងការឌីហ្សាញជានិច្ច។ ដូចឃើញជាក់ស្តែងនៅក្នុងខូឡិកហ្សិនសម្លៀកបំពាក់របស់ខ្ញុំភាគច្រើនគឺសុទ្ធសឹងតែមានពណ៌ចម្រុះ”។ លោកបន្ថែមទៀតថា ពេលច្នៃខូឡិកហ្សិននីមួយៗលោកចូលចិត្តប្រើអារម្មណ៍ខ្លាំង និងចូលចិត្តមាន Storyឬដំណើររឿងនៅពីក្រោយខូឡិកហ្សិននោះ ឧទាហរណ៍ដូចជាខូឡិកហ្សិន Firework ឬកាំជ្រួច គឺជាការពណ៌នាទាក់ទងនឹងពិធីបុណ្យអុំទូកដែលលោកបានធ្វើកាលពីពេលកន្លងទៅជាដើម។
រយៈពេលប្រឡូកក្នុងវិស័យច្នៃម៉ូដប្រមាណជាងកន្លះទសវត្សរ៍ ខូឡិកហ្សិនម៉ាក MUOY CHORM ហាក់មានទីផ្សារពីបណ្តាភ្ញៀវអន្តរជាតិជាច្រើនដែលចូលមកទេសចរណ៍លើទឹកដីអង្គរ ភាគច្រើនជាជនជាតិអូស្ត្រាលីនិងអាល្លឺម៉ង់។ កាលពីឆ្នាំ២០១៦ លោកត្រូវបានគេជ្រើសរើសជាអ្នកច្នៃម៉ូដតំណាងឲ្យកម្ពុជាទៅចូលរួមកម្មវិធីដ៏ធំគឺ ASEAN Pop Culture ធ្វើឡើងនៅខេត្តឈៀងមៃប្រទេសថៃដែលក្នុងនោះលោកបានពាំនាំឈុតច្នៃឡើងពីសំណាញ់ត្រីដែលឆ្លុះបញ្ចាំងពីជីវិតកាលពីកុមារភាពរបស់លោកផងដែរ។ ក្រៅពីបានចេញទៅបង្ហាញខូឡិកហ្សិននៅឯប្រទេសថៃជាពីរបីលើក និងកម្មវិធីក្នុងស្រុកច្រើនរាប់មិនអស់ កន្លងមកក៏មានកម្មវិធីធំៗលំដាប់អន្តរជាតិចាប់អារម្មណ៍អញ្ជើញលោកទៅចូលរួមបង្ហាញស្នាដៃផងដែរ ក្នុងនោះរួមមានកម្មវិធីធ្វើនៅ ប៉ារីស សាន់ហ្វ្រាន់ស៊ីស្កូ ឥណ្ឌា ឡាវ និងវៀតណាមជាដើម។
ទន្ទឹមរីកមុខរីកមាត់លើវិស័យច្នៃម៉ូដមកដល់បច្ចុប្បន្ន កន្លងមក លោក ចោម មួយ ក៏បានជួបនូវផលវិបាកសមគួរផងដែរ។ លោកលើកឡើងថា“ពិបាកមែនទែន មិនថាតែពីមុនទេសូម្បីតែឥឡូវក៏ពិបាកដែរ ដ្បិតបច្ចុប្បន្នវិស័យហ្វេហ្សិននៅកម្ពុជាមានការរីកចម្រើន ប៉ុន្តែភាគច្រើនការទទួលស្គាល់នៅទីក្រុងភ្នំពេញមានច្រើនជាងនៅសៀមរាប ព្រោះតាំងពីបើកមកភ្ញៀវខ្មែរយើងមួយចំនួនធំគាត់នៅមិនទាន់យល់នៅឡើយរវាងអ្នកច្នៃម៉ូដ និងជាងកាត់ដេរ។ ទោះយ៉ាងណាខ្ញុំនៅតែប្រកាន់ខ្ជាប់ថាប្រសិនបើភ្ញៀវចង់បានសម្លៀកបំពាក់ពីកន្លែងខ្ញុំទាល់តែអ្វីៗខ្ញុំជាអ្នកច្នៃ ជាអ្នកធ្វើ និងប្រើវត្ថុធាតុដើមលើខ្ញុំទាំងអស់”។ លោកបានលើកឡើងទៀតថាការបើកនៅសៀមរាបបើមិនមានភ្ញៀវទេសចរបរទេសនោះទេគឺសូន្យតែម្តង។
តាមរយៈបទពិសោធន៍កន្លងមក លោក ចោម មួយ បានបង្ហាញទស្សនៈដូចនេះ “ការក្លាយជាអ្នកច្នៃម៉ូដខ្លាំងមួយរូបគប្បីទាមទារភាពជឿជាក់លើខ្លួនឯងខ្ពស់ ត្រូវដឹងពីចំណុចសំខាន់អ្វីមួយដែលបង្ហាញទៅកាន់អតិថិជន មានភាពច្នៃប្រតិដ្ឋ និងយល់ពីអតិថិជនថាគាត់ចង់បានអ្វីដើម្បីកត់ត្រាយកមកបូករួមគ្នាជាមួយគំនិតផ្ទាល់ខ្លួន”។ បច្ចុប្បន្ន លោក ចោម មួយ មានប៊ូទិកដាក់លក់ខូឡិកហ្សិនរបស់ខ្លួនដែលមានទីតាំងនៅម្តុំផ្សារចាស់ខេត្តសៀមរាប។ លោកបានកំពុងត្រៀមគម្រោងរៀបចំកម្មវិធីជាច្រើនដើម្បីចាប់ផ្តើមនៅក្រោយពេលស្ថានការណ៍នៃការរាតត្បាតវីរុសកូវីដ១៩ត្រូវបានបញ្ចប់ ហើយតាមរយៈសូវរីនលោកបានផ្តាំផ្ញើដែរថា សម្រាប់ប្អូនៗចង់ប្រឡូកឬចាប់អាជីពជាអ្នកច្នៃម៉ូដគួរមានភាពជឿជាក់លើខ្លួនឯង ស្គាល់ខ្លួនឯងឲ្យច្បាស់ និងផ្តើមចេញពីខ្លួនយើងថាតើយើងចូលចិត្តស្លៀកពាក់អ្វីដោយកុំគិតពីអ្នកដទៃមើលមកយ៉ាងម៉េច ដែលសំខាន់ទៀតនោះកុំមានអារម្មណ៍ថាខ្លួនឯងធ្វើមិនបាន ឬចាំទាល់តែអ្នកនេះឬអ្នកនោះមកធ្វើទើបបាននោះទេ ដូចពាក្យមួយឃ្លាគេនិយាយថា មិនមែនមនុស្សគ្រប់គ្នាអាចក្លាយជាអ្នកច្នៃម៉ូដនោះទេ ប៉ុន្តែអ្នកច្នៃម៉ូដអាចមកពីគ្រប់ទីកន្លែង៕
Article by HEM SOKKHIM
