យើងដឹងហើយថាអាហាររូបត្ថម្ភចម្រុះមុខបានផ្ទុកនៅក្នុងបន្លែផ្លែឈើដែលយើងបរិភោគប្រចាំថ្ងៃ ហើយសារធាតុទាំងនោះទៀតសោតមានអត្ថប្រយោជន៍ចំពោះសុខភាពនិងសម្រស់ទៅតាមមុខងាររបស់វា។ បន្ថែមលើរបបអាហារប្រចាំថ្ងៃ ថ្ងៃនេះសូវរីននឹងពាំនាំនូវចំណេះដឹងថ្មីបន្ថែមទៀតជាមួយការយកបន្លែផ្លែឈើមកច្នៃធ្វើជាភេសជ្ជៈឈ្ងុយឆ្ងាញ់តាមវិធីងាយៗដែលយើងអាចធ្វើនៅផ្ទះដោយខ្លួនឯង ដែលសំខាន់វាសុទ្ធសឹងជាភេសជ្ជៈជំនួយដល់សុខភាព ស្មារតី និងរក្សាសម្រស់ឲ្យនៅតែក្មេងជាងវ័យផងដែរ។
1. ខ្នុរក្រឡុក
គ្រឿងផ្សំ៖
- សាច់ខ្នុរទុំ២ពែង
- ទឹកឃ្មុំមួយស្លាបព្រាបាយ
- ទឹកដោះគោជូរ ២-៣ពែង
- ទឹកកក៨ដុំ
វិធីធ្វើ៖
យើងគ្រាន់តែយកគ្រឿងផ្សំទាំងអស់ដាក់បញ្ចូលគ្នារួចក្រឡុកឲ្យក្លាយជាល្បាយតែមួយឲ្យបានម៉ដ្តល្អ ហើយចាក់ដាក់កែវសម្រាប់ទទួលទានជាការស្រេច។ បើប្រិយមិត្តនិយមរសផ្អែមជាងនេះអាចបន្ថែមទឹកឃ្មុំតាមចំណូលចិត្ត។
អត្ថប្រយោជន៍៖
ភេសជ្ជៈដែលសម្បូរទៅដោយប្រូតេអ៊ីននេះនឹងជួយបង្កើនសាច់ដុំ ជួយសម្រួលការរំលាយអាហារ ពិសេសវីតាមីន A និងសារធាតុចិញ្ចឹមជាច្រើនទៀតជំនួយដល់ស្មារតី កាត់បន្ថយស្ត្រេស ជួយសុខភាពភ្នែក ជំនួយបេះដូង និងសុខភាពខួរក្បាលល្អប្រសើរផងដែរ។ រីឯសម្រស់វិញអាចប្រឆាំងភាពចាស់ និងស្នាមជ្រីវជ្រួញ៕
2. ល្ហុងទុំត្រូពិក
គ្រឿងផ្សំ៖
- ល្ហុងទុំ មួយចំហៀង
- ស្វាយទុំ ២ផ្លែ
- ខ្ញី ១មើម
- ទឹកសឺរ៉ូ ៤ស្លាបព្រាបាយ
- ស្ករស ២ស្លាបព្រាបាយ
- ទឹកឆ្អិន ៨០០មីលីលីត្រ
វិធីធ្វើ៖
ដំបូងយើងត្រូវយកល្ហុងនិងស្វាយទុំមកចិតសម្បកឲ្យស្អាតរួចកាត់វាជាដុំតូចៗ ចំណែកខ្ញីចិតសម្បកហើយហាន់ជាបន្ទះស្តើងៗដើម្បីងាយស្រួលក្នុងការកិន។ យើងយកផ្លែឈើទាំងអស់មកកិនបញ្ចូលគ្នារួចចាក់ទឹក៦០០មីលីលីត្រចូល ប្រសិនបើមើលទៅរាងខាប់ពេកយើងអាចបន្ថែមទឹក២០០មីលីលីត្ររួចច្រោះយកតែទឹកប៉ុណ្ណោះ។ ក្រោយមកទៀតយើងអាចដាក់ស្ករស និងទឹកសឺរ៉ូបន្ថែមរួចកូរចូលគ្នាឲ្យសព្វ ភ្លក់រសជាតិថាល្មមឆ្ងាញ់ទៅតាមចំណូលចិត្តជាការស្រេច។ ភេសជ្ជៈនេះយើងអាចពិសាបែបត្រជាក់ៗដោយក្លាសេឬដាក់ទឹកកកនឹងកាន់តែបង្កើនរសជាតិឆ្ងាញ់ពិសា។
អត្ថប្រយោជន៍៖
ជួយទប់ស្កាត់ការប្រឈមជំងឺមហារីក ជាពិសេសមហារីកពោះវៀនធំ ជំនួយស្បែកភ្លឺថ្លា ព្យាបាលក្រពះនិងសម្រួលប្រព័ន្ធរំលាយអាហារ ការពារជំងឺគាំងបេះដូង រដូវមកមិនទៀង ព្យាបាលការហើមរលាក ព្យាបាលការរលាកអាមីដាល់នៅបំពង់ក និងពង្រឹងប្រព័ន្ធការពារ។
3. ទឹកពោតបារាំង
គ្រឿងផ្សំ៖
- ពោតបារាំង ៧ផ្លែ
- ខ្ញី ១ដុំ
- ត្រសក់ជប៉ុន ១ ផ្លែ
- ទឹកឃ្មុំ ១ស្លាបព្រាបាយកន្លះ
- ទឹកឆ្អិនឬទឹកសុទ្ធ ២០០មីលីលីត្រ
- ក្រូចឆ្មារឬក្រូចឬក្រូចLemon យកតែទឹក ១ស្លាបព្រាបាយ
វិធីធ្វើ៖
ងាយៗបានទាំងភេសជ្ជៈឆ្ងាញ់ពិសាថែមទាំងជួយដល់សុខភាព យើងគ្រាន់តែអនុវត្តយកពោតបារាំងមកហាន់កង់ៗ ខ្ញីហាន់ស្តើងៗយកតែ៥ចំណិត រីឯត្រសក់ជប៉ុនកាត់យកតែត្រឹមប្រវែងមួយចង្អុលដៃនៃត្រសក់មួយ។ បន្ទាប់មកយកបន្លែទាំងនេះមកដាក់ក្នុងម៉ាស៊ីនក្រឡុករួមទាំងបន្ថែមរសជាតិដោយទឹកឃ្មុំ ទឹកក្រូចឆ្មារនិងចាក់ទឹកឆ្អិនឬទឹកសុទ្ធចូលក្រឡុកចូលគ្នានឹងក្លាយជាភេសជ្ជៈគួរឲ្យចង់ទទួលទានមួយរំពេច។ ទទួលទានជាប្រចាំឬ៣ដងក្នុងមួយសប្តាហ៍នឹងជួយឲ្យសុខភាពរាងកាយល្អប្រសើរ ជួយបញ្ចុះជាតិពុល ពិសេសផ្តល់សម្រស់ស្បែកភ្លឺថ្លាក្មេងជាងវ័យ៕
4. ទឹកម្ទេសប្លោកពិសេស
គ្រឿងផ្សំ៖
- ការ៉ុត ១មើម
- ម្ទេសប្លោកលឿង មួយចំហៀងផ្លែ
- ខ្ញី ៥ចំណិត
- ក្រូចឆ្មារ ១ផ្លែ
- ទឹកក្តៅ ៣០០មីលីលីត្រ
- ជីរអង្កាម ៥សន្លឹក
- ទឹកឃ្មុំ ៣ស្លាបព្រាបាយ
វិធីធ្វើ៖
ដើម្បីអនាម័យដំបូងយើងត្រូវយកបន្លែទាំងអស់មកលាងសម្អាតឲ្យបានស្អាតជាមុនសិន ហើយសម្រាប់ការ៉ុតយើងកាត់ជាកង់ៗចំណែកម្ទេសប្លោកកាត់ជាដុំតូចៗដើម្បីងាយស្រួលកិន។ ចាប់ផ្តើមយកការ៉ុត ម្ទេសប្លោក ខ្ញី និងជីរអង្កាម ដាក់ចូលក្នុងម៉ាស៊ីនក្រឡុកបន្ថែមដោយទឹកឃ្មុំ ទឹកក្រូចឆ្មារ និងទឹកក្តៅក្រឡុកចូលគ្នារហូតក្លាយជាល្បាយតែមួយ។ យើងអាចទទួលទានបែបខាប់ៗជាមួយកាកក៏បាន ឬបើពុំដូច្នោះអាចត្រងយកតែទឹកហើយដាក់ក្លាសេទទួលទានក៏ផ្តល់ឱជារសឆ្ងាញ់ដូចគ្នា។
អត្ថប្រយោជន៍៖
ប្រភពវីតាមីន Cនៅក្នុងម្ទេសនឹងជួយឲ្យរាងកាយស្រូបយកជាតិដែកបានកាន់តែល្អ។ វីតាមីន B6 និង folate ជួយការពារការកង្វះឈាមក្រហម។ វីតាមីនA ជំនួយដល់សុខភាពភ្នែក ជាពិសេសបង្កើនភាពច្បាស់។ វីតាមីនAនិងC បានដើរតួជាសារធាតុប្រឆាំងអុកស៊ីតកម្ម រួមគ្នាជាមួយ Lycopene ការពារការប្រឈមជំងឺមហារីកដូចជា មហារីកក្រពេញ(ឈ្មោល) និងមហារីកសួត។ លើសពីនេះសារធាតុ ខេបសៃស៊ីន (capsaicin) នឹងជួយដល់ប្រព័ន្ធរំលាយអាហារ និងសម្រួលសម្ពាធឈាម។
5. ទឹកស្ពៃក្តោប
គ្រឿងផ្សំ៖
- ស្ពៃក្តោប ១០០ ក្រាម
- ផ្លែគីវី ៦ផ្លែ (កាត់ជាដុំតូចៗ)
- ទឹកដោះគោស្រស់ ១/២ កែវ
- ទឹកឃ្មុំ ៣ ស្លាបព្រាបាយ
- ទឹកកក (បន្តិច)
- ជីរអង្កាម (លម្អបន្ថែម)
វិធីធ្វើ៖
ជាដំបូងយើងត្រូវយកស្ពៃក្តោបមកបកជាស្រទាប់ៗរួចកាត់វាជាកង់ៗតូចហើយចាំដាក់គ្រឿងផ្សំទាំងអស់បញ្ចូលគ្នាដែលមានដូចជា ផ្លែគីវី ទឹកដោះគោស្រស់ ទឹកឃ្មុំ និងទឹកកកបន្តិចរួចយកទៅក្រឡុកបញ្ចូលគ្នាឲ្យសព្វទើបចាក់ដាក់កែវនិងបន្ថែមដោយជីរអង្កាមពីលើជាការស្រេច។
អត្ថប្រយោជន៍៖
ភេសជ្ជៈនេះផ្ទុកទៅដោយជាតិខនិជដែលជួយពង្រឹងកោសិកាស្បែក ពង្រឹងប្រព័ន្ធការពារ ប្រឆាំងនឹងរ៉ាឌីកាល់សេរីដែលជាករណីបង្កឲ្យកើតជំងឺមហារីកផ្សេងៗនិងបញ្ហាបេះដូង។ វីតាមីន Kនិង Cនឹងជួយពង្រឹងដល់ឫសសក់ និងគ្រប់គ្រងជាតិប្រេងនៅលើស្បែកក្បាល។ ជាតិ ស៊ីលីស(Silicon) និង សាលហ្វឹរ (Sulphur) មានសមត្ថភាពជំរុញជាតិពុលចេញពីស្បែកធ្វើស្បែកស្រស់ថ្លាមានសុខភាពល្អ។ លើសពីនេះវាជួយបញ្ចុះទម្ងន់ ពង្រឹងប្រព័ន្ធការពារ និងជំរុញមុខងារថ្លើមផងដែរ៕
Article by HEM SOKKHIM