តើឆ្នាំនេះអង្គការ PHARE មានទស្សនីយភាពសិល្បៈអ្វីខ្លះសម្រាប់ពញ្ញាក់អារម្មណ៍ទស្សនិកជន?
NEWS 3 years agoក្រោយពីស្ងប់ស្ងាត់សកម្មភាពបន្តិចក្នុងអំឡុងរដូវកាលកូវីដ១៩ កាលពីឆ្នាំកន្លងទៅ អង្គការហ្វារពន្លឺសិល្បៈ ដែលត្រូវបានទស្សនិកជនជាតិនិងអន្តរជាតិស្គាល់ថាជាអង្គការសិល្បៈដ៍ធំមួយដែលមានកេរ្តិ៍ឈ្មោះបោះសំឡេងជាយូរឆ្នាំណាស់មកហើយនោះកំពុងត្រៀមបង្ហាញផ្ទាំងទស្សនីយភាពថ្មីៗជាច្រើនសម្រាប់បម្រើអារម្មណ៍អស់លោក លោកស្រី អ្នកនាង កញ្ញា ចាប់តាំងពីពេលនេះតទៅបន្តរហូតដល់ចុងឆ្នាំតែម្តង!
របាំអប្សរាបុរស (ថ្ងៃទី ១២-១៣ ខែកុម្ភៈ ឆ្នាំ២០២១)
របាំអប្សរាជាផ្នែកមួយនៃរបាំក្បាច់បុរាណខ្មែរដែលត្រូវបានចុះបញ្ចូលក្នុងបញ្ជីបេតិកភណ្ឌវប្បធម៌អរូបីពិភពលោកដោយអង្គការយូនេស្កូ (UNESCO) កាលពីខែវិច្ឆិកា ឆ្នាំ២០០៣។ តាមប្រពៃណី របាំនេះតែងតែត្រូវបានសម្តែងដោយនាដកាដែលជានារីភេទ។ ទោះបីជាយ៉ាងណាក៏ដោយ ក៏សព្វថ្ងៃយើងសង្កេតឃើញមានសិល្បករបុរសបានចូលរួមសម្តែងរបាំប្រភេទនេះខុសពីសម័យមុន។ អាស្រ័យហេតុនេះ ទស្សនីយភាពរបាំអប្សរាបុរសដែលនឹងរៀបចំប្រារព្ធឡើងក្នុងពេលឆាប់ៗនេះត្រូវបានបង្កើតឡើងក្នុងគោលបំណងបង្កើតជាវេទិកាពិភាក្សាវែកញែករវាងសិល្បករ យុវជន និង មហាជនទាំងឡាយ រៀបចំសហការជាមួយមន្ទីរវប្បធម៌និងវិចិត្រសិល្បៈខេត្តបាត់ដំបងនិងក្រុមរបាំអប្សរាបុរស។ ព្រឹត្តិការណ៍នេះនឹងមានការធ្វើសិក្ខាសាលាបង្ហាញរបៀបស្លៀកពាក់ឈុតរបាំអប្សរា របៀបផលិតគ្រឿងរបាំអប្សរា និង ពិព័រណ៍រូបថតនៅឯវិចិត្រសាលសង្កែ ព្រមទាំងមានការសម្តែងរបាំនៅកណ្តាលក្រុងបាត់ដំបង។
ល្ខោនខោល (ថ្ងៃទី ២២ ខែឧសភា ឆ្នាំ២០២១)
ល្ខោនខោល ឬ ភាណី ជាទស្សនីយភាពល្ខោនបុរសពាក់មុខដែលមានប្រភពកំណើតតាំងពីសម័យអង្គរ ហើយដែលត្រូវបានគេជឿថាកកើតឡើងដំបូងក្នុងអំឡុងសតវត្សរ៍ទី១០មកម្ល៉េះ។ អង្គការហ្វានឹងបង្កើតឲ្យមានការសម្តែងល្ខោនខោលចូលរួមដោយយុវសិល្បករប្រមាណ២០នាក់ដែលមានអាយុចន្លោះ៦ឆ្នាំដល់១៥ឆ្នាំ។ ព្រឹត្តិការណ៍នេះនឹងចូលរួមចំណែកលើកកម្ពស់ការយល់ដឹងរបស់សាធារណជនពាក់ព័ន្ធនឹងល្ខោនខោលតាមរយៈសិក្ខាសាលាធ្វើបទបង្ហាញស្តីពីរបៀបផលិតរបាំងមុខខោលនិងអត្ថន័យនៃចលនារបស់តួអង្គល្ខោនខោល ជាពិសេសគឺមានវត្តមានចូលរួមចែករំលែកចំណេះដឹងពីសំណាក់សាស្រ្តាចារ្យល្ខោនខោលមកពីរាជធានីភ្នំពេញ និង អ្នកឯកទេសប្រចាំមន្ទីរវប្បធម៌និងវិចិត្រសិល្បៈខេត្តបាត់ដំបង។
មហោស្រពសិល្បៈទីក្រុងស្អាត (ថ្ងៃទី០១-០៧ ខែមិថុនា ឆ្នាំ២០២១)
“ស្អាត” (S’Art) មានអត្ថន័យចង់សំដៅលើ សោភ័ណភាពស្រស់ស្អាត នៅក្នុងភាសាខ្មែរយើង ដែលក្នុងបរិបទនេះគឺសំដៅលើសម្រស់នៃសិល្បៈបែបទីក្រុងដ៏ស្រស់ស្អាត (Urban Art) ។ គោលបំណងនៃការបង្កើតព្រឹត្តិការណ៍សិល្បៈនេះឡើងដើម្បីផ្សព្វផ្សាយកិត្យានុភាពមុខមាត់ក្រុងបាត់ដំបងដែលជាក្រុងនិមិត្តរូបនៃសិល្បៈវប្បធម៌ខ្មែរដ៏ស៊ីវិល័យ រួមមាន វិស័យហ្វេហ្សិន វិស័យស្ថាបត្យកម្ម សិល្បៈចក្ខុទស្សន៍ និង សិល្បៈទស្សនីយភាព។ ព្រឹត្តិការណ៍នេះត្រូវបានបង្កើតឡើងជាលើកដំបូងដោយអង្គការហ្វារពន្លឺសិល្បៈនៅក្នុងឆ្នាំ២០១៨ ដើម្បីបញ្ជ្រាបសហគមន៍សិល្បៈទាំងនេះឲ្យទូលំទូលាយទៅក្នុងសង្គម និង បង្កើតឥទ្ធិពលខ្លាំងទៅលើសង្គមពាក់ព័ន្ធនឹងការអប់រំនិងការអភិវឌ្ឍផ្នែកវប្បធម៌និងសិល្បៈ។ សកម្មភាពសំខាន់ៗរួមមាន សិក្ខាសាលាសិល្បៈគំនូរលើជញ្ជាំង, របាំ, ល្ខោនស្បែក, ហែក្បួន និង កម្មវិធីមហោស្រពតាមផ្លូវផ្សេងៗ។
រសបាត់ដំបង (ថ្ងៃទី២៩-៣០ ខែតុលា ឆ្នាំ២០២១)
ដើម្បីបន្តជំរុញជោគជ័យនៃកម្មវិធី “រសបាត់ដំបង” ឆ្នាំ២០២០ សាលាហ្វារពន្លឺសិល្បៈនឹងបង្កើតឱកាសឲ្យសហហគមន៍បាត់ដំបង និង ប្រជាពលរដ្ឋកម្ពុជាមកពីបណ្តាខេត្តដទៃទៀតបានមកទស្សនានិងភ្លក់រសជាតិម្ហូបអាហារអ្នកបាត់ដំបងដ៏ឈ្ងុយឆ្ងាញ់ប្លែកពីតំបន់ផ្សេងៗព្រមទាំងបានទស្សនាទិដ្ឋភាពសិល្បៈ សៀករហស្សកម្ម របាំ និងការប្រគំតន្រ្តីគួរឲ្យជក់ចិត្តដិតអារម្មណ៍ គួបផ្សំនឹងការពិព័រណ៍ស្នាដៃសិល្បៈសហសម័យថ្មីៗរបស់សិល្បករប្រចាំក្រុងបាត់ដំបង។ កម្មវិធីនេះមានសកម្មភាពកម្សាន្តសប្បាយជាច្រើនរួមមាន ល្បែងកម្សាន្ត សិល្បៈកុមារ សិល្បៈគំនូរលើមុខ សិល្បៈគំនូររាងកាយ និង សិល្បៈគំនូរបែបត្លុក ជាដើម។
ពិព័រណ៍ជំនោរ ART (ថ្ងៃទី២៤-២៦ ខែធ្នូ ឆ្នាំ២០២១)
ពិព័រណ៍សិល្បៈ “ជំនោរ Art” នឹងត្រូវប្រារព្ធធ្វើឡើងនៅតាមផ្លូវលេខ 2.5 នៅក្នុងក្រុងបាត់ដំបង បង្កើតឡើងក្នុងគោលបំណងដើម្បីអភិវឌ្ឍសហគមន៍សិល្បកររស់នៅក្នុងទឹកដីខេត្តដំបង។ តើវិស័យសិល្បៈអាចចូលរួមចំណែកដល់ការអភិវឌ្ឍវិស័យសេដ្ឋកិច្ចនិងសង្គមបានយ៉ាងដូចម្តេចខ្លះ? តាមរយៈកម្មវិធីខាងលើ ទម្រង់សិល្បៈ និង សិល្បករនឹងទទួលបាននូវការគាំទ្រនិងចំណាប់អារម្មណ៍បន្ថែមពីសំណាក់មហាជនទាំងឡាយ។ ព្រឹត្តិការណ៍កម្មវិធីនេះនឹងរួមបញ្ចូលការសម្តែងសៀក ការរាំចង្វាក់ហ៊ីបហប់ ការសម្តែងរបាំប្រពៃណី ការគូរគំនូរភ្លាមៗ ការដើរបង្ហាញម៉ូដ សិក្ខាសាលាសិល្បៈ ជាដើម។
Article by SRIN SOKMEAN