ម្ហូបខ្មែរស្នាដៃអ្នកខេត្តពោធិ៍សាត់ធ្លាប់ជាប់ជ័យលាភីលេខ១ថ្នាក់ជាតិ
TRAVEL & LIVING 3 years agoខេត្តពោធិ៍សាត់ជាដែនដីបុរាណខ្មែរយូរលង់ណាស់មកហើយដែលមានផ្សារភ្ជាប់នឹងវប្បធម៌-ប្រវត្តិសាស្រ្តជាច្រើននៃព្រះរាជាណាចក្រកម្ពុជាដែលលោកអ្នកបានជ្រាបរួចមកហើយ ដូចជា អ្នកតាឃ្លាំងមឿង អតីតព្រំប្រទល់ខ្មែរ-សៀមត្រង់ស្វាយដូនកែវ (ស្រុកបាកាន សព្វថ្ងៃ) និងប្រវត្តិឈ្មោះវត្តបាកាន ជាដើម។ ក្រៅពីរឿងរ៉ាវប្រវត្តិសាស្រ្តដ៏សម្បូរបែបខាងលើ ខេត្តទឹកដីពាយ័ព្យប្រទេសនេះក៏មានស្នាដៃពាក់ព័ន្ធនៃសិល្បៈចម្អិនម្ហូបអាហារតាមរូបមន្តនិងថ្វីដៃពិសេសប្រចាំតំបន់រហូតទទួលបានលទ្ធផលក្នុងកម្មវិធីប្រឡងប្រជែងថ្នាក់ជាតិមួយកាលពីប៉ុន្មានឆ្នាំកន្លងទៅជាសក្ខីភាព។
យោងតាមលទ្ធផលជ័យលាភីមហោស្រពដណ្តាំស្លម្ហូបអាហារខ្មែរលើកទី១៩ ឆ្នាំ២០១៨ ដែលបានចេញផ្សាយជាផ្លូវការ ប្រកាសដោយលោកស្រី នេត ភូម៉ារី ប្រធានគណៈកម្មការមេប្រយោគមហោស្រព នៅថ្ងៃទី២៣ ខែកញ្ញា ឆ្នាំ២០១៨ ខេត្តជាប់ចំណាត់ថ្នាក់លេខ១ ជ័យលាភីដណ្តាំស្លម្ហូបខ្មែរ ប្រចាំឆ្នាំ២០១៨ រួមមាន ខេត្តពោធិ៍សាត់ ជាប់ចំណាត់លើម្ហូបសម្លម្ជូរដើមចេក, ខេត្តបន្ទាយមានជ័យជាប់ចំណាត់ថ្នាក់លើម្ហូបពិសេសប្រចាំតំបន់, និងខេត្តតាកែវ ជាប់ចំណាត់លើបង្អែមចេកខ្ទិះក្រោមការវាយតម្លៃយ៉ាងសុក្រិតប្រកបដោយសុភវិនិច្ឆ័យពីសំណាក់សមាសភាពគណៈកម្មការមេប្រយោគមហោស្រពដណ្តាំស្លម្ហូបអាហារខ្មែរនៃក្រសួងវប្បធម៌និងវិចិត្រសិល្បៈ។
តាមប្រភពដដែល យើងបានដឹងថា ម្ហូបសម្លម្ជូរដើមចេកមកពីខេត្តពោធិ៍សាត់ដែលជាប់ចំណាត់ថ្នាក់លេខ១ លើវិញ្ញាសាដណ្តាំស្លម្ហូបខ្មែរក្នុងកម្មវិធីនេះមានឈ្មោះថា “ម្ជូរដើមចេកប្រឡែងមច្ឆាតម្រាសំពៅមាស” ខណៈដែលខេត្តស្វាយរៀង ចំណាត់ថ្នាក់លេខ២ មានឈ្មោះថា “ម្ជូរដើមចេកត្រីរ៉ស់ស្រណោះត្នោតទេរមាត់បឹង” និង ខេត្តកោះកុង ចំណាត់ថ្នាក់លេខ៣ មានឈ្មោះថា “ម្ជូរដើមចេកព្រែកស្វាយម្លប់ស្នេហ៍ត្រពាំងរូង” ។ គណៈកម្មការមេប្រយោគនៃកម្មវិធីនេះបានឲ្យដឹងថា លក្ខណៈវិនិច្ឆ័យផ្អែកទៅលើរសជាតិឆ្ងាញ់ពិសា សោភ័ណភាពដែលមានការរៀបចំមុខម្ហូបបានយ៉ាងល្អប្រណិតគួរឲ្យចង់ទទួលទាន រួមទាំងសិល្បៈដណ្តាំស្លដែលមានភាពប៉ិនប្រសប់និងប្រកបដោយអនាម័យខ្ពស់។
លោកស្រី ង៉ោ ឡាង ជាម្ចាស់ភោជនីយដ្ឋានខ្លាឃ្មុំ ដែលមានប្រវត្តិអាជីវកម្ម២៦ឆ្នាំមកហើយ ស្ថិតជាប់ផ្លូវជាតិលេខ៥ ក្នុងភូមិឈើទាលខ្ពស់ ឃុំក្បាលត្រាច ស្រុកក្រគរ ខេត្តពោធិ៍សាត់ ជាម្ចាស់ជ័យលាភីលេខ១បានសម្តែងក្តីសោមនស្សយ៉ាងខ្លាំងចំពោះលទ្ធផលចំណាត់ថ្នាក់ដែលទទួលបានខាង លើនេះ។ លោកស្រីបានបញ្ជាក់ថា ចំពោះការប្រកួតប្រជែងនេះ គឺខាងមន្ទីរវប្បធម៌ជាអ្នកអញ្ជើញរូបគាត់ឲ្យចូលរួម ហើយក្រុមការងារតំណាងខេត្តពោធិ៍សាត់មានសរុបចំនួន៣នាក់គឺអ្នកដាំស្ល និង អ្នករៀបចំតុបតែងលម្អស្តង់តំណាងខេត្ត។ នៅថ្ងៃប្រកួត បេក្ខជនចូលរួមតំណាងខេត្តនីមួយៗត្រូវបានបែងចែកសម្ភារដាំស្លពីក្រសួងវប្បធម៌ហើយចម្អិនម្ហូបនៅទីតាំងក្រសួងផ្ទាល់ក្នុងរយៈពេលកំណត់មួយ។ បន្ទាប់មក ត្រូវដឹកជញ្ជូនម្ហូបដែលចម្អិនរួចស្រេចនោះទៅកាន់មជ្ឈមណ្ឌលពិព័រណ៍កោះពេជ្រដែលជាទីតាំងតាំងបង្ហាញស្នាដៃជូនគណៈកម្មការជំនាញភ្លក់និងដាក់ពិន្ទុ។
អ្វីទៅជាចំណុចពិសេសនៃម្ជូរដើមចេកជ័យលាភីរបស់ខេត្តពោធិ៍សាត់នេះ? ម្ចាស់ស្នាដៃបានអះអាងថា ដើម្បីស្ងម្ជូរដើមចេកឆ្ងាញ់ ត្រូវជ្រើសរើសប្រើតែដើមចេកជ្វា ព្រោះដើមចេកជ្វាមានលក្ខណៈស្រួយ រសជាតិផ្អែម មិនចត់ ហើយពេលស្លឆ្អិន មិនប្រែពណ៌ខ្មៅ ដូចដើមចេកណាំវ៉ានោះឡើយ។ ចំពោះសាច់ដែលត្រូវស្ល អ្នកស្រីប្រើកូនត្រីស្រែតូចៗដែលមានរសជាតិត្រូវនឹងរសជាតិដើមចេកនោះតែម្តង។ លើសពីនេះទៅទៀត ស្តង់ម្ហូបប្រចាំខេត្តពោធិ៍សាត់ មានរៀបចំតុបតែងដោយប្រើដើមចេក និង គ្រឿងចានឆ្នាំងបែបបុរាណខ្មែរចំតែម្តងគួរឲ្យទាក់ទាញចិត្តគណៈកម្មការ និង ទស្សនិកជន។
ចាប់តាំងពីម្ហូប “ម្ជូរដើមចេកប្រឡែងមច្ឆាតម្រាសំពៅមាស” ស្រុកក្រគរ ខេត្តពោធិ៍សាត់ ដែលអ្នកស្រីបានចម្អិនចូលរួមប្រកួតនោះទទួលបានចំណាត់ថ្នាក់លេខ១ថ្នាក់ជាតិមករហូតមកដល់បច្ចុប្បន្ន អ្នកដំណើរជិតឆ្ងាយគ្រប់ទិសទីជាច្រើននិយមកុម្ម៉ង់ម្ហូបមួយមុខនេះដែលគ្រប់គ្នាចាត់ទុកជាម្ហូបប្រចាំត្រកូលសម្រាប់ហាងនេះជាហូរហែមិនចេះដាច់។ ក្រៅពីម្ហូបម្ជូរដើមចេក ហាងរបស់អ្នកស្រីមានបម្រើម្ហូបខ្មែរជាច្រើនមុខទៀត រួមទាំងម្ហូបបន្លែតាមរដូវកាលថែមទៀតផង។ ជាចុងក្រោយ លោកស្រីមានប្រសាសន៍ថា ប្រសិនបើខាងមន្ទីរវប្បធម៌ខេត្តចុះមកទាក់ទងអញ្ជើញរូបគាត់ឲ្យចូលរួមប្រកួតប្រជែង ឬ តាំងពិព័រណ៍ម្ហូបក្នុងកម្មវិធីនានា លោកស្រីនៅតែពេញចិត្តរីករាយក្នុងការចូលរួមជានិច្ច៕
Article by SRIN SOKMEAN