ស្ត្រីគ្រប់រូបរមែងប្រាថ្នាក្រចកវែងក៏ព្រោះក្រចកវែងនឹងធ្វើឲ្យម្រាមដៃមើលទៅរលូនសិចស៊ី ជាពិសេសអំណោយផលសម្រាប់ការតុបតែងលេងពណ៌លេងម៉ូដឲ្យស៊ីវិល័យផងដែរ។ បញ្ហាក្រចកដុះយឺតនិងឆាប់បាក់កើតឡើងមកពីកត្តាដូចជា ទម្លាប់ខាំក្រចកដែលធ្វើឲ្យមេរោគឆ្លងបង្អាក់ដល់ការលូតលាស់ ការប្រើផលិតផលថ្នាំលាបគុណភាពទាប ការមិនប្រើផលិតផលទឹកលាបការពារក្រចកមុនពេលលាបពណ៌ ការឈូសឬរូសក្រចកដែលធ្វើឲ្យសឹកស្រទាប់ក្រចក និងការតក្រចកជែលឬបិតក្រចកជ័រញឹកញាប់។ សម្រាប់សុភាពនារីដែលកំពុងតែជួបបញ្ហាដូចបានរៀបរាប់ខាងលើ ថ្ងៃនេះសូវរីនសូមផ្តល់ដំបូន្មានគួរតែបញ្ឈប់ទម្លាប់ទាំងប៉ុន្មានចេញ ហើយងាកមកថែបំប៉នក្រចកឲ្យរឹងមាំមានសុខភាពល្អ និងដុះវែងឆាប់រហ័សវិញជាមួយរូបមន្តប្រើប្រាស់ឱសថបុរាណផ្ទះបាយដូចខាងក្រោម។
រូបមន្តទឹកក្រូចឆ្មារ៖ អនុវត្តយកទឹកក្រូចឆ្មារចំនួន ១ស្លាបព្រាបាយ លាយជាមួយប្រេងអូលីវ៣ស្លាបព្រាបាយ បន្ទាប់មកយកទៅដាក់កម្តៅនៅក្នុងម៉ាស៊ីនម៉ាយក្រូវេវរយៈពេល២០វិនាទី។ ក្រោយកម្តៅរួចរាល់យកទឹកនោះមកត្រាំក្រចករយៈពេល១០នាទីហើយលាងទឹកចេញជាការស្រេច។ ឬអាចអនុវត្តតាមវិធីមួយទៀត ដោយគ្រាន់តែចិតក្រូចឆ្មារជាចំណិតៗហើយយកមកត្រដុសញីជាមួយក្រចកគ្រប់ម្រាមដៃរយៈពេល៥នាទី បន្ទាប់មកលាងជម្រះចេញដោយទឹកក្តៅឧណ្ហៗ។ អ្នកអាចអនុត្តវិធីទាំងពីរនេះមួយថ្ងៃម្តងរៀងរាល់ថ្ងៃ។ វីតាមីន C ដែលមាននៅក្នុងក្រូចឆ្មារនឹងជួយជំរុញក្រចកឲ្យដុះលឿន ថែមទាំងធ្វើឲ្យក្រចកដែលឡើងពណ៌លឿងប្រែមកជាពណ៌សស្រស់ស្អាតវិញផងដែរ។
រូបមន្តប្រេងដូង៖ ប្រេងដូងផ្ទុកទៅដោយសារធាតុចិញ្ចឹមដែលជួយដល់ទាំងក្រចកនិងស្បែកជុំវិញក្រចកឲ្យលូតលាស់បានល្អ ដែលសំខាន់ក្រចកដុះមករឹងមាំនិងមានសុខភាពល្អ។ លើសពីនេះប្រេងដូងមានសមត្ថភាពព្យាបាលមេរោគផ្សិតនៅក្នុងក្រចកផងដែរ។ ដើម្បីប្រើប្រាស់ប្រេងដូងជារូបមន្តថែរក្សានិងបណ្តុះក្រចក ដំបូងយើងត្រូវយកប្រេងដូងមកដាក់កម្តៅបន្តិចសិន បន្ទាប់មកយកមកលាបលើក្រចកនិងម្រាមដៃដោយធ្វើការម៉ាស្សាជារង្វង់ៗ។ ការម៉ាស្សានេះក៏នឹងជួយសម្រួលលំហូរឈាមដែលជំរុញដល់ការលូតលាស់របស់ក្រចក។ វិធីនេះអ្នកអាចអនុវត្តរៀងរាល់យប់មុនពេលចូលគេង។
រូបមន្តប្រេងអូលីវ៖ ដើម្បីប្រាកដថាក្រចកមានសុខភាពល្អ និងដុះមករឹងមាំ វាពិតជាចាំបាច់ណាស់ក្នុងផ្តល់សារធាតុចិញ្ចឹមនិងសំណើមដល់ក្រចក។ ប្រេងអូលីវផ្ទុកទៅដោយវីតាមីន E ជួយជំរុញលំហូរឈាម និងការលូតលាស់របស់ក្រចក។ អនុវត្តម្តងក្នុងមួយថ្ងៃដោយយកប្រេងអូលីវមកកម្តៅបន្ទាប់មកយកមកលាបម៉ាស្សានៅលើក្រចក និងគល់ក្រចករយៈពេលប្រាំនាទី។ បន្ទាប់មកពាក់ស្រោមដៃ (មិនបាច់លាងដៃ) ទុកមួយយប់រហូតដល់ព្រឹកឡើងចាំលាងទឹកជម្រះចេញ។ ប្រសិនមិនចង់ប្រើវិធីនេះអ្នកគ្រាន់តែកម្តៅប្រេងអូលីវហើយដាក់ក្រចកត្រាំរយៈពេល១៥ទៅ២០នាទីរួចលាងជម្រះទឹកចេញជាការស្រេច។
រូបមន្តទឹកឃ្មុំ៖ ទឹកឃ្មុំអាចជួយប្រយុទ្ធប្រឆាំងនឹងការកកើតបាក់តេរីនិងផ្សិតនៅលើក្រចក វាជួយថែរក្សាក្រចកនិងស្បែកជុំវិញបរិវេណក្រចកឲ្យមានសុខភាពល្អ។ ធ្វើការផ្តល់សំណើមដល់ក្រចកជាមួយម៉ាសទឹកឃ្មុំដោយលាយទឹកឃ្មុំ២ស្លាបព្រាកាហ្វេជាមួយទឹកក្រូចឆ្មារ២ទៅ៣តំណក់ បន្ទាប់មកយកមកលាបម៉ាស្សានៅលើក្រចករួចទុកចោលរយៈពេល១៥ទៅ២០នាទីទើបលាងជម្រះទឹកចេញ។ អនុវត្តជាប្រចាំអ្នកនឹងទទួលបានក្រចករឹងមាំភ្លឺថ្លារួមទាំងស្បែកក្រចកទន់ល្មើយផងដែរ។
អាថ៌កំបាំងបំប៉នពីផ្នែកខាងក្នុង៖ ខណៈដែលរូបមន្តខាងលើជាវិធីថែរក្សានិងបណ្តុះក្រចកពីខាងក្រៅ ព្រមគ្នានេះវាក៏ដើរទន្ទឹមគ្នានឹងការថែបំប៉នពីផ្នែកខាងក្នុងដើម្បីឲ្យក្រចកកាន់តែមានសុខភាពល្អប្រសើរផងដែរ។ ធនធានអាហាររូបត្ថម្ភចម្រុះត្រូវបានគេរកឃើញនៅក្នុងអាហារធម្មជាតិដែលយើងកំពុងបរិភោគប្រចាំថ្ងៃ ហើយក្នុងនោះអាហារធម្មជាតិដែលជួយដល់សុខភាពក្រចក និងបណ្តុះក្រចកឆាប់រហ័សរួមមាន ស៊ុតនិងគ្រាប់សណ្តែកដែលផ្ទុកទៅដោយប្រូតេអ៊ីន វីតាមីន D, B12 និងបាយអូទីន គ្រាប់ផ្កាឈូករ័ត្នផ្ទុកទង់ដែងនិងម៉ង់ហ្គាណែហ្ស ស្រូវសាលីផ្ទុកទង់ដែងនិងស័ង្កី ខណៈត្រីសាម៉ុនផ្ទុកវីតាមីន D ជាដើម។ អ្នកអាចទាញប្រយោជន៍ពីអាហារធម្មជាតិទាំងនេះតាមរយៈការទទួលទានផ្ទាល់ ឬយកមកច្នៃជាអាហារផ្សេងៗទៅតាមចំណង់ចំណូលចិត្ត៕
Article by HEM SOKKHIM