ក្រែមបន្ទន់សក់ចម្រាញ់ពីធម្មជាតិ៥មុខដែលលោកអ្នកអាចផលិតដោយដៃឯង
TRAVEL & LIVING 3 years agoសុខភាពសក់ជារឿងសំខាន់ដែលលោកអ្នកត្រូវតែថែរក្សាជាប្រចាំមិនខុសពីសុខភាពស្បែកដងខ្លួននិងផ្ទៃមុខនោះទេ។ ការបន្ទន់សក់អាចជួយសរសសៃសក់ឲ្យមានសំណើម ទន់រលោង និងមិនជាប់ជំពាក់។ ប៉ុន្តែការប្រើផលិតផលក្រែមបន្ទន់សក់ដែលមានផ្ទុកសារធាតុគីមីសំយោគច្បាស់ជាបង្កផលវិបាកដល់សុខភាពសក់នៅក្នុងរយៈពេលវែង។ វាល្មមដល់ពេលដែលលោកអ្នកត្រូវងាកមកប្រើផលិតផលចម្រាញ់ពីធម្មជាតិសុទ្ធៗពិតៗតាមផ្ទះវិញហើយ! ខាងក្រោមនេះជាវត្ថុធាតុដើមធម្មជាតិ៥មុខដែលអាចកែច្នៃជាក្រែមបន្ទន់សក់បាន:
១. ទឹកខ្មេះ និង ស៊ុតមាន់
គ្រឿងផ្សំសំខាន់ៗរួមមាន ស៊ុតមាន់ ប្រេងអូលីវ ទឹកខ្មេះ ទឹកឃ្មុំ និងទឹកក្រូចឆ្មារ។ ដំបូងត្រូវវឹកស៊ុតចំនួនពីរបីគ្រាប់ ទឹកខ្មេះមួយស្លាបព្រាបាយ និង ទឹកក្រូចឆ្មារពីរស្លាបព្រាកាហ្វេ។ កូរវាឲ្យសព្វ សឹមបន្ថែមប្រេងអូលីវមួយស្លាបព្រាកាហ្វេកន្លះ និង ទឹកឃ្មុំមួយស្លាបព្រាកាហ្វេទៀត។ ក្រឡុកវាក្នុងម៉ាស៊ីនក្រឡុកទឹកផ្លែឈើរហូតទាល់តែខាប់ល្អ។ លាបវាទៅលើសរសៃសក់ ហើយទុកវាចោលរយៈពេល១០-១៥នាទីមុននឹងលាងជម្រះដោយប្រើទឹកស្អាត។ ស៊ុតជួយសក់ឲ្យភ្លឺរលោង។ ប្រេងអូលីវធ្វើឲ្យសក់រឹងមាំ។ ទឹកឃ្មុំជួយរក្សាសំណើមសក់។ រីឯទឹកខ្មេះជួយព្យាបាលសក់ជ្រុះ។
២. ផ្លែចេក
យកចេកមួយផ្លែ ទឹកឃ្មុំបីស្លាបព្រាកាហ្វេ ទឹកដោះគោឆៅបីស្លាបព្រាកាហ្វេ ប្រេងអូលីវបីស្លាបព្រាកាហ្វេ និង ស៊ុតមាន់១គ្រាប់។ កូរគ្រឿងផ្សំខាងលើបញ្ចូលគ្នាឲ្យក្លាយជាល្បាយខាប់។ លាបលើសក់ ហើយទុកចោលរយៈពេល១៥-៣០នាទីមុននឹងលាងជម្រះដោយប្រើទឹកស្អាត។ ផ្លែចេកជាពពួកក្រែមបន្ទន់សក់ធម្មជាតិដែលមានអត្ថប្រយោជន៍សម្រាប់ព្យាបាលសក់ខូច និង សក់រួញជំពាក់មិនទន់រលោង។
៣. ប្រេងដូងនិងទឹកឃ្មុំ
យកប្រេងដូងមួយស្លាបព្រាបាយ ទឹកឃ្មុំមួយស្លាបព្រាបាយ ទឹកក្រូចឆ្មារមួយស្លាបព្រាបាយ តៅហ៊ូពីរស្លាបព្រាបាយនិងទឹកចម្រាញ់ពីផ្កាកុលាបមួយស្លាបព្រាកាហ្វេ។ កូរវាចូលគ្នាឲ្យសព្វ ហើយលាបវានៅពេលអ្នកកំពុងកក់សក់តែម្តង។ ទុកវាចោលរយៈពេល១០-១៥នាទីមុននឹងលាងជម្រះដោយប្រើទឹកស្អាត។ ប្រេងដូងមិនត្រឹមតែជួយឲ្យសក់លោកអ្នកទន់រលោងនោះទេប៉ុន្តែវាក៏ជួយសក់ឲ្យដុះវែងក្រាស់ឆាប់រហ័សផងដែរ។ សារធាតុរ៉ែនិងអាស៊ីតខ្លាញ់នៅក្នុងប្រេងដូងថែមទាំងជួយចិញ្ចឹមស្បែកក្បាលទៀតផង។
៤. ទឹកខ្មេះផ្លែប៉ោម
យកទឹកខ្មេះប៉ោមពីរស្លាបព្រាបាយ ទឹកឃ្មុំមួយស្លាបព្រាបាយ និង ទឹកស្អាតពីរពែង ចាក់ចូលក្នុងចានគោមមួយហើយកូរវាឲ្យសព្វ។ ក្រោយពេលកក់សក់ យកល្បាយនេះលាបលើសក់ក្បាល តែហាមមិនឲ្យប៉ះដល់ស្បែកក្បាល។ ចំពោះវិធីនេះ លោកអ្នកមិនបាច់លាងជម្រះនឹងទឹកស្អាតនោះទេ គឺគ្រាន់តែលាបទឹកបន្ថែមពីលើបានហើយដើម្បីឲ្យល្បាយទឹកខ្មេះរាវបន្តិចជ្រាបចូលល្អ។ ជាតិអាស៊ីតអាសេទិកនៅក្នុងទឹកខ្មេះនោះនឹងជួយធ្វើឲ្យសក់អ្នកទន់រលោងតែម្តង។
៥. យ៉ាអ៊ួរ (ទឹកដោះគោជូរ)
យកចានគោមមួយ ហើយគោះស៊ុតមួយគ្រាប់ចូល រួមជាមួយយ៉ាអ៊ួរ ៦ស្លាបព្រាបាយ។ កូរវាចូលគ្នាឲ្យសព្វ។ ម៉ាស្សាសក់របស់អ្នកជាមួយនឹងក្រែមដែលលាយរួចហើយគ្របវាឲ្យជិត។ ទុកចោលរយៈពេល១៥-៣០នាទីមុននឹងលាងជម្រះដោយប្រើទឹកស្អាត។សារធាតុប្រូតេអ៊ីន និង អាស៊ីតឡាក់ទិចនៅក្នុងយ៉ាអ៊ួរមានតួនាទីលាងសម្អាតស្បែកក្បាលរបស់លោកអ្នក ហើយជួយធ្វើឲ្យសក់លូតលាស់មានសុខភាពល្អជាងមុន។
Article by SRIN SOKMEAN