Sovrin
Sovrin
៥ វិធី ថែទាំកុំឲ្យមានរង្វង់ភ្នែកខ្មៅ និងជ្រីវជ្រួញជុំវិញភ្នែក
TRAVEL & LIVING 3 years ago
ក្នុងសម័យឌីជីថលនេះ មនុស្សម្នាក់ៗសុទ្ធតែមានទូរសព្ទក្នុងដៃយ៉ាងហោចណាស់ម្នាក់មួយ ខ្លះទៀតក៏មានឧបករណ៍អេឡិចត្រូនិចផ្សេងៗទៀតប្រើប្រាស់ ដែលងាយបង្កឲ្យប៉ះពាល់ដល់សុខភាពភ្នែក និងសម្រស់ផងដែរ។ ពិសេសមិត្តនារីៗ ប្រាកដមានកង្វង់ច្រើន ចំពោះបញ្ហារង្វង់ភ្នែកខ្មៅ និងស្នាមជ្រីវជ្រួញជុំវិញភ្នែក ទាំងវ័យនៅក្មេងល្ហក់។ ដូច្នេះ ប្រិយមិត្តគួរមានទម្លាប់ថែទាំដូចខាងក្រោមនេះ ដើម្បីទទួលបានសម្រស់ក្មេងឋិតឋេរ។
១. ចៀសវាងការប៉ះពាល់ផ្ទាល់នឹងកាំរស្មីUV
កាំរស្មីUV មិនត្រឹមតែបង្កគ្រោះថ្នាក់ដល់កែវភ្នែកនោះទេ វាក៏បង្កបញ្ហាដល់សុខភាពស្បែកផងដែរ។ ស្បែកជុំវិញភ្នែកមិនធន់ដូចស្បែកមុខ ឬស្បែកដងខ្លួនឡើយ វាងាយរងការប៉ះពាល់ជាងគេ ដូច្នេះគប្បីការពារឲ្យបានគ្រប់កាលៈទេសៈ។ ដោយចៀសវាងការសម្លឹងមើលពន្លឺថ្ងៃចំ និងគប្បីប្រើវែនតាការពារពន្លឺថ្ងៃរាល់ពេលចេញទៅក្រៅ។ គួរជ្រើសរើសប្រភេទកញ្ចក់វែនតាដែលមានការពារកាំរស្មីUV ទើបជាការប្រសើរ។
២. ទុកពេលឲ្យភ្នែកសម្រាកបានគ្រប់គ្រាន់
មិនត្រូវប្រើភ្នែកមើលទូរសព្ទ ឬធ្វើការងារដែលប្រឹងសាច់ដុំភ្នែក ក្នុងរយៈពេលយូរឡើយ។ ខណៈពេលដែលប្រឹងសាច់ដុំវិញភ្នែកខ្លាំង សរសៃតូចៗជុំវិញភ្នែកនឹងលានចេញមក ងាយបង្កជាស្នាមជ្រីវជ្រួញលឿន ខណៈស្បែកចាប់ផ្ដើមយារធ្លាក់បន្តិចម្ដងៗទៅតាមការវិវត្តនៃវ័យផងនោះ។ គប្បីទុកពេលឲ្យភ្នែកសម្រាកបាន ៥ ទៅ ១០ នាទី បន្ទាប់ពីការសម្លឹងមើលរយៈពេលប្រមាណ ០១ ម៉ោង បើមានការងារចាំបាច់ត្រូវប្រើភ្នែកខ្លាំង ពិសេសកដែលធ្វើការនៅមុខកុំព្យូទ័រជាដើម។ ការសម្រាកភ្នែក អាចធ្វើឡើងដោយបិទភ្នែកសម្រាក ឬទៅស្រោចផ្កាមើលធម្មជាតិបៃតង។ល។
៣. ម៉ាស្សា ឬស្អំភ្នែក ឲ្យសរសៃឈាមរត់បានល្អ
ជុំវិញភ្នែកមានសរសៃឈាមជាច្រើន កាលបើសរសៃឈាមរត់មិនបានល្អ វានឹងបណ្ដាលឲ្យស្បែកឆាប់ចាស់ជាងវ័យ ដោយបង្កនូវស្នាមជ្រួញនានា។ គប្បីឧស្សាហ៍ធ្វើការម៉ាស្សានៅតំបន់ជុំវិញភ្នែកថ្នមៗដោយម្រាមដៃ ឬក៏ជ្រលក់កន្សែងនឹងទឹកក្ដៅឧណ្ហៗ រួចយកមកស្អំភ្នែក ដើម្បីឲ្យសរសៃឈាមរត់បានល្អ។ ការធ្វើបែបនេះក៏ជាវិធីសម្រាកភ្នែកមួយបែបផងដែរ ខណៈដែលយើងមានសភាពរួយភ្នែក ឬឈឺភ្នែកកម្រិតស្រាលជាដើម ហើយវាក៏ជួយកាត់បន្ថយបញ្ហារង្វង់ភ្នែកខ្មៅក់ើតឡើងផងដែរ។
៤. ញ៉ាំឲ្យបានល្អ គេងឲ្យបានគ្រប់គ្រាន់
ញ៉ាំរបបអាហារល្អ គឺការញ៉ាំម្ហូបអាហារដែលមានជីវជាតិគ្រប់គ្រាន់ និងចាំបាច់ដល់សុខភាពជាប្រចាំថ្ងៃ។ គប្បីបូករួម អាហារពណ៌លឿងទុំ មានដូចជាដំឡូងសាច់លឿង មើមការ៉ុត ផ្លែស្វាយ ផ្លែសេដា ផ្លែក្រូច ត្រីសាម៉ុនជាដើម សុទ្ធតែជាក្រុមអាហារដែលសម្បូរដោយវីតាមីនដែលជំនួយដល់សុខភាពភ្នែក និងសុខភាពស្បែក។ ទៀតសោត បូករួមនឹងការគេងបានគ្រប់គ្រាន់នឹងទទួលបានប្រសិទ្ធភាពទ្វេដង។ ដោយឡែក ការគេងមិនគ្រប់គ្រាន់ ឬគេងមិនទៀងទាត់ គឺជាកត្តាចម្បងក្នុងការបង្កបញ្ហារង្វង់ភ្នែកខ្មៅនេះឯង។
៥. ប្រើផលិតផលថែទាំស្បែកជុំវិញភ្នែក
ប្រិយមិត្តគួរចាប់ផ្ដើមប្រើផលិតផលបន្តឹងស្បែកជុំវិញភ្នែកឲ្យបានកាន់តែឆាប់កាន់តែល្អ។ ជាទូទៅ ស្បែកជុំវិញភ្នែកនឹងវិវត្តទៅតាមវ័យ ស្នាមជ្រីវជ្រួញនឹងកើតមានម្ដងបន្តិចៗ។ តាមគន្លឹះថែទាំសម្រស់របស់កំពូលតារាៗជុំវិញពិភពលោក ការថែទាំបំប៉នស្បែកជុំវិញភ្នែកគួរធ្វើឡើងនៅពេលមិនទាន់មានស្នាមជ្រីវជ្រួញកើតឡើង ដូច្នេះបើចង់បានស្បែកវ័យ២០ឆ្នាំ គួរចាប់លាបពីវ័យ២០ឆ្នាំឲ្យហើយ ទើបសម្រស់ឋិតឋេរ៕
Article by LENG CHANREASEY
