ខែកញ្ញាសូមលំឱនកាយគោរពស្វាគមន៍ប្រិយមិត្តអ្នកអានទស្សនាវដ្តីសូវរីនទាំងឡាយ! ពិធីបុណ្យកាន់បិណ្ឌដ៏សំខាន់ប្រចាំខែភទ្របទបានចូលមកដល់មិនខុសប្លែកពីបណ្តាឆ្នាំកន្លងទៅនោះទេ ។ នេះហើយជាកម្លាំងចលករជំរុញឲ្យសូវរីនព្យាយាមខិតខំស្វែងរកមាតិកាបង្ហាញអំពីអត្តសញ្ញាណវប្បធម៌ខ្មែរចេញផ្សាយក្នុងអំឡុងខែដ៏ពិសេសនេះ ផ្សារភ្ជាប់វិស័យហ្វេហ្សិនដ៏ស៊ីវិល័យរបស់ក្រុមការងារសូវរីនដែលយើងមិនអាចរំលងបានអមដោយបរិយាកាសមាត់បឹងដ៏ធំល្វឹងល្វើយស្រស់បំព្រងនៅលើទឹកដីខេត្តកំពត ភាគនិរតីនៃប្រទេសកម្ពុជា។
ជាមួយគ្នានេះដែរ យើងនឹងបង្វែរខ្សែចក្ខុរបស់មហាជនប្រុសស្រីឲ្យបានស្គាល់នូវផលិតផលគ្រឿងអលង្ការដ៏ល្អវិចិត្រច្នៃឡើងដោយទឹកដៃដ៏ប៉ិនប្រសប់របស់ក្រុមយុវសិប្បករខ្មែរជំនាន់ថ្មីនេះក្រោមស្លាកយីហោ ALANKA បែប ស្តង់ដារអន្តរជាតិ ព្រមទាំងពាំនាំនូវទស្សនទានហ្វេហ្សិនដែលផ្តល់នូវនិរន្តរភាពបរិស្ថានចែកជូនអស់លោក លោកស្រី អ្នកនាង កញ្ញា ទុកគ្រាន់ជាចំណេះដឹងល្អសម្រាប់ផ្នែកបរិស្ថានក្នុងបរិបទសហសម័យនេះ។ លើសពីនេះទៅទៀត លោកអ្នកក៏នឹងបានស្គាល់ជីវប្រវត្តិ និងស្នាដៃស្រាវជ្រាវដ៏មានតម្លៃកាត់ថ្លៃពុំបានស្តីពីកេរដំណែលស្ថាបត្យកម្មលំនៅឋានប្រពៃណីឬផ្ទះបុរាណខ្មែរ របស់ស្ថាបត្យករដ៏ឆ្នើមមួយរូបគឺ លោក ហុក សុកុល ដែលនិស្សិតស្ថាបត្យកម្មក្នុងស្រុកជាច្រើនពិតជាធ្លាប់បានឃើញឈ្មោះរបស់លោកនៅក្នុងកម្រងអត្ថបទស្រាវជ្រាវមួយចំនួនកន្លងមករួចមកហើយ អមជាមួយនឹងវត្តមានសិល្បករក្នុងជំនាញផ្សេងៗទៀតដូចជា ភាពយន្ត និង នាដសាស្រ្ត ជាដើម នៅលើទំព័របន្តបន្ទាប់។
ដោយឡែក ចំពោះទំព័រទស្សនាចរណ៍ ប្រិយមិត្តទាំងអស់នឹងរំភើបភ្នែកដោយសារអច្ឆរិយភាពនៃក្រុមប្រាសាទសាងសង់ក្នុងសម័យអង្គរ ឬហៅថា រចនាបថសម័យអង្គរ បន្តពីបណ្តាប្រាសាទរចនាបថបុរេអង្គរដែលទស្សនាវដ្តីយើងខ្ញុំធ្លាប់បានផ្សាយនៅក្នុងលេខចេញផ្សាយកាលពីខែកក្កដាកន្លងមក។ រចនាបថគូលែន រចនាបថព្រះគោ រចនាបថ បាខែង និង រចនាបថកោះកែរ នឹងញ៉ាំងទឹកចិត្តរបស់លោកអ្នកឲ្យនឹកស្រមៃដល់ភាពរុងរឿងត្រចះត្រចង់នៃរឿងរ៉ាវប្រវត្តិសាស្រ្តខ្មែរកាលពីជាង១០០០ឆ្នាំមុននៃចក្រភពអង្គរដ៏បវរពិសិដ្ឋលើសលប់។ ទន្ទឹមនឹងប្រាសាទទាំងអស់នោះ វត្តមាននៃសណ្ឋាគារ “ភូមិខ្មែរ” នៅខេត្តសៀមរាប ក៏ដូចជា ភោជនីយដ្ឋាន La Cuisine Khmère នៅភ្នំពេញ សុទ្ធសឹងតែត្រូវបានបង្កើតឡើងក្នុងគោលបំណងចូលរួមចំណែកផ្សព្វផ្សាយជ្រុងមួយនៃវប្បធម៌ខ្មែរឲ្យពិភពលោកបានស្គាល់កាន់តែច្បាស់បន្ថែមទៀត៕
សូមចុចលើតំណភ្ជាប់នេះ ដើម្បីចូលទស្សនាមាតិកាទស្សនាវដ្តីឌីជីថល