Sovrin
Sovrin
នៅក្នុងការចម្អិន មិនថាអ្នកចម្អិនតាមផ្ទះ ឬកំពូលចុងភៅនោះទេ យូរៗម្តងរមែងតែជ្រុលដៃ ដាក់គ្រឿងផ្សំលើស ជាពិសេសគឺបង់អំបិលជ្រុលតែម្តង។ ដូចយើងដឹងស្រាប់ ម្ហូបមានរសជាតិប្រៃគឺពិបាកទទួលទាន ហើយថែមទាំងប៉ះពាល់ដល់សុខភាពទៀតផង។ ដូច្នេះ បើជ្រុលដៃបង់គ្រឿងប្រៃជ្រុល តើគួរកែខៃដោយវិធីណា? តោះ! ថ្ងៃនេះសូវរីននឹងចែករំលែកពីវិធីងាយៗក្នុងការកាត់បន្ថយជាតិប្រៃនៅក្នុងម្ហូបដល់ស្រ្តីមេផ្ទះទាំងអស់គ្នា។
១.ដំឡូងបារាំង៖ ការយកដំឡូងមកប្រើជាវិធីដោះស្រាយសម្រាប់មុខម្ហូបប្រភេទ ស៊ុប ឬសម្លទឹក។ អ្នកគ្រាន់តែយកដំឡូងឆៅមកចិតសម្បកចេញ រួចចិតជាបន្ទះៗ ដាក់ចូលទៅត្រាំក្នុងបាតឆ្នាំងដោយទុករហូតដល់សាច់ដំឡូងប្រែទៅជាថ្លា បន្ទាប់មកស្រង់ដំឡូងនោះចេញជាការស្រេច។ ការធ្វើបែបនេះគឺដើម្បីឲ្យដំឡូងបឺតយកជាតិប្រៃចេញពីស៊ុប។
២.ស្ករស៖ ប្រសិនបើអ្នកគ្មានដំឡូងទេ អ្នកអាចជ្រើសរើសយកស្ករសមកជំនួសបាន។ ដួសស្ករសមួយស្លាបព្រា(តិចច្រើនអាស្រ័យទៅតាមបរិមាណនៃសម្ល)ដាក់ចូលក្នុងឆ្នាំង បន្ទាប់មកទុកឲ្យរលាយជាការស្រេច។
៣.បន្ទះនំបុ័ង៖ អ្នកគ្រាន់តែយកបន្ទះនំបុ័ង៣ទៅ៤ចំណិត(ទៅតាមបរិមាណនៃសម្ល)ដាក់ត្រាំក្នុងសម្ល២ទៅ៣នាទី ដើម្បីឲ្យបន្ទះនំបុ័ងស្រូបយកជាតិប្រៃ។ ក្រោយមកយកបន្ទះនំបុ័ងនោះចេញជាការស្រេច។
៤.បន្ថែមទឹក៖ ចំពោះម្ហូបឆា ឬចំហុយវិញ អ្នកគ្រាន់តែបន្ថែមច្រូចទឹកបន្តិច ឬបើប្រៃខ្លាំងអាចបន្ថែមតាមសមល្មម បន្ទាប់មកទុកមួយសន្ទុះ រួចសម្រិតទឹកនោះចេញវិញដែលវាអាចកាត់បន្ថយជាតិប្រៃបានមួយកម្រិត។ ថ្វីបើធ្វើបែបនេះសាច់ ឬបន្លែអាចឆ្អិនជ្រុលបន្តិច តែវាក៏អាចប្តូររសជាតិពីប្រៃមករសជាតិល្មមអាចបរិភោគបាន។
៥.បន្ថែមបន្លែ ផ្លែឈើ ឬគ្រីម(Cream)៖ ការដាក់បន្ថែម បន្លែ ផ្លែឈើ ឬគ្រីម ទៅក្នុងម្ហូបក៏ជាវិធីមួយទៀតអាចដោះស្រាយបានផងដែរ។ អ្នកអាចដាក់ម្តងបន្តិចរហូតបានរសជាតិដែលអាចទទួលយកបាន។ និយាយទៅ វិធីនេះអាចប្រើចំពោះមុខម្ហូបណាដែលប្រើគ្រឿងផ្សំជាមួយបន្លែផ្លែឈើ ឬគ្រីមប៉ុណ្ណោះ។
៦.បន្ថែមគ្រឿងផ្សំផ្សេងទៀត៖ ដោយឡែកវិធីនេះក៏អាចជួយអ្នកបានមួយចំណែកផងដែរ។ ប្រសិនបើអ្នកមានគ្រឿងផ្សំគ្រប់គ្រាន់អ្នកអាចបន្ថែមចំនួនទ្វេដងទៅក្នុងម្ហូបដែលប្រៃនោះ។ ឧទាហរណ៍ដូចជា ការបន្ថែមខ្ទិះដូង ក្រូចឆ្មារ ឬទឹកខ្មេះជាដើម។ គួរចងចាំថា គួរកុំបន្ថែមគ្រឿងផ្សំណាដែលធ្វើឲ្យខូចរសជាតិ ឬដាក់ជ្រុលពេក។
៧.ដាក់ម្សៅ៖ មុខម្ហូបខ្លះអាចប្រើគ្រឿងផ្សំជាប្រភេទម្សៅមកបន្សាបបានដូចជាម្សៅពោត ម្សៅអង្ករ ម្សៅដំឡូង ម្សៅឆា ឬម្សៅបំពងជាដើម។ ដោយសារម្សៅទាំងនេះមានរសជាតិសាប ដូច្នេះបើមុខម្ហូបប្រៃអ្នកអាចជ្រើសរើសយកម្សៅណាមួយក្នុងចំណោមម្សៅខាងលើមកបន្ថែមក្នុងម្ហូបទៅតាមប្រភេទម្ហូបដែលស៊ីមេទ្រីនឹងម្សៅទាំងនោះ។ ឧទាហរណ៍ដូចជា ម្ហូបឆា ឬស៊ុបក្តាម យើងអាចជ្រើសរើសយកម្សៅឆាមកប្រើ (ម្សៅឆាធ្វើឲ្យម្ហូបមានលក្ខណៈខាប់តិចៗ)។ យើងគ្រាន់តែយកម្សៅឆា១ស្លាបព្រាបាយមកលាយជាមួយទឹកធម្មតាកន្លះចានចង្កឹះកូរឲ្យរលាយ បន្ទាប់មកចាក់ចូលឆា ឬសម្លស៊ុប បើកភ្លើងតិចៗកូរឲ្យសព្វជាការស្រេច។
សង្ឃឹមថាវិធីសាស្រ្តខាងលើនេះ អាចជាចំណេះដឹងតូចមួយបន្ថែមទៀតសម្រាប់ស្ត្រីមេផ្ទះគ្រប់រូប។ ការពិតណាស់ ការទទួលទានអាហារប្រៃវាមិនល្អឡើយចំពោះសុខភាព ព្រោះវាអាចឲ្យយើងប្រឈមជំងឺសម្ពាធឈាម មហារីកក្រពះ ស្តុកជាតិទឹកធ្វើឲ្យហើមរាងកាយ និងជំងឺបេះដូងជាដើម។ សូម្បីតែអាហារខ្លាញ់ច្រើន និងហឹរជ្រុលក៏ត្រូវបានរាប់បញ្ចូលផងដែរ៕
Article by: SOUNG SOKSAN
