ឈ្មោះថា JPok ឬ ជេប៉ូក យុវវ័យភាគច្រើនប្រាកដជាស្គាល់ច្បាស់ ក៏ព្រោះលោកគឺជាតារាចម្រៀងរ៉េបជាន់ថ្មីដ៏មានប្រជាប្រិយភាព ដែលបង្ហាញខ្លួនលេចធ្លោតាមរយៈបទចម្រៀងផ្ទុះជាច្រើនបទនៅរយៈពេលប៉ុន្មានឆ្នាំចុងក្រោយនេះ។ មែនទែនទៅ JPok មិនត្រឹមតែមានទេពកោសល្យលើការរ៉េបប៉ុណ្ណោះទេ លោកថែមទាំងជាផលិតករតន្ត្រី និងជាម្ចាស់ផលិតកម្មចម្រៀងយុវវ័យកំពុងពេញនិយម ENation ផងដែរ។
JPok មានឈ្មោះពិតពេញថា ហ៊ឹម វាសនាសម្បត្តិ លោកមានវ័យ២៨ឆ្នាំ និងជាអ្នកមានស្រុកកំណើតនៅទីក្រុងភ្នំពេញ។ ជំនួបជាមួយ សូវរីន លោកបានរៀបរាប់អំពីដំណើរដើមទងនៃការបោះជំហានចូលវិស័យសិល្បៈថា លោកស្រឡាញ់សិល្បៈតាំងពីពេលខ្លួនកំពុងសិក្សានៅអនុវិទ្យាល័យថ្នាក់ទី៨ម្ល៉េះ ខណៈគ្រានោះការទស្សនាចម្រៀងបរទេសបានជំរុញឲ្យលោកចាប់ផ្តើមចង់ចេះចង់ចាប់ទៅលើការរាំ។ លោកបានប្រមែប្រមូលគ្នាហ្វឹកហាត់រាំបានរយៈពេលមួយឆ្នាំ ក្រោយមកក៏កើតទំនោរទៅលើការធ្វើបទភ្លេង និងច្រៀងវិញ។ ការងាកមកអាជីពចម្រៀង លោកបានរៀនធ្វើភ្លេងដោយខ្លួនឯងតាមរយៈបណ្តាញសង្គម YouTube និងសុំការជួយណែនាំពីរៀមច្បង។ “សម័យនោះមិនទាន់មានគេលក់ភ្លេងដូចឥឡូវទេ បើចង់ចេះភ្លេងក៏អត់មានអ្នកណាមកបង្រៀនដែរ ចឹងមានតែរៀនតាម YouTube តែការរៀននេះពិបាក ព្រោះកាលហ្នឹងយើងនៅក្មេង មិនទាន់យល់ច្បាស់គ្រប់យ៉ាង”។ រយៈពេលរៀនសូត្រប្រហែល៤ឆ្នាំមក JPok បានយល់ច្បាស់ពីការធ្វើភ្លេង ហើយក៏មានឱកាសបានចូលធ្វើការនៅក្នុងផលិតកម្ម Rock។ ធ្វើការនៅផលិតកម្មនេះ ជាឱកាសឲ្យលោកបានរៀនសូត្របន្ថែមពីផលិតករតន្ត្រីបរទេស បន្ទាប់មកលោកបានចេញទៅសិក្សាវគ្គខ្លីមួយខែបន្ថែមទៀតនៅឯប្រទេសវៀតណាម។ ជាអ្នកស្រឡាញ់តន្ត្រី JPok ថាមួយថ្ងៃៗលោកនៅតែជាមួយតន្ត្រីដូច ទឹកនិងត្រី ស្រមោចនិងស្ករទៅហើយ។
សម្រាប់ការបោះជំហានលើវិស័យចម្រៀង JPok ថាដំបូងខ្លួនមិនទាន់ដឹងច្បាស់ថាស្រឡាញ់ការច្រៀងបែបណាមួយនៅឡើយ ដូចនេះលោកបានចាប់ផ្តើមពីការច្រៀងបទបែបមនោសញ្ចេតនា។ ក្រោយមកពេលបានជួបជាមួយតារាចម្រៀងរ៉េបរៀមច្បង ពូឃ្លាំង និង នេនទុំ ទើបលោកចាប់ផ្តើមរកឃើញខ្លួនឯង ហើយងាកមកការច្រៀងចម្រៀងរ៉េបវិញមកដល់សព្វថ្ងៃ។
ភាព Unique ឬភាពដោយឡែករបស់ JPok គឺច្រៀងរ៉េបជាមួយចង្វាក់ភ្លេង Reggaeton និងចង្វាក់ R&B Trap ខណៈដែលតារារ៉េបដទៃនៅកម្ពុជាយើងកម្ររ៉េបជាមួយចង្វាក់ភ្លេងនេះណាស់។ លោកលើកឡើងថា “ខ្ញុំព្យាយាមធ្វើវាទោះដឹងថាពិបាកទទួលយកការគាំទ្រដោយសារតែវាថ្មីពេក ម្យ៉ាងស្ទាយ៌នៃការរ៉េបក៏ខុសគេដែរ តែខ្ញុំមានគោលគំនិតមួយថា ខ្ញុំចង់ធ្វើអ្វីដែលប្លែក ហើយជាលទ្ធផលចុងក្រោយឃើញថាមានការគាំទ្រច្រើន”។ កន្លងមកបទចម្រៀងដែលផ្ទុះការចាប់អារម្មណ៍ខ្លាំងមានដូចជាបទ «សង្សារផិតមិត្តក្បត់» «ប្រូតេអ៊ីនស្នេហ៍» «ខកបំណង» «អូនកុំភ័យ» «រកតែស្អាត រកតែមានដុល្លារ» និង«ដុសធ្មេញផង»ជាដើម។
ជាអ្នកនិពន្ធសាច់ភ្លេងផង សរសេរទំនុកច្រៀងផង និងច្រៀងផងនោះ JPok ថាកន្លងមកលោកជួបផលលំបាកច្រើន តែគ្រប់យ៉ាងទាំងប៉ុន្មានគ្រាន់តែជាមេរៀនសម្រាប់លោកមកដល់សព្វថ្ងៃ ដូច្នេះបច្ចុប្បន្នមិនមានអ្វីជាផលលំបាកសម្រាប់លោកទៀតឡើយ។ លោកចែករំលែកពីការធ្វើបទចម្រៀងថា មុនពេលយើងធ្វើបទចម្រៀងប្រភេទណាមួយ យើងចាំបាច់សិក្សាឲ្យបានច្បាស់ថាយើងស្រឡាញ់បទអ្វីចង្វាក់អ្វី ព្រោះបើមិនច្បាស់វាអាចនាំផលមិនល្អសម្រាប់អ្នកដែលគេធ្វើមុនយើង។ ចំពោះការសរសេរទំនុកច្រៀង ជាទូទៅអ្នកនិពន្ធតែងយកអារម្មណ៍របស់ខ្លួន ឬអារម្មណ៍នរណាម្នាក់ដែលជាមិត្តជិតស្និទ្ធមកសរសេរ តែយ៉ាងណាយើងគួរព្យាយាមពិនិត្យឃ្លោងឃ្លាចុះឡើងដើម្បីកុំឲ្យមានពាក្យពេចន៍ស្តាប់ទៅមិនសមរម្យ។ និយាយរួម ការនិពន្ធធ្វើយ៉ាងណាប្រិតប្រៀង គួរកុំធ្វើតែមួយភ្លែត ព្យាយាមមើលចុះឡើងៗ សូម្បីតែភ្លេងក៏ត្រូវស្តាប់ចុះឡើងៗឲ្យឃើញកំហុសខ្លួនឯងដើម្បីកុំឲ្យចេញទៅមានបញ្ហា។
ជាផលិតករមានឈាមជ័រខ្មែរ ជាញឹកញយ JPok ឧស្សាហ៍យកភ្លេងខ្មែរមកបញ្ចូលក្នុងការផលិតចម្រៀងរបស់ខ្លួនផងដែរ ដូចជា ស្គរដៃ រនាត ទ្រ និងខ្លុយជាដើម។ ដូចបានជ្រាបនៅខាងដើម JPok មិនត្រឹមតែជាតារាចម្រៀង និងជាផលិតករតន្ត្រីប៉ុណ្ណោះទេ លោកថែមទាំងមានផលិតកម្មជារបស់ខ្លួនទៀតផង។ ជាក់ស្តែង ផលិតកម្ម ENation ត្រូវបានបង្កើតឡើងនៅឆ្នាំ ២០១៧ និងចាប់ផ្តើមសកម្មខ្លាំងចាប់ពីឆ្នាំ ២០២០មក។ ផលិតកម្មរបស់លោកផ្តោតទៅលើចម្រៀងយុវវ័យសម័យថ្មី មានតារាចម្រៀងច្រៀងជាក្រុម និងតារាចម្រៀងរ៉េប សរុបសមាជិកប្រហែល២០នាក់ ក្នុងនោះមានក្រុមចម្រៀងចំនួន៣ គឺ «The Hyper» «RE-SPEED» និង «AZA»។ ការបង្កើតផលិតកម្មគឺជាក្តីស្រមៃរបស់លោកផ្ទាល់ លោកថាពេលលោកធ្វើអ្វីឲ្យគេគឺធ្វើមិនពេញដៃនោះទេ តែពេលដែលធ្វើឲ្យខ្លួនឯង លោកបានបង្ហាញពីអ្វីដែលជាក្តីស្រមៃរបស់ខ្លួន។ “ ខ្ញុំចង់ធ្វើអ្វីមួយដែលចេញមកមានលក្ខណៈប្លែក វាអាចថាពិបាកទទួលយកតែខ្ញុំជឿថាមានអ្នកត្រូវការដូចគ្នា”។ ដោយឡែក ការបង្កើតផលិតកម្មមួយមិនមែនជារឿងងាយស្រួលឡើយ លោកក៏និយាយដែរថា “ វាមានភាពពិបាកខ្លាំង អាចសឹងថាចង់ឈប់ហើយដកខ្លួនចេញពីវិស័យហ្នឹងដែរ ប៉ុន្តែដោយមានកូនចិត្តមួយថាត្រូវតែធ្វើរឿងហ្នឹងឲ្យបាន ក៏ចេះតែខិតខំបន្តរហូតទទួលបានការគាំទ្រជាបន្តបន្ទាប់ជាមួយបទថ្មីពីមួយទៅមួយ។” ក្តីស្រមៃក្នុងការបង្កើតផលិតកម្មនេះ លោកចង់ឲ្យសិល្បករទាំងអស់ល្បីមិនត្រឹមតែនៅស្រុកខ្មែរប៉ុណ្ណោះទេ តែចង់ឲ្យល្បីជាសកលផងដែរ។ លោកជឿថាអ្វីដែលលោក និងក្រុមការងារកំពុងធ្វើអាចនឹងសម្រេចបាន ព្រោះលោក និងក្រុមការងារមានឆន្ទៈតែមួយ និងសាមគ្គីភាពគ្នាខ្លាំង។
ក្នុងនាមជាសិល្បករចម្រៀង និងជាផលិតករជំនាន់ថ្មី លោកសំណូមពរដល់មហាជនគួរព្យាយាមបើកចិត្តស្តាប់និងមើលឲ្យបានច្រើន ទោះវាចេញមកថ្មីពេក វាមិនដូចបរទេស តែយើងជាយើង។ លោកថា “ គ្មាននរណាមកគាំទ្រយើងមុនគេ ក្រៅពីខ្មែរគ្នាឯងឡើយ បើមិនជួយគ្នាឯងទេ ក៏គ្មានជាតិសាសន៍ណាមកជួយយើងដែរ។ អ្វីដែលខ្ញុំធ្វើក៏ដើម្បីជាតិសាសន៍មួយនេះដូចគ្នា ខ្ញុំចង់ធ្វើអ្វីជារបស់យើង ហើយបង្ហាញទៅកាន់បរទេសថានេះជាស្នាដៃរបស់យើង”៕
Article by HEMSOKKHIM