ភោជនីយដ្ឋានឯកទេសម្ហូបខ្មែរភូមិភាគឦសាន-ឡាវ ដែលឆ្ងាញ់ពិបាករកនៅភ្នំពេញ
TRAVEL & LIVING 2 years agoមនុស្សកើតមករមែងមានរសនិយមខុសៗគ្នា។ អ្នកខ្លះចូលចិត្តនេះ អ្នកខ្លះចូលចិត្តនោះ ហើយចំណង់ចំណូលចិត្តនៃរសជាតិអាហារក៏មិនដូចគ្នាដែរ។ សម្រាប់ពុកម៉ែបងប្អូនមីងមាទាំងឡាយណាដែលធ្លាប់ទៅលេងភូមិភាគឦសាន ព្រំដែនខ្មែរ-ឡាវ ច្បាស់ជាមិនភ្លេចទេនូវមត៌ករសជាតិម្ហូបម្ហារបស់អ្នកស្រុកភាគខាងលើដែលមានលក្ខណៈខុសប្លែកពីម្ហូបអ្នកស្រុកកណ្តាលទូទៅ ពោលគឺមានគ្រឿងផ្សំ ក្លិន រសជាតិ និង វិធីធ្វើមួយបែបដោយឡែកដែលអ្នកទេសចរភាគច្រើនរមែងតែងចង់ភ្លក់ចង់សាកចង់ដឹង។ ដោយសារសម្លឹងឃើញតម្រូវការមត៌ករសជាតិអាហារដើមទាំងនោះហើយ ទើបលោកស្រី ប៊ុនហេង សូរិយា អតីតនិស្សិតជំនាញទេសចរណ៍ និងបដិសណ្ឋារកិច្ច ជាអ្នកស្រុកស្ទឹងត្រែងផ្ទាល់ បានពាំនាំជម្រើសមុខម្ហូបតំបន់ជុំវិញនោះជាច្រើនមុខមកចម្អិនជូនអ្នកភ្នំពេញឲ្យបានសាកល្បង។
ស្ថាបនិក និងជាអ្នកគ្រប់គ្រងភោជនីយដ្ឋាន ខ្មែរឥសាន ផ្ទាល់បានផ្តល់បទសម្ភាសន៍ឲ្យ សូវរីន បានដឹងថា លោកស្រីបានចាប់ផ្តើមមុខរបរលក់អាហារចាប់តាំងពីអំឡុងឆ្នាំ២០១៦មកម្ល៉េះ។ មូលហេតុដែលជំរុញឲ្យលោកស្រីចាប់ផ្តើមអាជីវកម្មនេះដំបូងគឺមកពី កាលនោះលោកស្រីជាអាជីវករម្នាក់នៅផ្សារធំថ្មី ហើយអ្នកលក់ដូរនៅផ្សារដូចគ្នាដែលធ្លាប់ធ្វើដំណើរឡើងចុះទៅកាន់ប៉ែកស្រុកឦសាន ថៃ-ឡាវ នឹកចង់ទទួលទានអាហារដែលពួកគេធ្លាប់ទទួលទាននៅស្រុកនោះ។ ដោយសារ លោកស្រីចេះធ្វើម្ហូបទាំងនោះ ហើយធ្លាប់ឲ្យមិត្តអាជីវករទាំងនោះភ្លក់ទៅឆ្ងាញ់ចាប់មាត់ ពួកគេក៏ស្នើសុំឲ្យលោកស្រីជួយចម្អិនម្ហូបបែបនោះឲ្យពួកគេទទួលទានជារឿយៗនៅពេលពួកគេនឹកចង់។ ការជួយធ្វើម្ហូបតាមសំណូមពរអាជីវករជិតខាងម្តងហើយម្តងទៀតនាំឲ្យលោកស្រីក៏ទទួលបានការផ្តល់យោបល់ពីអ្នកទាំងនោះឲ្យយកជំនាញនេះជាមុខរបរអាជីពជាប់តែម្តងទៅ។ ជាលទ្ធផល នៅឆ្នាំ២០១៧ ភោជនីយដ្ឋានថ្មីសន្លាង «ខ្មែរឥសាន» ផ្សារភ្ជាប់បរិយាកាសមានខ្យល់អាកាសខាងក្រៅ (Outdoor) បានចាប់បដិសន្ធិឡើងនៅម្តុំក្រោយស្តុប Nokia សង្កាត់អូរបែកក្អម ខណ្ឌសែនសុខ រាជធានីភ្នំពេញ ហើយទទួលបាននូវការគាំទ្រពីអតិថិជនជាហូរហែរហូតមកដល់បច្ចុប្បន្ន។
លោកស្រី ប៊ុនហេង សូរិយា
ដោយសារលោកស្រីជាអ្នកស្រុកស្ទឹងត្រែងស្រាប់ គួបផ្សំនឹងគំនិតច្នៃប្រតិដ្ឋផ្នែកអាជីវកម្មយ៉ាងចំណាន លោកស្រីបានបង្កើតជម្រើសមុខម្ហូបខ្មែរ ថៃ ឡាវ មិនក្រោម៥០មុខនោះទេ សម្រាប់អតិថិជនជ្រើសរើសបានតាមចំណង់ចំណូលចិត្ត។ ម្ហូបដែលទទួលបាននូវការពេញនិយម រួមមានជាអាទិ៍ សម្លប្រហើរម្សៅ មីចាណាង បុកល្ហុងឡាវ បុកល្ហុងខ្មែរ ខម៉ាំឥសាន (ពិសេសប្រចាំហាង) សាច់ក្រកឦសាន ឡាបប្រហុក ឡាបត្រីស្លាត ភ្លាសាច់គោឡាវ ផ្អកជូរស្ទឹងត្រែង ប៉ាខេម (ម្ហូបស្ទឹងត្រែង-ឡាវ)។ល។ គួរកត់សម្គាល់ផងដែរថា ឈុតបុកល្ហុងរួម ឬ បុកល្ហុងឡាវដែលជាម្ហូបលក់ដាច់ជាងគេប្រចាំហាងមានលក្ខណៈពិសេសខុសប្លែកពីបុកល្ហុងធម្មតាត្រង់មិនប្រើសណ្តែកដី ប្រើប្រហុកបែបឡាវរសជាតិដើមនាំចូលពីស្ទឹងត្រែង (មិនមែនប្រហុកទិញពីផ្សារទូទៅ) រសជាតិចាស់ដិតមុត ហិរឆ្ងាញ់ មិនផ្អែមស្រាលៗនោះទេ ត្រូវនឹងឱជារសស្រាបៀរឡាវ ភេសជ្ជៈផ្តាច់មុខប្រចាំហាង។ លើសពីនេះទៅទៀត ភោជនីយដ្ឋានរបស់លោកស្រីក៏មានទទួលធ្វើម្ហូបចម្អិនពីគ្រឿងផ្សំធម្មជាតិពិសេសៗតាមរដូវកាលដែលសម្បូរនៅខេត្តរបស់គាត់ ដូចជា ត្រីប៉ាសេអ៊ី ត្រីប៉ាវ៉ា ផ្សិតប៉ក់ ឬ ផ្សិតផូងផាំង ទំពាំងព្រេច ផ្សិតក្ងោក ជាដើម។ លោកស្រីបញ្ជាក់ថា ត្រីប៉ាសេអ៊ី និងប៉ាវ៉ា សម្បូរអំឡុងខែវិច្ឆិកា-ធ្នូ។ ឯទំពាំងព្រេច ភ្ញៀវអាចកម្ម៉ង់បាន នៅរដូវខែភ្លៀង អំឡុងខែមិថុនា-កក្កដា។
ឈុតបុកល្ហុងខ្មែរឥសានប្រើប្រហុកបែបឡាវ
ជោគជ័យនៃអាជីវកម្មអាហាររបស់លោកស្រីស្តែងឲ្យឃើញតាមរយៈការជួយគាំទ្រតាំងពីអតិថិជនដែលចូលមកហាងទូទៅ ភ្ញៀវអនឡាញ និង ម៉ូយពិសេសលំដាប់តារាដែលមានកេរ្តិ៍ឈ្មោះបោះសំឡេងក្នុងរង្វង់សិល្បៈ។ សិល្បការិនីពហុជំនាញ ខាត់ សុឃីម និង ពិធីការិនី CTN ដ៍ល្បីល្បាញ ខៀវ សានសាណា សុទ្ធសឹងតែជាអតិថិជនដែលធ្លាប់ទទួលទានម្ហូបខ្មែរឥសាន គាំទ្រស្ងើចសរសើរចំពោះរសជាតិ និង ថែមទាំងជួយផ្សព្វផ្សាយដោយសុទ្ធចិត្ត មិនមែនជាលក្ខណៈរូបភាពពាណិជ្ជកម្ម ទៀតផង។ ម្ចាស់ហាងបានអះអាងថា កន្លងមក មានអ្នកសុំរៀនជំនាញធ្វើម្ហូបបែបនេះ និង អ្នកចង់សហការជំនួញជាមួយមកទាក់ទងលោកស្រីដែរ ប៉ុន្តែលោកស្រីកំពុងពិចារណារង់ចាំមើលឱកាសល្អសិន។ ទោះបីជាយ៉ាងណា ក៏លោកស្រីបានសម្តែងនូវក្តីព្រួយបារម្ភដែរ ប្រសិនបើមត៌ករសជាតិទាំងនេះត្រូវបាត់បង់ជាយថា ហេតុដោយគ្មានអ្នកបន្តវេននៅថ្ងៃអនាគត។ សម្រាប់អតិថិជនដែលចង់ស្វែងរកទីតាំងហាង ឬ ចង់ជាវអនឡាញ អាចទាក់ទងលោកស្រីផ្ទាល់តាមរយៈលេខទូរសព្ទ ០១០ ៩៣៣ ៣៣៩៕
Article by SRIN SOKMEAN
សម្លប្រហើរម្សៅ