Sovrin
Sovrin
«សម័យនិម្មិត» ជាឈ្មោះក្រុមអ្នកច្នៃម៉ូដហ្វេហ្សិនកែច្នៃឡើងវិញឬហៅថា Recycled Fashion Designer ដែលបានបង្កើតឡើងចាប់តាំងពីអំឡុងឆ្នាំ ២០១៩ ជាមួយសមាជិកក្នុងក្រុមចំនួន៦នាក់។ ចំណោមសមាជិកនៃក្រុមនេះគឺសុទ្ធសឹងតែមានភាពប៉ិនប្រសប់ និងជំនាញខុសៗគ្នា។ ជាក់ស្តែង ថ្វីដ្បិតតែសមាជិកម្នាក់ៗមានចំណេះជំនាញផ្សេងៗក៏ពិតមែន ប៉ុន្តែកត្តាទាំងអស់នេះហើយដែលបានជំរុញ និងបន្ថែមចំណុចខ្វះខាតទៅសមាជិកក្នុងក្រុមនីមួយៗ បង្កើតបានជាខូឡិកហ្សិនច្នៃពីកាកសំណល់ប្លាស្ទិកដ៏ទាក់ទាញដែលរមែងផ្សារភ្ជាប់នឹងសារអប់រំសម្រាប់ប្រជាជនកម្ពុជាឈ្វេងយល់ពីផលប៉ះពាល់ដល់ភាវរស់ ជាពិសេស បញ្ហាសុខភាពរបស់យើងតែម្តង។
ខូឡិកហ្សិនដែលមានឈ្មោះថា «សត្វព្រៃ» ឬ «The Wildlife» ជាឈុតសម្លៀកបំពាក់ហ្វេហ្សិនដ៏មានរសនិយមដែលបង្ហាញពីអំបូរសត្វព្រៃដ៏កម្រនៅក្នុងប្រទេសកម្ពុជាដែលស្ទើរតែផុតពូជទាំងស្រុង។ ជាក់ស្តែង បើតាមការលើកឡើងរបស់ប្រធានក្រុមសម័យនិម្មិត កញ្ញា ងួន ចាន់ស្រីម៉ា បានបង្ហាញពីកត្តាសំខាន់មួយចំនួនទាក់ទងនឹងការច្នៃខូឡិកហ្សិននេះយ៉ាងដូច្នេះថា “ក៏ព្រោះតែប្រភេទសត្វព្រៃជាច្រើននៅកម្ពុជា ទាំងសត្វពាហនៈមួយចំនួនទៀតដែលទទួលស្គាល់ដោយអង្គការ IUCN ឬសហភាពអភិរក្សពិភពលោកកំពុងរងការគំរាមកំហែង និងមានគ្រោះថ្នាក់ធ្ងន់ធ្ងរដោយសារការកាប់បំផ្លាញព្រៃឈើដែលជាទង្វើបំផ្លិចបំផ្លាញជម្រករបស់សត្វព្រៃទាំងអស់នេះ ទើបធ្វើឲ្យក្រុមសម័យនិម្មិតរបស់ពួកយើងជ្រើសរើសយក Concept ដែលដកស្រង់ពីសត្វព្រៃមួយចំនួនដូចជា សត្វកែះ សត្វប្រម៉ា សត្វខ្លាត្រី សត្វពង្រូល និងសត្វដំរីព្រៃមកធ្វើជាខូឡិកហ្សិន The Wildlife។” ប្រធានក្រុមសម័យនិម្មិតក៏បានបញ្ជាក់ទៀតថា “មុននឹងចាប់ផ្តើមច្នៃខូឡិកហ្សិនពួកយើងបានធ្វើការស្រាវជ្រាវយ៉ាងល្អិតល្អន់ស្រង់ពីឯកសារផ្លូវការនានា តួយ៉ាង ពីប្រភពជីវៈចម្រុះនៃប្រទេសកម្ពុជា VOD សៀវភៅថនិកសត្វកម្ពុជា Wonders of the Mekong រួមទាំងប្រភពព័ត៌មានពីកោះសន្តិភាពជាដើម។” យ៉ាងណាមិញ ខូឡិកហ្សិនដែលមានចំនួន៥ឈុតគឺសុទ្ធសឹងតែមានការរចនាច្នៃម៉ូដពីសមាជិកក្រុម ដូចជា ឈុតសម្លៀកបំពាក់សត្វកែះ (Capricornis Sumatraensis) គឺជាការស្នាដៃច្នៃម៉ូដរបស់កញ្ញា ងួន ចាន់ស្រីម៉ា បង្ហាញពីការរស់នៅរបស់សត្វកែះដែលត្រូវបានចុះក្នុងបញ្ជីក្រហមនៃអង្គការ IUCN (VU) ជាប្រភេទសត្វងាយរងគ្រោះថ្នាក់ជាសាកល។ ប្រភេទសត្វកែះនេះដែរ ត្រូវការការរស់នៅក្នុងទីកន្លែងមានដង់ស៊ីតេកម្រិតទាប និងកម្រឃើញវារស់នៅតាមទំនប់ ឬតាមទំនាបវាលស្មៅនោះឡើយ។ សត្វកែះកំពុងប្រឈមមុខនឹងការរងគ្រោះថ្នាក់ដោយសារបាត់បង់ទីជម្រក និងទទួលរងការការប្រមាញ់របស់ព្រានព្រៃបបរបាញ់ ដើម្បីយកសាច់ ស្នែង ឆ្អឹង សម្រាប់ជួញដូរ ក៏ព្រោះតែសត្វប្រភេទនេះមានតម្លៃខ្ពស់។ ដោយឡែក ចំពោះឈុតសម្លៀកបំពាក់បន្ទាប់នោះគឺជាការច្នៃម៉ូដពីប្រភេទសត្វ ប្រម៉ា (Porcupine) ត្រូវបានចុះក្នុងបញ្ជីសៀវភៅក្រហមនៃអង្គការ IUCN ស្ថិតក្នុងចំណោមប្រភេទសត្វដែលមានកំពុងប្រឈមគ្រោះថ្នាក់ និងមានការប្រមាញ់ច្រើនមិនខុសពីប្រភេទសត្វកែះនោះទេ។ សត្វប្រម៉ាភាគច្រើនមានទីជម្រកក្នុងរូងដី ក្នុងព្រៃគ្រប់ប្រភេទ ហេតុដូច្នេះ ទើបវាងាយរងការប្រមាញ់បំផុត។ អវយវៈរបស់សត្វប្រម៉ាគឺជាផ្នែកមួយដែលស្រួលនឹងធ្វើអាជីវកម្មផងដែរ។ ជាមួយគ្នានេះដែរ ដំរីអាស៊ី (Asian Elephant) ជាឈុតសម្លៀកបំពាក់ច្នៃម៉ូដដោយអ្នកច្នៃម៉ូដ ចេក ចាន់នីន។ តាមរយៈការស្រាវជ្រាវបានបង្ហាញឲ្យដឹងថា ដំរីអាស៊ី នៅលើពិភពលោកបានថយចុះប្រមាណជាង ៥០ ភាគរយ រីឯទីជម្រកវិញនោះត្រូវបានបាត់បង់ប្រមាណជាង ៩០ភាគរយឯណោះ។ ប្រភេទ ដំរីអាស៊ី ត្រូវបានចាត់ទុកថាជាប្រភេទសត្វបង្គោលដ៏សំខាន់ ក៏ព្រោះតែវាបានបង្ហាញពីផ្នែកវប្បធម៌ តួនាទីដែលស្ថិតក្នុងប្រព័ន្ធអេកូឡូស៊ី រួមនឹងសក្តានុពលផ្សេងៗទៀតផងដែរ។ បច្ចុប្បន្ន ដំរីអាស៊ី រងការគំរាមកំហែងពីការអន្ទាក់ជាច្រើនកន្លែងគួរឲ្យព្រួយបារម្ភ។ ឈុតហ្វេហ្សិនបន្ទាប់នោះគឺមានការរចនាច្នៃម៉ូដពីលោក ជា សុធារ៉ា ក្នុងទម្រង់សត្វខ្លាត្រី (Prionailurus Viverrinu) ដែលភាគច្រើនហៅថាឆ្មាព្រៃជាប្រភេទសត្វដែលស្ថិតនៅក្នុងបញ្ជីក្រហមនៃអង្គការ IUCN ។ សត្វខ្លាត្រីនេះភាគច្រើនសង្កេតឃើញរស់នៅក្នុងទូទាំងអាស៊ីខាងត្បូង និងអាស៊ីអាគ្នេយ៍ វាជាប្រភេទសត្វខ្លាព្រៃដែលស្រឡាញ់តំបន់ដីសើម ឬព្រៃកោងកាង ក៏ដូចជាព្រៃរបោះដូចជាវាលភក់ទន្លេមេគង្គជាដើម។ ឯឈុតចុងក្រោយ ជាស្នាដៃរចនាច្នៃម៉ូដដោយ លោកហុង សុងហេង ដកស្រង់ពីប្រភេទសត្វពង្រូលដែលត្រូវបានចុះក្នុងបញ្ជីរបស់អង្គការ IUCN កំពុងទទួលរងការគំរាមកំហែងខ្លាំងបំផុតឈានទៅដល់ចំណុចហានិភ័យអាចនឹងផុតពូជនៅលើពិភពលោក។ បើតាមការផ្អែកលើទិន្នន័យនៃការស្រាវជ្រាវ ពុំអាចកំណត់អាយុជីវិតដែលមានរស់នៅឡើយនោះទេ ក៏ព្រោះសត្វមួយពួកនេះបាត់បង់ជីវិតដោយការបរបាញ់និងការដាក់អន្ទាក់សម្រាប់ធ្វើអាជីវកម្មផងដែរ។
ខូឡិកហ្សិន «The Wildlife» មានចំនួន៥ឈុតសុទ្ធសឹងតែបង្កប់អត្ថន័យយ៉ាងជ្រាលជ្រៅលាយឡំខ្លឹមសារអប់រំទាក់ទងនឹងការអភិរក្សសត្វព្រៃ ការស្រឡាញ់ និងថែទាំបរិស្ថានឲ្យកាន់តែមានសោភ័ណភាពតាមរយៈការប្រើប្រាស់កាកសំណល់ប្លាស្ទិកច្នៃជាឈុតសម្លៀកបំពាក់ហ្វេហ្សិនដ៏គួរឲ្យគយគន់ដែលបានផ្សារភ្ជាប់ទៅនឹងតថភាពសង្គមបច្ចុប្បន្ន។ គួររំឭកផងដែរថា ក្រុមអ្នកច្នៃម៉ូដហ្វេហ្សិនកែច្នៃឡើងវិញ (Recycled Fashion Designer) បានចូលរួមកិច្ចការសង្គមជាច្រើនតាមរយៈការដើរបង្ហាញម៉ូដហ្វេហ្សិន ដើម្បីធ្វើជាមូលនិធិជួយដល់មន្ទីរពេទ្យគន្ធបុប្ផា ហើយច្នៃខូឡិកហ្សិនលេចធ្លោមួយឈ្មោះថា «សញ្ញា» ដែលបង្ហាញអត្ថន័យពីស្លាកសញ្ញាចរាចរណ៍សំខាន់ៗដែលប្រជាជនខ្មែរគួរឈ្វេងយល់ផងដែរ៕
Article by Sivly
