សិល្បករ ហួរ សុបិន មានវ័យ ២៤ ឆ្នាំ មានស្រុកកំណើតមកពីខេត្តសៀមរាបជានិស្សិតកំពុងសិក្សាឆ្នាំទី៤ផ្នែកគិលានុបដ្ឋាក នៃសាកលវិទ្យាល័យមួយកន្លែងនៅរាជធានីភ្នំពេញដែលមានប្រជាប្រិយភាពមួយរូប និងមានការគាំទ្រគួរឲ្យកត់សម្គាល់ពីស្រទាប់យុវវ័យផងដែរ។ ជាក់ស្តែង មកដល់បច្ចុប្បន្ននេះស្នាដៃសិល្បៈគំនូររបស់លោកជាច្រើនផ្ទាំងធ្លាប់ដាក់តាំងបង្ហាញក្នុងពិព័រណ៍ផ្សេងៗជាច្រើនលើកច្រើនសារ ព្រមទាំងធ្លាប់យកទៅប្រកួតរហូតទទួលបានជ័យលាភីគួរឲ្យកត់សម្គាល់។
នៅអំឡុងខែធ្នូ ឆ្នាំ២០១៨ លោកបានបង្ហាញស្នាដៃរបស់ខ្លួនដែលជារូបគំនូរមួយផ្ទាំងក្រោមចំណងជើង «ព្រះឆាយាលក្ខ័ព្រះនាងជ័យរាជទេវី» ចូលរួមប្រកួតក្នុងកម្មវិធី «Kbach Art Competition 2018» ប្រារព្ធស្ថិតនៅក្នុងខេត្តសៀមរាប ដោយទទួលបានជ័យលាភីលេខ១។ ក្រោយមកនៅក្នុងខែឆ្នាំ និងខេត្តដដែលនេះលោកក៏បានចូលរួមប្រកួតក្នុងកម្មវិធីមួយទៀតគឺ «Young Artist by Soo Art Center» ដែលទទួលបានជ័យលាភីលេខ ២ ជាមួយនឹងគំនូរ ក្រោមប្រធានបទ «សេចក្តីស្រឡាញ់» ។ ជាមួយនឹងស្នាដៃលេចធ្លោទាំងនេះ បានធ្វើឲ្យវិចិត្រករ សុបិន ចាប់ផ្តើមវិវឌ្ឍខ្លួនជាលំដាប់ ហើយក៏មានការគាំទ្រយ៉ាងច្រើនពីសំណាក់ភ្ញៀវជាតិ និងអន្តរជាតិ។
Image Courtesy by SOBEN
ការចាប់ផ្តើមលើអាជីពជាសិល្បករផ្នែកគំនូរ នៅអំឡុងពេលសិក្សាថ្នាក់វិទ្យាល័យលោកបានរៀនគូរគំនូរនៅសាលាមួយក្នុងខេត្តសៀមរាបដែលជាទឹកដីកំណើតរបស់ខ្លួន។ ក្រោយពីលោកបានបញ្ចប់ការសិក្សាកម្រិតថ្នាក់ទុតិយភូមិ (ចប់កម្រិតថ្នាក់បាក់ឌុប) លោកបានបន្តការសិក្សានៅទីក្រុងភ្នំពេញផ្នែកគិលានុបដ្ឋាក ហើយក៏សម្រេចចិត្តបោះបង់ការគូរគំនូរដោយយល់ឃើញថាជំនាញចាប់យកផ្ទុយគ្នាស្រឡះ។ ក៏ព្រោះតែការគូររូបជាចំណូលចិត្តរបស់ខ្លួនតាំងពីកំណើត ម្យ៉ាងមានការជំរុញពីអ្នកជុំវិញខ្លួនផងនោះ ហាក់ធ្វើឲ្យយុវជនរូបនេះសម្រេចចិត្តចាប់ផ្តើមបោះជំហានសារជាថ្មីលើវិស័យគំនូរវិញមកដល់សព្វថ្ងៃ។ ទន្ទឹមនឹងស្នាដៃជាច្រើនទទួលបានការគាំទ្រ វិចិត្រករ សុបិន ក៏បានរៀបរាប់អំពីផលលំបាកដូច្នេះថា “ សម្រាប់ការគូរគំនូរខ្ញុំជួបផលលំបាកច្រើនរហូតធ្វើឲ្យខ្ញុំស្ទើរតែបោះបង់ម្តងម្កាលទៅហើយ។ ផលលំបាកទីមួយនៅពេលដែលខ្ញុំប្រឡងជាប់នៅ Kbach Art Competition ដំបូងខ្ញុំមិនទាន់មានបទពិសោធន៍ច្រើន ហើយភាគច្រើនគេបង្រៀនពីសិល្បៈ ដូច្នេះខ្ញុំត្រូវខិតខំព្យាយាមរៀនសូត្រ និងស្វែងយល់ពីសិល្បៈបន្ថែមឲ្យបានច្រើន។ ជាពិសេសនៅពេលមានពិព័រណ៍ម្តងៗខ្ញុំមិនទាន់មានអ្វីមួយដែលសម្គាល់ជាអត្តសញ្ញាណស្នាដៃរបស់ខ្លួនច្បាស់លាស់ ដែលធ្វើឲ្យគេស្គាល់ថាជារបស់ខ្ញុំនោះទេ។ តែយ៉ាងណាមកដល់សព្វថ្ងៃខ្ញុំបានសិក្សាពីវាបានច្រើនជាងមុន ទោះពេលខ្លះនៅមានផលលំបាកតិចតួចនៅឡើយក៏ដោយ។ រីឯផលលំបាកមួយទៀត ដោយសារតែខ្ញុំរៀនជំនាញផ្នែកគិលានុបដ្ឋាក ដូចនេះខ្ញុំត្រូវបែងចែកពេលវេលាសម្រាប់រៀនផង គូរគំនូរផង និយាយទៅមានពេលតិចតួចមែនទែនសម្រាប់ការគូរគំនូរនេះ”។
ជាវិចិត្រករវ័យក្មេងមួយរូប សុបិ នអាចគូរគំនូរបានច្រើនប្រភេទមិនថាការគូរដោយប្រើខ្មៅដៃ គំនូរប្រេង គំនូរពណ៌ទឹក និងគំនូរបែបឌីជីថល។ លោកចូលចិត្តគូរប្រើពណ៌ប្រផេះឬពណ៌សខ្មៅ ជាគំនូរមានលក្ខណៈមើលទៅដូចជាថ្មជាដើម។ រីឯផ្នត់គំនិតភាគច្រើនលោកចូលចិត្តបង្កប់តម្លៃអប់រំចំពោះរឿងរ៉ាវក្នុងសង្គម វប្បធម៌ ឬការលើកតម្កើងទៅលើអ្វីមួយ។ ដូចមួយរយៈចុងក្រោយនេះលោកផ្តោតគូរតែរូបស្រ្តី ព្រោះចង់លើកតម្កើង និងឲ្យតម្លៃទៅលើស្រី្ត។
តាមរយៈសូវរីនលោកក៏បង្ហាញឲ្យដឹងផងដែរថា “ក្នុងការគូរគំនូរយើងគួរបញ្ចូលនូវសិល្បៈវប្បធម៌ទៅក្នុងគំនូរមួយផ្ទាំងនោះ ដើម្បីបង្ហាញ លើកតម្កើង និងផ្តល់តម្លៃទៅលើសិល្បៈវប្បធម៌របស់យើង”៕
Article by: SOUNG SOKSAN