Sovrin
Sovrin
The Ero Café ហាងកាហ្វេ-វិចិត្រសាលលាក់ខ្លួនក្រោមដំបូលផ្ទះឈើបុរាណជាន់លើ
NEWS 2 years ago
ស្ថិតនៅទីតាំងកែងប្រសព្វរវាងផ្លូវលេខ ៤៤៦ និងផ្លូវលេខ ១៣៥ ខាងកើតផ្សារទួលទំពូង ផ្ទះឈើចំណាស់មួយខ្នងលាក់ខ្លួនបាំងមែកស្វាយត្រសុំត្រសាយ ដែលមានច្រកជណ្តើរឡើងតូចមួយនៅចំហៀង អមដោយស្លាក «The Ero Café Gallery Café 1st Floor» បញ្ឈរផ្ទាល់ដីរង់ចាំស្វាគមន៍អ្នកដំណើរដែលឆ្លងកាត់។ ឡើងតាមជណ្តើរបង្កាន់ដៃថ្មសល់ពីជំនាន់មុន លោកអ្នកនឹងពើបប្រទះវិចិត្រសាលជាន់លើដែលពោរពេញដោយសម្រស់ផ្ទាំងគំនូរត្រៀបត្រានៅលើជញ្ជាំងទាំងក្នុងនិងក្រៅ ព្រមជាមួយការរៀបចំតុបតែងលម្អកន្លែងអង្គុយលើផ្ទាំងកម្រាលឥដ្ឋការ៉ូរចនាបថសម័យសង្គមរាស្រ្តនិយមផងនោះបង្កើតបានជាបរិយាកាសស័ក្តិសមឥតខ្ចោះសម្រាប់អ្នកដែលមានទំនោរបែបក្លាស៊ិកនិយម។
យុវជន ឈឹម សុធាឫទ្ធិ ជាសា្ថបនិក និងសហអ្នកគ្រប់គ្រងហាងកាហ្វេ ឌឹ អ៊ីរ៉ុ កាហ្វេ (The Ero café) ដែលបានបញ្ចប់ការសិក្សាមុខជំនាញសិល្បៈ និងមនុស្សពីសាកលវិទ្យាល័យប៉ារីស (University of Paris) និងបញ្ចប់ការសិក្សាមុខជំនាញ ភាសានិងវប្បធម៌ពីប្រទេសជប៉ុន ។ យោងតាមបទពិសោធន៍ដែលខ្លួនធ្លាប់បានសិក្សានៅក្រៅស្រុកកន្លងមក លោកបានកត់សម្គាល់ថា អាជីវកម្មហាងកាហ្វេនៅបរទេសនីមួយ ៗសុទ្ធសឹងតែបានបង្កប់នូវអត្ថន័យនិងចំណុចពិសេសរបស់ហាងរៀងៗខ្លួន។
លោកចាប់ផ្តើមសង្កេតឃើញថាវប្បធម៌នៃការទទួលទានកាហ្វេនៅក្នុងស្រុកខ្មែរមានសន្ទុះកើនឡើងគួរឲ្យកត់សម្គាល់ក្នុងរយៈពេលប្រមាណ៥ឆ្នាំចុងក្រោយនេះ។ ស្របពេលដែលយុវជនរូបនេះកំពុងមានគំនិតបង្កើតជាអាជីវកម្មខ្នាតតូចមួយដោយខ្លួនឯងផងនោះ លោកក៏បានគិតគូរថា អាជីវកម្មកាហ្វេពិតជាស័ក្ដិសមមែនទែនសម្រាប់ស្ថានភាពលោកផ្ទាល់។ ទោះបីជាមានផលប៉ះពាល់ខ្លាំងពីឥទ្ធិពលនៃការផ្ទុះរាលដាលនៃជំងឺកូវីដយ៉ាងណាក្ដី ក៏លោកបានជជែកជាមួយមិត្តភក្ដិមួយចំនួនអំពីអាជីវកម្មមួយនេះ ហើយចុងក្រោយក៏បានសម្រេចចិត្តថានឹងបង្កើតអាជីវកម្មកាហេ្វខ្នាតតូចមួយនេះឲ្យខានតែបាន។
“ បើគិតអំពីកាហេ្វ អតិថិជនអាចរកទិញកាហេ្វបានស្ទើរគ្រប់ទីកន្លែង (ក្នុងពេលបច្ចុប្បន្ន)។ អ្នកទទួលទាន កាហេ្វក៏នឹងទទួលបានសារធាតុកាហេ្វអ៊ីនពីការទទួលកាហ្វេស្ទើរដូចតែគ្នាដែរ ។ ដូចនេះ ចំពោះគំនិតបើកអាជីវកម្ម ម្ចាស់ហាងកាហ្វេនីមួយ ៗក៏ចាំបាច់ត្រូវតែបង្កើតចំណុចខ្លាំង ឬ លក្ខណៈពិសេសសម្រាប់ (អាជីវកម្ម) ខ្លួនឯងដែរ ” ស្ថាបនិកហាងបានលើកឡើងពីទស្សនទានអាជីវកម្មរបស់លោក។
ជាក់ស្តែងសម្រាប់ហាង ឌឹ អ៊ីរ៉ុកាហ្វេ វិញ ក៏មានចំណុចពិសេសៗរបស់ខ្លួនឯងដើម្បីទាក់ទាញចិត្តអតិថិជនផងដែរ។ ម្ចាស់ហាងខាងលើបានពន្យល់អំពីអត្ថន័យនៃយីហោហាងនេះថា ពាក្យថា «Ero» ជាអក្សរឡាតាំងដែលបានក្លាយចេញពីពាក្យដើមរបស់ជប៉ុន iro=イロ＝色 ដោយការផ្លាស់ប្ដូរតួអក្សរ «I» (អ៊ិ) ទៅជាអក្សរ «E» (អ៊ី) ដើម្បីឲ្យអតិថិជនទាំងឡាយងាយស្រួលក្នុងការបញ្ចេញសំឡេង។ អត្ថន័យដើមនៃពាក្យនេះជាភាសាជប៉ុនគឺ ពណ៌ ។ មូលហេតុដែលលោកជ្រើសរើសពាក្យនេះជាឈ្មោះហាង ព្រោះលោកយល់ថាហាងកាហ្វេបែបវិចិត្រសាលថ្មីនេះនឹងក្លាយជាទីតាំងទទួលស្វាគមន៍ភ្ញៀវគ្រប់រូបដោយកក់ក្តៅបំផុត មិនប្រកាន់ថា អតិថិជនមកពីប្រភពណា, ជនជាតិអ្វី, ពណ៌ សម្បុរ ឬភេទអ្វីនោះទេ។
ទីនេះបានច្របាច់បញ្ចូលគ្នានូវពហុវប្បធម៌រវាងប្រទេសអាស៊ី-អឺរ៉ុបចំនួន ៣ រួមគ្នា គឺ ខ្មែរ បារាំង និងជប៉ុន ប៉ុន្តែនៅតែយកការតាំងពិព័រណ៍សិល្បៈវប្បធម៌របស់ខ្មែរយើងជាគោលចម្បងក្នុងការផ្សព្វផ្សាយ ពោលគឺក្រុមការងាររបស់ហាងមានឆន្ទៈក្នុងការបង្ហាញចំណុចចាប់ផ្ដើមប្ញសគល់សិល្បៈ និងជួយផ្សព្វផ្សាយទម្រង់សិល្បៈខ្មែរឲ្យទូលាយដោយផ្ទាល់និងដោយប្រយោល។ ចំពោះការផ្សព្វផ្សាយដោយផ្ទាល់ ហាងកាហ្វេរបស់លោកបានបង្កើតសកម្មភាពប្រមូលផ្តុំសិល្បករតាមជំនាញរៀងៗខ្លួនឲ្យមកបង្កើតថ្នាក់សិក្ខាសាលាតូចៗនិងផ្តល់ឱកាសដល់អតិថិជន ជាពិសេសយុវវ័យក្នុងស្រុក ឲ្យបានចូលរួមសកម្មភាពសិល្បៈវប្បធម៌ទាំងនោះទៅតាមចំណង់ចំណូលចិត្តរបស់ពួកគាត់។ ដោយឡែក សម្រាប់ការផ្សព្វផ្សាយដោយប្រយោលវិញ ទីតាំងនេះត្រូវបានប្រើប្រាស់ជាមជ្ឈមណ្ឌលតាំងពិព័រណ៍ស្នាដៃសិល្បៈដើម្បីបង្ហាញដល់ភ្ញៀវជាតិនិងអន្តរជាតិឲ្យបានទស្សនាឈ្វេងយល់បែបផែនសិល្បៈវប្បធម៌តាមរយៈការសង្កេតមើល ។ ក្រុមសិល្បករ សិល្បការិនី ដែលស្ថិតក្រោមចំណុះសមុច្ច័យសិល្បៈសុធាប្ញទ្ធិ (Sothearidh Arts Collection) បច្ចុប្បន្នរួមមាន អាត ស្រីពៅ, ជា ដាលីន, ឡុងគឹមហេង, អ៊ុក រតនា, តាន់ វត្តី, នាង ច័ន្ទសុរិយា, ជា ចាប និង ព្រះតេជគុណ សួង ភក្តី ។
ក្រៅពីជាវិចិត្រសាលដែលមានវិសេសភាពប្លែកពីគេលាក់ខ្លួនក្នុងផ្ទះឈើប្រពៃណីខ្មែរ ហាង ឌឹ អ៊ីរ៉ុ កាហ្វេ ក៏មានបម្រើជូនភ្ញៀវនូវភេសជ្ជៈនិងបង្អែមដ៏មានឱជារសប្រចាំហាងសម្រាប់រដូវកាលនេះគឺ នំសាំងវិចផ្លែឈើជប៉ុន (Japanese Fruit Sandwiches) និងភេសជ្ជៈបែបកូនកាត់ «ស្រ្តប៊ឺរីកាហេ្វឡាតេ»(strawberry café latte) ដែលភ្ញៀវគួរសាកល្បងនៅពេលមកដល់ទីនេះ។ ហាងនេះបើកដំណើរការជារៀងរាល់ថ្ងៃ ចាប់ពីម៉ោង ៩ ព្រឹក ដល់ម៉ោង ៧ យប់(លើកលែងថ្ងៃអង្គារ) ៕
Article by SRIN SOKMEAN
