លទ្ធភាពនៃការកាត់បន្ថយការប្រើប្រាស់សម្ភារសារធាតុប្លាស្ទិចបច្ចុប្បន្នបានកើនឡើងជាលំដាប់គួរឲ្យកត់
សម្គាល់។ កត្តាទាំងអស់នេះហើយបានជំរុញទឹកចិត្តដល់យុវជនជំនាន់ថ្មីមកពីមជ្ឈដ្ឋានផ្សេងៗសិក្សាស្រាវជ្រាវព័ត៌មានទាក់ទងនឺងសារធាតុផ្សំមួយចំនួន ដើម្បីបង្កើតសម្ភារប្រើប្រាស់ដែលពុំមានផលប៉ះពាល់បរិស្ថាន និងសុខភាពរបស់អ្នកប្រើប្រាស់ផងដែរ។ ទន្ទឹមនឹងកត្តានេះ បានធ្វើឲ្យយុវជនពីររូបសហការគ្នាបង្កើតកែវទឹកមួយប្រភេទដែលអាចរក្សាសីតុណ្ហភាពល្អ និងដុំបាល់បន្ទន់សម្ងួតដែលអាចរក្សាសាច់ក្រណាត់សម្លៀកបំពាក់នៅតែមានគុណភាព។
ជំនួបជាមួយនឹងលោកសាម ហេងសុភាវណ្ណ និងកញ្ញា ហុក ច័ន្ទបូរណ៍មី ជានិស្សិតថ្នាក់បរិញ្ញាបត្រលើមុខ
ជំនាញទីផ្សារ និងអាជីវកម្ម នៃសាកលវិទ្យាល័យផារ៉ាហ្គនអន្តរជាតិភ្នំពេញ ជាស្ថាបនិក និងស្ថាបនិការបស់អាជីវកម្មអនឡាញ «គង់វង្ស» ដែលបង្កើតឡើងនៅអំឡុងឆ្នាំ២០២១។ ស្ថាបនិក លោក សុភាវណ្ណ បានបង្ហាញពីគំនិតក្នុងការបង្កើត គង់វង្ស យ៉ាងដូច្នេះថា «ដោយសារតែខ្ញុំស្រឡាញ់ការប្រើប្រាស់សម្ភារដែលមិនប៉ះពាល់ដល់បរិស្ថាន ម៉្យាងវិញទៀតខ្ញុំចង់បន្ថែមភាពងាយស្រួលដល់អ្នកប្រើប្រាស់ ជាក់ស្តែង ទម្ងន់កែវរបស់គង់វង្សគឺស្រាល រក្សាសីតុណ្ហភាពបានល្អ មួយវិញទៀតនោះ កែវរបស់ពួកយើងគឺប្រើប្រាស់ពណ៌ស្រទន់ដ៏ពេញនិយម រីឯលក្ខណៈពិសេសបន្ថែមទៀតនោះគឺផលិតពីចំបើងស្រូវសាឡីមានគុណភាពខ្ពស់ផងដែរ»។ មិនត្រឹមតែប៉ុណ្ណោះ ប្រសិនបើផ្អែកទៅតាមការលើកឡើងរបស់ស្ថាបនិកវ័យក្មេងរូបនេះបង្ហាញឲ្យដឹងថាដុំបាល់បន្ទន់សម្ងួតដែលជាផលិតផលមួយប្រភេទផលិតចេញពីកប្បាសធម្មជាតិមានសមត្ថភាពខ្ពស់ក្នុងការសម្ងួតសម្លៀកបំពាក់ស្ងួតឆាប់រហ័ស រក្សាសាច់ក្រណាត់មានគុណភាពល្អមិនពុកផុយ រួមទាំងជួយឲ្យសម្លៀកបំពាក់មានក្លិនក្រអូបប្រហើរថែមទៀត។ យ៉ាងណាមិញ លោកសុភាវណ្ណ បានបង្ហើបឲ្យដឹងថា «ដុំបាល់បន្ទន់សម្ងួតស័ក្តិសមបំផុតសម្រាប់អ្នកនិយមប្រើប្រាស់ម៉ាស៊ីនបោកគក់វាជួយឲ្យខោអាវរបស់យើងមិនឲ្យរមួលចូលគ្នា ថែមទាំងមិនប៉ះពាល់ដល់សុខភាពស្បែកដែលធ្វើឲ្យអាឡែកហ្ស៊ី។ រីឯយុវកាលនៃការប្រើប្រាស់នោះគឺយូរតែម្តង។ ប្រសិនបើអ្នកប្រើប្រាស់គាត់ធ្វើការថែរក្សាទុកបានល្អ»។
«គង់វង្ស» ដែលជាឈ្មោះរបស់អាជីវកម្មអនឡាញនេះមានអត្ថន័យថាភាពយូរអង្វែងមិនសាបសូន្យឆ្លុះបង្ហាញពីគុណភាពរបស់ផលិតផលកែវផលិតពីចំបើងស្រូវសាឡី និងដុំបាល់បន្ទន់សម្ងួតផលិតពីកប្បាសធម្មជាតិនេះដែរ។
ថ្វីដ្បិតតែ គង់វង្ស ទើបតែបញ្ចេញផលិតផលត្រឹមតែ ២ ប្រភេទក៏ពិតមែន ប៉ុន្តែស្ថាបនិក និងស្ថាបនិកាទាំងពីររូបក៏ត្រៀមបង្កើតផលិតផលប្រើប្រាស់បន្តទៀតដែលនឹងនាំអ្នកប្រើប្រាស់គ្រប់វ័យកាន់តែមានភាពងាយស្រួលរួមជាមួយនឹងបទពិសោធន៍ថ្មីៗបន្តទៀត។ ជាចុងក្រោយ លោកសុភាវណ្ណ ក៏បានបង្ហាញសារអប់រំដូចនេះដែរថា ទោះបីការកាត់បន្ថយប្រើប្រាស់ប្លាស្ទិកមានការកើនឡើងពិតមែននេះមិនមែនមានន័យថាយើងត្រូវឈប់បន្តចូលរួមថែរក្សាបរិស្ថានត្រឹមជំហាននេះនោះទេ តែយើងគប្បីជាផ្នែកមួយជួយផ្សព្វផ្សាយពីផលអាក្រក់នៃការប្រើប្រាស់ប្លាស្ទិកប្រចាំថ្ងៃនេះឲ្យកាន់តែទូលំទូលាយបន្តបន្ទាប់ពីជំនាន់មួយ ទៅជំនាន់មួយទៀត៕
Article by PAN SIVLY