ទស្សនាបណ្តុំស្នាដៃរបស់វិចិត្រករសាលា Color of Cambodia មកពីខេត្ត សៀមរាប
NEWS 2 years agoកាលពីល្ងាចថ្ងៃទី០២ ខែមីនា ឆ្នាំ២០២២ សាលាបង្រៀនគំនូរ «Color of Cambodia» បានរៀបចំការតាំងពិព័រណ៍គំនូរលើកដំបូងនៅរាជធានីភ្នំពេញ ស្ថិតក្នុងមជ្ឈមណ្ឌលសិល្បៈមួយកន្លែងមានឈ្មោះថា«ផ្ទះមេត្តា-Meta House»។ ពិព័រណ៍គំនូរនេះមានការចូលរួមបង្ហាញស្នាដៃពីសំណាក់សិល្បករចំនួន១៤រូប ដែលសុទ្ធសឹងតែទទួលបានការបណ្តុះបណ្តាលពីសាលារៀនផ្ទាល់មានដូចជាវិចិត្រករបរទេស៖ លោក Bill Gentry អ្នកនាង Honey khor លោក Julia Haw លោក Art Foo រីឯវិចិត្រករខ្មែររួមមាន៖ ព្រហ្ម ពន្លឺ សរសុផានី ហួរ សុបិន លន់ ឡូន លែម សុលាង សែត ស៊ឹង ធីចាន់ ណារ៉ាក់ សុន កុសល និងសម ណារ៉ាត់។ យ៉ាងណាមិញ ការដាក់តាំងពីជញ្ជាំងមួយទៅជញ្ជាំងមួយសរុបប្រមាណ៣៦ផ្ទាំង គំនូរសុទ្ធតែមានប្រធានបទខុសៗគ្នា រួមជាមួយនឹងការបង្កប់អត្ថន័យគួរឲ្យឈ្វេងយល់។ ជាក់ស្តែង រូបគំនូរខ្លះហាក់ដូចរៀបរាប់អំពីសេចក្តីសោកសៅ អារម្មណ៍ស្រមើស្រមៃ ខ្លះបរិយាយពីព្រឹតិ្តការណ៍សង្គម ហើយខ្លះទៀតក៏បង្ហាញពីសិល្បៈក្នុងការច្នៃប្រតិដ្ឋស្នាដៃបែបថ្មីផងដែរ។ ទន្ទឹមនឹងនេះ លោក ព្រហ្ម ពន្លឺ ដែលជាអ្នករៀបចំ និងគ្រប់គ្រងការតាំងពិព័រណ៍នេះបានឲ្យដឹងថា៖ “ពិព័រណ៍នេះធ្វើឡើងក្នុងគោលបំណង បង្កើតជាឱកាសមួយក្នុងការបង្ហាញស្នាដៃវិចិត្រករនៃសាលា «Color of Cambodia» ហើយក៏ជាការដាក់លក់ដើម្បីរកប្រាក់ចំណូលសម្រាប់វិចិត្រករផងដែរ។ លើសពីនេះវាក៏ជាឱកាសមួយទៀតក្នុងការចែករំលែកបទពិសោធន៍ រួមទាំងបានចែករំលែកការងារសិល្បៈជាមួយសិល្បករដទៃ។”
បច្ចុប្បន្នសាលាបង្រៀនគំនូរ «Color of Cambodia» ដែលមានទីតាំងនៅខេត្តសៀមរាបនេះ បានក្លាយជាអង្គការមួយស្របច្បាប់នៅកម្ពុជា ដែលមានវិចិត្រករ លោក Bill Gentry ជនជាតិអាមេរិកជាស្ថាបនិក។ គោលបំណងសំខាន់របស់អង្គការ គឺ ជួយបណ្តុះបណ្តាលកុមារកម្ពុជាដែលមានទេពកោសល្យលើសិល្បៈគំនូរ និងជួយអភិវឌ្ឍសមត្ថភាពគំនិតច្នៃប្រតិដ្ឋរបស់ពួកគេទៅតាមស្ទាយ៌ផ្ទាល់ខ្លួន។
គួរបញ្ជាក់ដែរថា ពិព័រណ៍គំនូរនេះនឹងតាំងបង្ហាញរយៈពេល១៤ថ្ងៃ ចាប់ពីថ្ងៃទី០២ រហូតដល់ថ្ងៃទី១៦ ខែមីនា (រៀងរាល់ថ្ងៃអង្គារដល់ថ្ងៃអាទិត្យ) ចាប់ពីម៉ោង៨ព្រឹកដល់ម៉ោង១១យប់៕
Article by SOUNG SOKSAN