តុន ច័ន្ទរិទ្ធិ ត្រូវបានគេស្គាល់ថាជាអ្នកនិពន្ធសៀវភៅដ៏មានប្រជាប្រិយភាពមួយរូបដែលបានបញ្ចេញស្នាដៃនៃការនិពន្ធសៀវភៅរបស់ខ្លួនចំនួនពីរចំណងជើងរួចមកហើយ ដោយស្នាដៃសៀវភៅដំបូងមានចំណងជើងថា «អ្នកពិតជាពិសេស តោះ! ទៅមុខទៀត» និងស្នាដៃបន្ទាប់នោះគឺ «និទានម៉ែ»។ ជាក់ស្តែង បន្ទាប់ពីមានការគាំទ្រពីសំណាក់មិត្តអ្នកអានយ៉ាងច្រើនគួរឲ្យកត់សម្គាល់បែបនេះបានជំរុញទឹកចិត្ត ច័ន្ទរិទ្ធិ បន្តការនិពន្ធសៀវភៅថ្មីបន្ទាប់ទៀតដែលនឹងបង្វែរអារម្មណ៍របស់អ្នកគាំទ្រគ្រប់រូបឈ្វេងយល់ពីចំណេះដឹងមួយចំនួនទាក់ទងនឹងទស្សនវិជ្ជាប្លែកខុសពីសព្វដង ហើយក៏ ជាផ្នែកមួយដែលបានលើកទឹកចិត្តអ្នកអានកាន់តែមានភាពរឹងមាំខុសក្នុងការប្រឈមមុខជាមួយនឹងបញ្ហានានាផងដែរ។
«ឡានក្រុងពេលយប់» គឺជាប្រភេទសៀវភៅប្រលោមលោកបែបទស្សនវិជ្ជាដែលផ្តោតសំខាន់ទៅលើការលើកទឹកចិត្ត ជាពិសេស ស្ថិតនៅក្នុងយុវវ័យភាពទើបតែបញ្ចប់ថ្នាក់វិទ្យាល័យ ឬសាកលវិទ្យាល័យ ដែលកំពុងស្វែងរកថាខ្លួនឯងថាជានរណា និងផែនការគោលដៅសម្រាប់ជីវិតទៅថ្ងៃអនាគតជាដើម។ ចំពោះសៀវភៅមួយក្បាលនេះផងដែរ អ្នកនិពន្ធបានសរសេរ និងមានការបែងចែករឿងប្រលោមលោកខ្លីជា ៣ រឿងផ្សេងៗគ្នា តួយ៉ាង រឿងខ្លីទីមួយមានចំណងជើងថា «ឡានក្រុងពេលយប់» មានការពណ៌នាពីដំណើរដើមទងរបស់បុរសម្នាក់ឆ្ពោះទៅកាន់ភូមិភាគឦសាន។ ចំណែកឯរឿងខ្លីទីពីរនោះគឺ «នាងសន្យា» ច័ន្ទរិទ្ធិ ដែលបានរៀបរាប់ និងមានការឆ្លុះបង្ហាញអំពីខ្សែជីវិតរបស់នារីជនបទមួយរូបផ្លាស់ប្តូរទីលំនៅមករស់នៅទីក្រុង និងចុងក្រោយគឺមានចំណងជើងថា «វីរនារីអាវស» ដែលសរសេរអំពីគ្រូពេទ្យម្នាក់ត្រូវបំពេញកាតព្វកិច្ចរបស់ខ្លួនក្នុងការព្យាបាលអ្នកជំងឺកូវីដ១៩ ផងដែរ។ យ៉ាងណាមិញ សៀវភៅដែលនឹងមានកម្រាស់ជិត ២០០ ទំព័រនេះ បរិយាយអំពីដំណើរនៃការស្វែងរកខ្លួនឯង ការជឿជាក់ និងការហ៊ានដើរតាមក្តីស្រម៉ៃរបស់ខ្លួនតាមរយៈតួអង្គនៅក្នុងរឿងនីមួយៗ។ ទន្ទឹមនឹងនេះផងដែរ អ្នកនិពន្ធវោហារសព្ទបានបង្ហាញឲ្យដឹងផងដែរថា «សៀវភៅមួយក្បាលនេះមិនត្រឹមតែជួយលើកទឹកចិត្តប៉ុណ្ណោះទេ តែវាក៏បង្ហាញទៅកាន់អ្នកអានពីគុណតម្លៃដែលយើងស្រឡាញ់ និងសកម្មភាពដែលយើងកំពុងធ្វើ។ មួយវិញទៀត កុំប្រៀបធៀបខ្លួនឯងទៅនឹងអ្នកដទៃ ត្រូវចេះជួយសង្គម និងមនុស្សជុំវិញខ្លួន ហើយចេះរៀបចំផែនការសម្រាប់ខ្លួនឯង និងមានភាពក្លាហាហ៊ានក្នុងការសម្រេចចិត្តដើម្បីធ្វើវា»។
គួរបញ្ជាក់ដែរថាសៀវភៅ «ឡានក្រុងពេលយប់» ត្រៀមចេញផ្សាយនៅចុងខែមីនាខាងមុខនេះ។ សម្រាប់ថវិកាដែលទទួលបាននឹងធ្វើការបរិច្ចាគ១ដុល្លារក្នុង១ក្បាល ដើម្បីឧបត្ថម្ភទៅកាន់មណ្ឌលកុមារកំព្រាមួយកន្លែងដែលមានឈ្មោះថា «ចម្ការតែ» ស្ថិតនៅក្នុងខេត្តមណ្ឌលគិរី។ ជាចុងក្រោយ បន្ទាប់ពីស្នាដៃទីបីរបស់ខ្លួន លោកក៏បានបង្ហើបថានឹងត្រៀមបញ្ចេញស្នាដៃថ្មីបន្ថែមទៀតនៅចុងឆ្នាំនេះ៕
Article by SOUNG SOKSAN