Sovrin
Sovrin
«ស៊ីម៉ងត៍ស» បានក្លាយជាសម្ភារតាំងលម្អ និងអាចប្រើប្រាស់ប្រចាំថ្ងៃដ៏ទាក់ទាញ
TRAVEL & LIVING 2 years ago
បច្ចុប្បន្នសម្ភារដាក់តាំងលម្អកំពុងមានការពេញនិយមខ្លាំង ជាពិសេសសំណាក់អ្នកដែលចូលចិត្តរៀបចំតុបតែងដេគ័របែបស៊ីវិល័យ។ ដោយឃើញថាសម្ភារតាំងលម្អមួយចំនួនច្រើនតែនាំចូលពីបរទេស និងម្យ៉ាងចង់ឲ្យប្រជាជនងាកមកប្រើប្រាស់ផលិតផលក្នុងស្រុក ក៏ដូចជាម៉ាកយីហោក្នុងស្រុកផងនោះ យុវជនវ័យក្មេងមួយរូបបានងាកមកចាប់ផ្តើមស្រាវជ្រាវ និងបង្កើតជាផលិតផលគ្រឿងតាំងលម្អទាក់ទាញមួយបែបជាមួយម៉ាកយីហោផ្ទាល់ខ្លួនឈ្មោះថា «Dai Studio»។
«Dai Studio» គឺជាម៉ាកយីហោក្នុងស្រុកមួយបានបង្កើតឡើងកាលពីខែឧសភាឆ្នាំទៅមិញ ដែលមានយុវជនវ័យក្មេង លីម ម៉េងឃាង ជាស្ថាបនិក។ ក៏ព្រោះតែសិក្សាជំនាញផ្នែកស្ថាបត្យកម្មតុបតែងលម្អខាងក្នុង និងចង់បង្កើតអ្វីដែលទាក់ទងនឹងជំនាញដែលខ្លួនកំពុងសិក្សាផងនោះ យុវជនវ័យ២២ឆ្នាំរូបនេះបានចាប់ផ្តើមស្រាវជ្រាវអំពីការយកស៊ីម៉ងត៍សមកបង្កើតជាសម្ភារតុបតែងលម្អដែលធ្វើឡើងដោយដៃទាំងស្រុង។
តាមរយៈផលិតផលដូចជា ចានទម្រ ក្រឡ មានរាងរៅសណ្ឋានផ្សេងៗបីដូចវត្ថុសិល្បៈ ម៉េងឃាង បានលើកឡើងយ៉ាងដូច្នេះ “សម្ភារទាំងនេះអាចប្រើប្រាស់អាស្រ័យទៅតាមតម្រូវការរបស់អ្នកប្រើប្រាស់ ដូចជាចានទម្រទំហំតូចគឺអាចប្រើសម្រាប់ទ្រាប់កែវកាហ្វេ រីឯទំហំធំអាចប្រើសម្រាប់ដាក់ផ្លែឈើឬអ្វីផ្សេងក៏បាន។ ដោយឡែកក្រឡវិញអាចប្រើដាក់ប៊ិកឬ ដាក់សម្ភារបន្ទប់ទឹក និយាយរួមអាចប្រើបានតាមចិត្តចង់របស់ពួកគាត់។”
បើនិយាយពីដំណាក់កាលនៃការផលិតវិញ ម៉េងឃាង ថាទម្រាំតែបានជាផលិតផលសម្រេចមួយគឺត្រូវឆ្លងកាត់ច្រើនដំណាក់កាល។ ជាក់ស្តែង ដំបូងត្រូវលាយស៊ីម៉ងត៍ បន្ទាប់មកត្រូវលាយពណ៌ រួចយកទៅចាក់ក្នុងពុម្ពរក្សាទុក១ថ្ងៃទៅ១ថ្ងៃកន្លះ។ បន្ទាប់មកយកវាចេញពីពុម្ពហើយខាត់ឲ្យស្អាត រួចយកទៅសម្ងួតឲ្យស្ងួត ទើបលាបពណ៌ការពារជម្រាបទឹកដែលជាដំណាក់កាលចុងក្រោយ។ រាល់ការបញ្ជាទិញផលិតផលនីមួយៗ អតិថិជនក៏អាចកម្មង់ពណ៌ និងម៉ូដទៅតាមអ្វីជាចំណង់ចំណូលចិត្តផងដែរ។
ស្ថាបនិកដែលមានស្រុកកំណើតមកពីខេត្តកំពង់ចាមរូបនេះ បាននិយាយទៀតថា “ខ្ញុំចង់បង្ហាញទៅកាន់ប្រជាជនយើងថា ប្រ៊េនក្នុងស្រុករបស់យើងក៏មានលក់អ្វីដែលមានលក់នៅក្រៅប្រទេសដែរ ដែលមិនចាំបាច់ទាល់តែយើងកម្មង់ទិញពីក្រៅប្រទេសមកប្រើនោះទេ។”
ផលិតផលរបស់ Dai Studio មានលក្ខណៈពិសេសដោយឡែក ដោយម៉ូដសុទ្ធសឹងបានដកស្រង់ពីសិល្បៈសំណង់ខ្មែរពីដើម ដែលមានជាម៉ូដថ្មដុះ និងខ្លះទៀតដកស្រង់ចេញពីធម្មជាតិ ដូចជាចានទម្រដែលមានរូបរាងជាឥន្ទធនូជាដើម។ ម៉ូដនីមួយៗ ម៉េងឃាង បានប្រើភាពច្នៃប្រតិដ្ឋបែបទំនើបដោយតម្រូវទៅតាមរសនិយមសម័យថ្មី ទាំងស្អាត ទាំងប្រណីត និងប្រកបដោយសិល្បៈនិយម។
ផលិតផលរបស់ Dai Studio មានតម្លៃចាប់ពី១,៥ដុល្លាររហូតដល់១៥ដុល្លារអាស្រ័យទៅតាមទំហំ និងម៉ូដ ដែលអាចបញ្ជាទិញបានតាមរយៈបណ្តាញសង្គមអ៊ីនស្តាក្រាម (Instagram) ដែលមានឈ្មោះថា Dai Studio។ នៅពេលខាងមុខម្ចាស់ម៉ាកយីហោរូបនេះក៏នឹងមានគម្រោងសហការជាមួយសិល្បករដទៃដើម្បីបង្កើតផលិតផលបន្ថែមទៀតដូចជា ថូផ្កា តុ និងកៅអីផងដែរ៕
Article by SOUNG SOKSAN
