Sovrin
Sovrin
គន្លឹះ៧យ៉ាងដើម្បីស្បែក ដែលសុភាពនារីចាំបាច់ធ្វើនៅរដូវភ្លៀងនេះ
TRAVEL & LIVING 2 years ago
ការថែទាំស្បែកនៅរដូវភ្លៀងគឺជារឿងដ៏សំខាន់មួយដែលសុភាពនារីទាំងឡាយមិនគួរមើលរំលង។ អាកាសធាតុពោរពេញទៅដោយសំណើម ជាឱកាសអំណោយផលដល់ការកកើតមេរោគនានា ងាយធ្វើឲ្យស្បែកប្រឈមបញ្ហាផ្សេងៗដូចជា ការកើតមុន ឡើងកន្ទួលរមាស់ និងស្បែកគ្មានសំណើមជាដើម។ ខណៈរដូវភ្លៀងឈានចូលមកដល់ សូវរីន សូមណែនាំគន្លឹះថែទាំស្បែក ៧យ៉ាងដែលសុភាពនារីគួរអនុវត្តដើម្បីរក្សាស្បែកឲ្យនៅតែផូរផង់ និងស្រស់ថ្លានៅក្នុងរដូវនេះ។
១. លាងសម្អាតផ្ទៃមុខជាប្រចាំ៖ នៅពេលមានភ្លៀងធ្លាក់ញឹកញាប់ ភាពកខ្វក់ និងធូលីដីដែលនៅជាប់រន្ធញើសនៃផ្ទៃមុខអាចបង្កជាជាតិពុល ដែលជាដើមហេតុនាំឲ្យកើតមុន ឡើងរោលឬកន្ទួលរមាស់ជាដើម។ ការលាងសម្អាតផ្ទៃមុខ២ទៅ៣ដងក្នុងមួយថ្ងៃជាវិធីជម្រះភាពកខ្វក់ចេញពីស្បែកបានយ៉ាងល្អ។ បើអាចគួរប្រើហ្វូមលាងមុខណាដែលមិនមានជាតិកាត់កាន់តែប្រសើរ។ អ្នកក៏អាចប្រើថូន័រ(Toner) នៅពេលដែលស្បែកឡើងស្ងួត ដើម្បីរក្សារន្ធញើសមិនឲ្យកកស្ទះផងដែរ។
២. ប្រើគ្រីមផ្តល់សំណើម៖ មិនមែនតែរដូវធ្លាក់ខ្យល់នោះទេដែលអ្នកគួរប្រើគ្រីមផ្តល់សំណើម នៅក្នុងរដូវភ្លៀងធ្លាក់នេះក៏សំខាន់ដូចគ្នា។ ពេលយប់គឺជាពេលវេលាដែលស្បែកព្យាយាមជួសជុលត្រង់ចំណុចដែលខូចខាតដោយខ្លួនឯង ដូច្នេះការលាបគ្រីមផ្តល់សំណើមនៅពេលយប់ អាចជួយការពារមិនឲ្យស្បែកជ្រួញ និងរក្សាភាពស្រស់ថ្លានៃស្បែក។
៣. ការស្រ្កាប់ស្បែក៖ ក្នុងអំឡុងពេលនេះ ស្បែករបស់អ្នកទាមទារឲ្យមានការយកចិត្តទុកដាក់ថែទាំបំផុត ព្រោះវាមិនត្រឹមតែជួយការពារស្បែកពីបញ្ហាប្រឈមមួយចំនួននោះទេ ថែមទាំងជួយឲ្យស្បែកនៅតែស្រស់ថ្លាក្មេងជាងវ័យផងដែរ។ ការស្រ្កាប់ស្បែកយ៉ាងហោចណាស់ម្តងក្នុងមួយសប្តាហ៍ អាចជួយជម្រុះកោសិកាចាស់ៗដែលធ្វើឲ្យស្បែកភ្លឺថ្លា និងទន់រលោង។ អ្នកអាចជ្រើសរើសការប្រើផលិតផលស្ក្រាប់ណាមួយ ឬស្ក្រាប់បែបធម្មជាតិកាន់តែប្រសើរ។
៤. ប្រើឡេការពារកម្តៅថ្ងៃ៖ ដូចទៅនឹងគ្រីមផ្តល់សំណើមដែរ មិនថាអាកាសធាតុបែបណានោះទេ ឡេការពារកម្តៅថ្ងៃគឺជាមិត្តដ៏ជិតស្និទ្ធបំផុត។ នៅក្នុងរដូវនេះ ទោះបីជាអាកាសធាតុមិនសូវក្តៅខ្លាំងក៏ដោយ តែស្បែករបស់អ្នកនៅតែរងការបំផ្លាញដោយកាំរស្មីយូវី(UV)របស់ព្រះអាទិត្យផងដែរ។ ដូច្នេះការលាបឡេការពារកម្តៅថ្ងៃជារឿងមួយដែលអ្នកមិនគួររំលងឡើយ។
៥. ញ៉ាំបន្លែបៃតង៖ ស្បែកមិនមែនស្រស់ស្អាតបានដោយសារតែផលិតផលថែរក្សាសម្រស់មួយមុខនោះទេ ការទទួលទានអាហារត្រឹមត្រូវក៏ជាផ្នែកមួយជួយជំរុញពីខាងក្នុងផងដែរ។ គួរកាត់បន្ថយការទទួលទានជាតិខ្លាញ់ អាហារដែលគ្មានវីតាមីន និងសារធាតុចិញ្ចឹមគ្រប់គ្រាន់ ដោយងាកមកទទួលទានបន្លែបៃតងសម្បូរទៅដោយវីតាមីនដែលស្បែកត្រូវការ។ វាជួយឲ្យស្បែកភ្លឺថ្លាចេញពីខាងក្នុង ថែមទាំងល្អសម្រាប់សុខភាពទៀតផង។
៦. ញ៉ាំផ្លែឈើ៖ មិនខុសគ្នាពីបន្លែបៃតង ផ្លែឈើក៏មានផ្ទុកទៅដោយវីតាមីន និងសម្បូរទៅដោយសារធាតុប្រឆាំងអុកស៊ីតកម្ម។ ការទទួលទានផ្លែឈើអាចធ្វើឲ្យស្បែកភ្លឺរលោង និងរក្សាសំណើមនៃស្បែកឲ្យមើលទៅមានភាពស្រស់ថ្លាចេញពីខាងក្នុង។
៧. ផឹកទឹកឲ្យបានច្រើន៖ ទឹកមានសារៈសំខាន់ណាស់ មិនថាសម្រាប់សុខភាពសម្រស់ឬសុខភាពរាងកាយនោះទេ។ ការផឹកទឹកបានគ្រប់គ្រាន់តាមបរិមាណដែលរាងកាយត្រូវការអាចជួយឲ្យស្បែកមានសំណើម និងធ្វើឲ្យសរសៃសក់មានសុខភាពល្អ៕
Article by SOUNG SOKSAN
