ស្វាគមន៍ការមកដល់នៃមហោស្រពសៀកអន្តរជាតិដ៏ធំប្រចាំឆ្នាំនៅទីរួមខេត្តបាត់ដំបង
NEWS 2 years agoអង្គការហ្វារពន្លឺសិល្បៈ ដែលអ្នកស្នេហាវិស័យសិល្បៈនៅកម្ពុជាជាច្រើនធ្លាប់ស្គាល់រួចមកហើយថា ជាសាលាបណ្តុះបណ្តាលកុមារនិងយុវជននូវកម្មវិធីសិល្បៈ អប់រំ និងផ្សារភ្ជាប់សង្គម ប្រចាំក្រុងបាត់ដំបងតាំងពីឆ្នាំ១៩៩៤ នោះ កំពុងមមាញឹកត្រៀមរៀបចំកម្មវិធីមហោស្រពសៀកអន្តរជាតិដ៏ធំរបស់ខ្លួនប្រចាំឆ្នាំនេះ ដែលមានឈ្មោះជាផ្លូវការថា «ទីនេះ ទីនោះ» (Tini Tinou 2022 International Circus Festival)។ កម្មវិធីនេះនឹងត្រូវរៀបចំឡើងចាប់ពីថ្ងៃសៅរ៍ ទី២៩ ខែឧសភា នេះរហូតដល់ថ្ងៃព្រហស្បតិ៍ ទី០៣ ខែមិថុនា ខាង មុខ នៅទីតាំងផ្សេងៗក្នុងក្រុងបាត់ដំបង តាមរបៀបវារៈកំណត់ដោយសាលាផ្ទាល់ (សូមមើលរបៀបវារៈ កម្មវិធីលម្អិតនៅខាងក្រោមអត្ថបទ)។
កម្មវិធីនេះនឹងមានវត្តមានចូលរួមរបស់សិល្បករអន្តរជាតិមកពីជុំវិញពិភពលោក រួមមាន កម្ពុជា ថៃ តៃវ៉ាន់ និងបារាំង ដែលនឹងមកសម្តែង ព្រមទាំងបង្កើតវេទិកាពិភាក្សារវាងសិស្សសៀកដើម្បីជំរុញទឹកចិត្តពួកគេឲ្យបន្តក្តីស្រមៃតាមរយៈចំណេះជំនាញសិល្បៈ។ ក្នុងរយៈពេល៦ថ្ងៃនេះ កម្មវិធីសម្តែងសៀកនឹងប្រព្រឹត្តទៅជារៀងរាល់ល្ងាចនៅទីតាំងសាលាហ្វារពន្លឺសិល្បៈ។ ទន្ទឹមនឹងនេះ អ្នកចូលរួមអាចចូលរួមសកម្មភាពសិល្បៈ ទស្សនាទស្សនីយភាពសិល្បៈចម្រុះដោយឥតគិតថ្លៃ និងភ្លក្សរសជាតិម្ហូបប្រចាំតំបន់។ នៅថ្ងៃចាប់ ផ្តើម មានការដើរដង្ហែក្បួនសៀកនិងអាយ៉ងជុំវិញក្រុងបាត់ដំបង ហើយនៅថ្ងៃចុងក្រោយ នឹងមានកម្មវិធីប្រគំតន្រ្តីចុងក្រោយដែលសម្តែងដោយក្រុមតន្រ្តី Hip Hop ឯករាជ្យ និងក្រុមតន្រ្តី Klapyahandz។
គោលបំណងនៃកម្មវិធីមហោស្រពនេះនឹងប្រមូលផ្តុំសិល្បករដើម្បីចែករំលែកបទពិសោធន៍ ចូលរួមសិក្ខាសាលា ចូលរួមក្នុងសកម្មភាពសហគមន៍ ក៏ដូចជាលើកស្ទួយសិល្បៈក្នុងសង្គមខ្មែរយើង។ “យើងរំភើបចិត្តដែល Phare ជាមួយការគាំទ្ររបស់ឯកឧត្តមអភិបាលខេត្តបាត់ដំបង អាចបង្កើតកម្មវិធី «ទីនេះ ទីនោះ» ក្រោយពីការសម្រេចលុបចោលកាលពីឆ្នាំ២០២០ ដោយសារការរាតត្បាតជំងឺ។ ទោះបីជាការរៀបចំមាន រយៈពេលខ្លីតាំងពីបើកប្រទេសវិញក៏ពិតមែន ក៏យើងនឹងធានាឲ្យបានថានឹងនាំមកនូវភាពសប្បាយរីករាយ និងចែករំលែកស្នាមញញឹមទៅកាន់អ្នកចូលរួមគ្រប់គ្នា ” លោក អូស្មាន់ ខាវ៉ាចា នាយកគ្រប់គ្រងហ្វារពន្លឺសិល្បៈ បានសម្តែងចំណាប់អារម្មណ៍៕
Article by SRIN SOKMEAN