នាយិកា Blue Media Films Cambodia ដែលធ្លាប់ទទួលពានរង្វាន់អន្តរជាតិក្នុងវិស័យប្រព័ន្ធផ្សព្វផ្សាយ
NEWS 2 years agoក្នុងពេលបច្ចុប្បន្ន ស្រ្តីកំពុងចូលរួមចំណែកយ៉ាងសកម្មក្នុងដំណើរអភិវឌ្ឍន៍ប្រទេសកម្ពុជាទាំងក្នុង វិស័យរដ្ឋ និងវិស័យឯកជនស្របជាមួយគ្នាគួរឲ្យកត់សម្គាល់ខុសពីសម័យអតីតកាលដែលស្រ្តីភេទហាក់មាន គម្លាតចាញ់ប្រៀបភាគីបុរសយ៉ាងខ្លាំង។ ជាក់ស្តែង ក្នុងវិស័យប្រព័ន្ធផ្សព្វផ្សាយក្នុងស្រុក ក្រុមហ៊ុន Blue Media Films Cambodia របស់ស្ថាបនិក ខែក ខេមរ៉ាត វ័យត្រឹមជាង៣០ឆ្នាំ កំពុងមានសន្ទុះបម្រើសេវាកម្មផ្នែកផ្សព្វ ផ្សាយប្រកបដោយគុណភាព ក្រមសីលធម៌វិជ្ជាជីវៈ និងគំនិតច្នៃប្រតិដ្ឋខ្ពស់ទៅដល់ក្រសួង អង្គភាពស្ថាប័ន រដ្ឋ គ្រឹះស្ថានឯកជន និងជំនួញអាជីវកម្មនានាដើម្បីបំពេញតម្រូវការទីផ្សារទូលំទូលាយដល់អតិថិជនគោលដៅពិតៗ។ តើលោកស្រី ខែក ខេមរ៉ាត មានជីវប្រវត្តិនិងបទពិសោធន៍ការងារយ៉ាងដូចម្តេចខ្លះទម្រាំទទួលបាននូវការទទួលស្គាល់យ៉ាងច្រើនពីសំណាក់មហាជនគ្រប់ស្រទាប់វណ្ណៈដូចសព្វថ្ងៃ?
ឆ្លងកាត់បទសម្ភាសន៍ជាមួយទស្សនាវដ្តីសូវរីន យើងបានដឹងថា លោកស្រី ខែកខេមរ៉ាត បានចាប់កំណើតនៅក្នុងឆ្នាំ១៩៨៨ នៅក្នុងត្រកូលនៃគ្រួសារមន្រ្តីរាជការមួយ ដែលមានស្រុកកំណើតនៅក្នុងក្រុងកំពង់ចាម ខេត្តកំពង់ចាម។ ពីកុមារភាព លោកស្រីបានចម្រើនវ័យធំធាត់ និងឆ្លងកាត់ការសិក្សានៅក្នុងខេត្តកំពង់ចាម។ បន្ទាប់មក លោកស្រីក៏បានបន្តការសិក្សានៅរាជធានីភ្នំពេញនិងបានឆ្លងកាត់វគ្គបណ្តុះបណ្តាលជាច្រើនលើផ្នែកប្រព័ន្ធផ្សព្វផ្សាយទាំងក្នុងនិងក្រៅប្រទេស ព្រមទាំងបានបញ្ចប់ការសិក្សាបរិញ្ញាបត្រជាន់ខ្ពស់ផ្នែកសេដ្ឋកិច្ច ទំនាក់ទំនងអន្តរជាតិ និង វិទ្យាសាស្រ្តនយោបាយ។
មកទល់ពេលបច្ចុប្បន្ននេះ លោកស្រី ខែក ខេមរ៉ាត គឺជាអ្នកជំនួញស្រ្តីវ័យក្មេងម្នាក់ដែលបានប្រឡូកក្នុងវិស័យប្រព័ន្ធផ្សព្វផ្សាយអស់រយៈពេលប្រមាណ១៥ឆ្នាំនិងបានឆ្លងកាត់បទពិសោធន៍ការងារជាច្រើនលើការងារជាអ្នកនិពន្ធនិងជាអ្នកផលិតកម្មវិធីទូរទស្សន៍។ លោកស្រីមានស្នាដៃផលិតនូវវីដេអូឯកសារជាច្រើនជូនដល់ស្ថាប័នរាជរដ្ឋាភិបាល ស្ថាប័នអង្គការក្រៅរដ្ឋាភិបាលធំៗជាច្រើន រួមមានជាអាទិ៍ UNDP, Red Cross International, World Vision Cambodia, UNESCO ព្រមទាំងបានផលិតឯកសារវីដេអូជូនដល់ ស្ថាប័នទូរទស្សន៍អន្តរជាតិល្បីៗ ដូចជា Arirang Korea to ABC Australia, The Nation of Thailand ផងដែរ។
លោកស្រីបានកាប់កាប់មុខជំនួញជាច្រើននៅក្នុងដៃ ដូចជា ក្រុមហ៊ុនប្ល៊ូមេឌា ហ្វីម (ខេមបូឌា) Blue Media Films (Cambodia) បម្រើសេវាកម្មផ្នែកប្រព័ន្ធផ្សព្វផ្សាយ, វិចិត្រសាលសន្លឹកទេស (មានលក់គំនូរ និងវត្ថុអនុស្សាវរីយ៍ និងជាសហស្ថាបនិកក្រុមហ៊ុនក្រុមហ៊ុន JFT Jet ដែលជាទីភ្នាក់ងារនៃក្រុមហ៊ុនបារាំងមួយប្រចាំនៅប្រទេសកម្ពុជា ផ្តល់សេវាកម្មផ្នែកជួលយន្តហោះឯកជន (Private Jet) និងយន្តហោះសង្រ្គោះបន្ទាន់ (Air Ambulance) ។
នៅក្នុងវិស័យជំនួញ លោកស្រីបានទទួលពានរង្វាន់សំខាន់ចំនួន២ ទីមួយគឺនៅឆ្នាំ២០១៦ បានទទួលពានរង្វាន់ «Rising Start award» នៅទីក្រុងប៉េកាំង ប្រទេសចិន ក្នុងនាមជាស្រ្តីឆ្នើមក្នុងប្រព័ន្ធផ្សព្វ ផ្សាយនៅកម្ពុជា។ ទីពីរ គឺនៅឆ្នាំ២០១៨ លោកស្រីក្នុងនាមម្ចាស់ក្រុមហ៊ុនប្ល៊ូមេឌា ហ្វីម (ខេមបូឌា) ទទួលបានពានរង្វាន់ក្រុមហ៊ុនឈានមុខពីគណៈកម្មការមូលបត្រកម្ពុជា។ ព្រមជាមួយសមត្ថភាពផ្នែកការងារដ៏ប៉ិនប្រសប់ លោកស្រី ខែក ខេមរ៉ាត ក៏ជាបុគ្គលមួយរូបបានចូលរួមចំណែកជួយសង្គមក្នុងការងារមនុស្សធម៌នានាតាមរយៈមូលនិធិជនបទកម្ពុជា ( Chunnabort Foundation) ដែលលោកស្រីផ្ទាល់ជាស្ថាបនិក។ លោកស្រីតែងបានកៀងគរជំនួយពីសប្បុរសជននានាដើម្បីជួយដល់កុមារកំព្រា ចាស់ជរា គ្រួសារដែលជួបការលំបាកខ្វះខាតនិងគ្រួសារដែលរងនូវផលប៉ះពាល់ដោយសារគ្រោះទឹកជំនន់ ជាដើម ថែមទៀតផង៕
Article by SRIN SOKMEAN