ស្របពេលដែលប្រទេសកម្ពុជាកំពុងរីកចម្រើនក្នុងវិស័យអាជីវកម្មហាងកាហ្វេស្ទើរទូទាំងប្រទេសនោះ កម្មវិធីប្រកួតប្រជែងឆុងកាហ្វេថ្នាក់ជាតិប្រចាំប្រទេសកម្ពុជា ឬ «Cambodia National Barista Championship» ត្រូវបានបង្កើតឡើងក្នុងគោលបំណងដើម្បីស្វែងរកជើងខ្លាំងដែលមានទេពកោសល្យឆុង កាហ្វេឆ្នើមថ្នាក់ជាតិ ក៏ដូចជាចូលរួមលើកកម្ពស់វិស័យនេះឲ្យកាន់តែមានលក្ខណៈប្រកួតប្រជែងរីកចម្រើនទៅមុខពីមួយឆ្នាំទៅមួយឆ្នាំ។ ដោយឡែកសម្រាប់ ឆ្នាំ២០២២នេះ លទ្ធផលកម្មវិធីប្រកួតប្រជែងខាងលើនេះត្រូវបានប្រកាសជាផ្លូវការនៅលើបណ្តាញសង្គមកាលពីពេលថ្មីៗកន្លងទៅនេះហើយជ័យលាភីលេខ១ត្រូវបានធ្លាក់ទៅលើយុវជនក្នុងស្រុកមួយរូបគឺ លោក ហ៊ួន ចាន់ដារ៉ា (Huon Chan Dara)។ តើលោកជានរណា?ហើយមានបទពិសោធន៍យ៉ាងដូចម្តេចខ្លះទើបឈានមកដណ្តើមបានពានដ៏អស្ចារ្យប្រចាំឆ្នាំមួយនេះ?
ជួបសម្ភាសន៍ជាមួយទស្សនាវដ្តីសូវរីន យុវជន ហ៊ួន ចាន់ដារ៉ា បានរំព្ញកថា លោកចាប់ផ្តើមប្រឡូកវិស័យឆុង កាហ្វេនេះតាមរយៈបទពិសោធន៍ការងារដំបូងជាអ្នករត់តុនិងឆុងតែ-កាហ្វេ(ប្រភេទកាហ្វេកិនស្រាប់)ប្រចាំបានីយដ្ឋាននៃសណ្ឋាគារមួយកន្លែង។ ក្នុងអំឡុងឆ្នាំ២០១៦ លោករកឃើញថាខ្លួនឯងស្រឡាញ់ការងារនេះខ្លាំងមែនទែន ដោយសារតែលោកជក់ចិត្តនឹងបរិយាកាសហាងកាហ្វេដែលជាទូទៅមានលក្ខណៈសេវាកម្មស្និទ្ធស្នាលជាងសេវាកម្មភោជនីយដ្ឋានដំណាលគ្នានឹងយីហោកាហ្វេល្បីៗជាច្រើនដែលចាប់ផ្តើមមានវត្តមាននៅក្នុងទីផ្សារស្រុកយើង តួយ៉ាង Gloria Jean’s និង Starbucks ជាដើម។ ព្រឹត្តិការណ៍សំខាន់នៃជីវិតការងាររបស់លោកដែលបណ្តាលឲ្យលោកចាប់អារម្មណ៍នឹងកម្មវិធីប្រឡងឆុងកាហ្វេនោះគឺក្នុងអំឡុងឆ្នាំ ២០១៧ ក្រោយពេលដែលលោកកំពុងបម្រើការងារនៅហាងកាហ្វេនោះជិតមួយឆ្នាំ មានអ្នកឯកទេសលីងកាហ្វេដែលជាបេក្ខជនជ័យលាភីមួយរូបនៃកម្មវិធីនោះបានលើកឡើងលោកអំពីការប្រកួតប្រជែងឆុងកាហ្វេជាលើកដំបូង ហើយលោកបានចាប់អារម្មណ៍អំពីរឿងនេះជាខ្លាំង ព្រោះលោកចង់ដឹងចង់ឮ និងចង់ពង្រឹងសមត្ថភាពវិជ្ជាជីវៈបន្ថែមលើការងារប្រចាំថ្ងៃដែលមានស្រាប់។
តាមរយៈការស្គាល់អ្នកជំនាញផ្នែកកាហ្វេនិងឱកាសចូលទៅមើលគេប្រកួតផងនោះ លោកកាន់តែចង់ក្លាយជាបេក្ខជនចូលរួមប្រកួតប្រជែងក្នុងកម្មវិធីពាក់ព័ន្ធនឹងការឆុងកាហ្វេ។ មុនពេលក្លាយជាជ័យលាភីកម្មវិធី «Cambodia National Barista Championship» នេះ លោកក៏ធ្លាប់ទទួលជ័យជម្នះក្នុងកម្មវិធី «Cambo Brewer Battle» កាលពីឆ្នាំ២០១៩ រួចទៅហើយ។ បទពិសោធន៍នៃការប្រឡងមុនៗ គួបផ្សំនឹងការព្យាយាមសង្កេតរៀនសូត្រចំណុចខ្លាំងពីអ្នកជំនាញរៀមច្បងនានាបានដុសខាត់សមត្ថភាពរបស់លោកឲ្យកាន់តែល្អជាងមុនពីមួយថ្ងៃទៅមួយថ្ងៃ។ ចូលមកដល់ការប្រកួតកម្មវិធីប្រចាំឆ្នាំនេះវិញ លោកក៏បានចំណាយពេលស្វែងយល់លម្អិតពីវាថាតើគណៈកម្មការចង់បានអ្វី និងហ្វឹកហាត់ដោយខ្លួនឯងយ៉ាងហោចណាស់ក៏មួយឆ្នាំមុនដែរ។ លោកបានបញ្ជាក់ថា ជ័យលាភីឆុងកាហ្វេមិនមែនសំដៅដល់តែការឆុងកាហ្វេឲ្យមានរសជាតិឆ្ងាញ់ជាងគេនោះទេ តែមានចំណុចរង្វាយតម្លៃជាច្រើនដែលបេក្ខជនត្រូវយកចិត្តទុកដាក់ ជាអាទិ៍រួមមាន ការមិនខ្ជះខ្ជាយវត្ថុធាតុដើម បច្ចេកទេសឆុង និង គំនិតច្នៃប្រតិដ្ឋបង្កើតថ្មី ជាដើម។
ការប្រឡងត្រូវបានប្រព្រឹត្តទៅយ៉ាងស្វិតស្វាញតាមស្តង់ដារកម្មវិធីកំណត់ក្នុងរយៈពេល២ខែ ដែលត្រូវបានកាត់សេចក្តីដោយគណៈកម្មការពីរប្រភេទគឺ SENSORY JUDGE (ដាក់ពិន្ទុលើរសជាតិនិងសេវាកម្ម) និង TECHNICAL JUDGE (ដាក់ពិន្ទុលើបច្ចេកទេស)។ បេក្ខជនចូលរួមត្រូវបានជម្រុះពីជាង៤០នាក់ មក១២នាក់ រហូតដល់៦នាក់ចុងក្រោយនៅវគ្គផ្តាច់ព្រ័ត្រ ហើយបេក្ខជនជ័យលាភីលេខ១ លេខ២ និង លេខ៣ ត្រូវបានជ្រើសរើសដោយផ្អែកលើលំដាប់ពិន្ទុនៃបេក្ខជន៦នាក់ចុងក្រោយនោះឯង។ រីឯចំណុចខ្លាំងរបស់លោកគឺ លោកបានសិក្សាច្បាស់លាស់ជាទីបំផុតអំពីប្រភពដើមនៃគ្រាប់កាហ្វេ ដែលលោកបានប្រមូលទិន្នន័យពីកសិករសហគមន៍ផ្ទាល់ ពោលគឺ ជាប្រភេទគ្រាប់កាហ្វេបេះសម្រាំងដោយដៃ (Hand-picked) ជាលក្ខណៈគ្រួសារដែលមានគុណភាពខ្ពស់ជាងកាហ្វេដែលប្រមូលផលលក្ខណៈអាជីវកម្ម/កសិ-ឧស្សាហកម្ម។ នេះជាចំណុចដែលគណៈកម្មការស្ញើចសរសើរនិងឲ្យតម្លៃខ្ពស់ ព្រោះកាហ្វេដែលមានគុណភាព គឺ ៧០% អាស្រ័យលើថ្វីដៃរបស់ប្រជាកសិករដែលជាអ្នកដាំដុះនិងប្រមូលផលមុននឹងយកមកលីងនិងឆុងក្លាយជាផលិតផលសម្រេច។ មួយវិញទៀត ដោយសារលោកធ្លាប់ឆ្លងកាត់ការហ្វឹកហាត់ច្រើន លោកក៏យកឈ្នះបេក្ខជនដទៃត្រង់ភាពវៃឆ្លាតបត់បែនចេះដោះស្រាយបញ្ហាក្នុងដំណើរការនៃការឆុងកាហ្វេ។ ម្ចាស់ជ័យលាភីបានបង្ហាញអារម្មណ៍ចំពោះការប្រកួតលើកនេះថា ជារួមលោកពេញចិត្តសមត្ថភាពផ្ទាល់ខ្លួនក្នុងពេលប្រកួតខ្ពស់រហូត៩០ភាគរយ ព្រោះលោកអាចបង្កើនសមត្ថភាពក្នុងវគ្គចុងក្រោយរហូតដល់១០០ពិន្ទុលើសពិន្ទុកាលពីវគ្គមុននោះ។
ជាចុងក្រោយ ជ័យលាភីលេខ១រូបនេះបានបង្ហើបអំពីគោលបំណងរបស់ខ្លួនក្នុងវិស័យនេះថា លោកចង់ក្លាយជានិមិត្តរូបដើម្បីលើកទឹកចិត្តនិងជួយបណ្តុះបណ្តាលអ្នកឆុងកាហ្វេជំនាន់ក្រោយៗដែលមានបំណងចូលរួមប្រកួតកម្មវិធីបែបនេះ។ ខុសពីអ្នកស្នេហាកាហ្វេភាគច្រើនដែលមានក្តីស្រមៃចង់បើកអាជីវកម្មហាងកាហ្វេផ្ទាល់ខ្លួន លោក ដារ៉ា ចង់ចំណាយពេលធ្វើការឆុងដោយផ្ទាល់ដើម្បីពន្លូតសមត្ថភាពជំនាញនេះ ជាជាងធ្វើជាថៅកែគ្រប់គ្រងអង្គុយចាំមើលបុគ្គលិកធ្វើ។ លោកសង្ឃឹមយ៉ាងមុតមាំថា នៅថ្ងៃអនាគត ប្រទេសកម្ពុជាយើងនឹងមានសមាគមកាហ្វេ (Coffee Association) ដើម្បីជំរុញវិស័យនេះឲ្យមានធនធានមនុស្សឈានទៅដណ្តើមជើងឯកឆុងកាហ្វេលំដាប់ពិភពលោក (World Barista Champion) ដូចប្រទេសដទៃទៀត។ ដោយឡែក សម្រាប់បេក្ខជនវិញ ត្រូវមានភាពក្លាហានចូលរួមប្រកួតដើម្បីដឹងសមត្ថភាពពិតរបស់ខ្លួនហើយនាំមកនូវគុណតម្លៃជូនប្រទេសជាតិខ្លួននិងជាមោទកភាពសម្រាប់ក្រុមការងាររៀបចំកម្មវិធីទាំងមូលផងដែរ៕