ឆ្នាំថ្មីឆ្នាំថោះជាវេលាដ៏ស័ក្តិសមជាទីបំផុតដែលមហាជនគួរឈ្វេងយល់អំពីពូជសត្វទន្សាយដែលជាថនិកសត្វតូចមួយប្រភេទដែលខ្មែរយើងក៏ដូចជាប្រជាជនក្នុងសកលលោកនិយមយកមកចិញ្ចឹម ក្រៅពីឆ្កែនិងឆ្មា។ បើនិយាយអំពីសត្វទន្សាយចិញ្ចឹម កាលពីដើមឡើយ នៅប្រទេសយើង មានតែដាក់លក់ក្នុងចំនួនតិចតួចនៅតាមបណ្តាហាងលក់ចិញ្ចឹមក្នុងទីក្រុងឬទីរួមខេត្តធំៗតែប៉ុណ្ណោះ។ គេពុំដែលឃើញមានកន្លែងចិញ្ចឹមសត្វនេះដាច់ដោយឡែកសម្រាប់បង្កាត់ពូជលក់ជាលក្ខណៈទ្រង់ទ្រាយធំដូចកសិដ្ឋានចិញ្ចឹមគោ មាន់ ទា នោះទេ។ ប៉ុន្តែក្នុងអំឡុង១ទសវត្សរ៍ចុងក្រោយ គេឃើញមានវត្តមានស្វាមីភរិយាជនជាតិខ្មែរមួយគូបានចាប់ដៃគ្នាប្រកបរបរអាជីវកម្មផ្គត់ផ្គង់សត្វចិញ្ចឹមប្រភេទនេះដើម្បីតម្រូវការទីផ្សារសត្វចិញ្ចឹមក្នុងស្រុកប្រកបដោយភាពជោគជ័យយ៉ាងខ្លាំង។
កសិដ្ឋានដែលបានរៀបរាប់ខាងលើនេះមានឈ្មោះថា «កសិដ្ឋានចិញ្ចឹមទន្សាយ ខេមបូហ្វាម» ឬ ជាភាសាអង់គ្លេស «Cambofarm Rabbitry» មានអាសយដ្ឋានស្ថិតនៅភូមិព្រែកតាឡុង សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ ។ កសិដ្ឋានដែលមានដំណើរការអាជីវកម្មចិញ្ចឹមពូជទន្សាយធំមុនគេបង្អស់នៅកម្ពុជានេះ ត្រូវបានបង្កើតឡើងដំបូងកាលពីដើមឆ្នាំ២០១៤ ដោយលោក ស្រេង សុវណ្ណារិន និងអ្នកនាង កែវ ម៉ាឡែន គូស្វាមីភរិយាដែលមានទីលំនៅនៅក្រុងភ្នំពេញផ្ទាល់។
លោក ស្រេង សុវណ្ណារិន បានរំព្ញកប្រាប់សូវរីនថា កាលពីឆ្នាំ២០១២ លោកបានចិញ្ចឹមទន្សាយធ្វើជាសត្វចិញ្ចឹមលេងកម្សាន្តផ្ទាល់ខ្លួនដោយសារតែរូបលោកមានចំណង់ចំណូលចិត្តចាប់អារម្មណ៍លើទន្សាយនេះជាយូរមកហើយ ។ ក្រោយមក ដោយសារតែចំនួនកូនទន្សាយចេះតែកើនឡើងជាបន្តបន្ទាប់ លោកក៏សម្រេចចិត្តយកកូនទន្សាយទាំងនោះទៅលក់ឲ្យហាងលក់សត្វចិញ្ចឹម។ ដោយសារតែការលក់នោះជំនាន់នោះទទួលបានតម្លៃថ្លៃគួរសមដែរ លោកក៏បែកគំនិតចង់រកស៊ីបង្កាត់ពូជទន្សាយលក់តែម្តងទៅ។
ស្ថាបនិក ស្រេង សុវណ្ណារិន
ដោយសារមានគំនិតចង់បើកអាជីវកម្មនេះដោយខ្លួនឯងលោកក៏បានចំណាយពេលធ្វើដំណើរទៅសិក្សាបន្ថែមអំពីបច្ចេកទេសចិញ្ចឹមទន្សាយពូជផ្សេងៗនៅកសិដ្ឋានចិញ្ចឹមទន្សាយក្នុងប្រទេសថៃ។ ក្រោយពីយល់ដឹងកាន់តែស្ទាត់ជំនាញពីបច្ចេកទេសទាំងនោះ លោកក៏បានត្រឡប់មកអនុវត្តវានៅក្នុងប្រទេសកម្ពុជាវិញ។ គិតមកដល់ឆ្នាំ២០២៣នេះ កសិដ្ឋានរបស់លោកបានបន្ថែមពូជសរុបចំនួន ១០ពូជ រួមមានដូចជា ពូជទន្សាយក្នុងស្រុក ពូជទន្សាយតូច ពូជទន្សាយត្រចៀកវែង ពូជទន្សាយរោមកម្ញី ពូជទន្សាយរោមស្រមូវ ពូជទន្សាយរោមវែង ពូជទន្សាយយក្ស ជាដើម ក្នុងគោលបំណងដើម្បីទាក់ទាញចិត្តអតិថិជនឲ្យកាន់តែច្រើន។
លោកបានពន្យល់ថាការចិញ្ចឹមទន្សាយមានលក្ខណៈងាយស្រួលជាងការចិញ្ចឹមឆ្កែឆ្មាត្រង់ថាសត្វនេះមិនទាមទារចាក់វ៉ាក់សាំងទេ ព្រោះវាមិនងាយមានជំងឺឆ្លងទៅកាន់ទន្សាយដទៃ ប៉ុន្តែវាត្រូវការជម្រើសរបបចំណីអាហារសម្រិតសម្រាំងជាងឆ្កែឆ្មា។
“ពូជទន្សាយមានច្រើនប្រភេទណាស់ ហើយក៏មានច្រើនតម្លៃដែរ! ប៉ុន្តែប្រភេទនៅក្នុងកសិដ្ឋានបែបនេះ មានតម្លៃខ្ពស់ជាងខាងក្រៅ (ទីផ្សារដែលគ្មានប្រភពពូជច្បាស់លាស់) ។ ភ្ញៀវខ្លះឆ្ងល់ថា ហេតុអ្វីបានជាថ្លៃជាង? យើងក៏ពន្យល់ប្រាប់គាត់ថា ក្នុងកសិដ្ឋាននេះប្រើតែពូជដែលសុទ្ធៗ តែពូជសុទ្ធហើយ តម្លៃវាក៏តាមហ្នឹងដែរ។ ហើយបើពូជដែលអត់សុទ្ធ តម្លៃវាគឺទាបហើយ មិនខុសពីឆ្កែឆ្មានោះទេ ” លោកបានពន្យល់ប្រៀបធៀប។
នេះជាចំណុចខ្លាំងរបស់អាជីវកម្មរបស់លោកគឺផ្តោតសំខាន់បំផុតលើគុណភាពសុខភាពនៃសត្វចិញ្ចឹមនីមួយៗដែលធ្វើឲ្យភ្ញៀវគ្រប់រូបមានទំនុកចិត្តក្នុងការជាវយកទៅចិញ្ចឹម។ អាស្រ័យហេតុនេះ សត្វដែលទិញយកទៅពីកសិដ្ឋានក៏នឹងមានអាយុកាលរស់បានយូរអង្វែងតាមនោះដែរ។ ក្រៅពីទទួលបាននូវពូជសុទ្ធដែលមានសុខភាពល្អធន់នឹងជំងឺតម្កាត់ អ្វីដែលអតិថិជនទទួលបានពីកសិដ្ឋានព្រមជាមួយនោះគឺ វិធីសាស្រ្តថែទាំនិងឲ្យចំណីទន្សាយឲ្យបានត្រឹមត្រូវ ខុសពីទម្លាប់ធម្មតានៅខាងក្រៅ តួយ៉ាង ការផ្តល់ចំណីគ្រាប់និងស្មៅស្ងួតសុខភាពសម្រាប់ទន្សាយ ជំនួសត្រកួននិងការ៉ុត ដែលងាយបង្កជំងឺផ្សេងៗដល់ទន្សាយ បណ្តាលឲ្យវាងាយងាប់មុនអាយុកាលកំណត់របស់វា។
សព្វថ្ងៃ កសិដ្ឋាននេះមានទន្សាយសរុបចំនួនរហូតដល់ជាង ១០០០ក្បាលឯណោះ។ ពូជដែលប្រជាជនខ្មែរយើងនិយមទិញយកទៅចិញ្ចឹមជាងគេ រួមមានជាអាទិ៍ ទន្សាយពូជតូច ទន្សាយរោមកម្ញី ទន្សាយត្រចៀកធ្លាក់ និងទន្សាយពូជយក្ស។ ចំពោះគម្រោងសម្រាប់ឆ្នាំថ្មីនេះ កសិដ្ឋាននឹងត្រៀមបើកសួនកម្សាន្តដែលមានហាងកាហ្វេតម្រូវតាមសេចក្តីត្រូវការរបស់ក្រុមគ្រួសារដែលមានបុត្រធីតាតូចៗចង់មកលេងទន្សាយផង និងអាចទទួលទានភេសជ្ជៈផ្សេងៗផងក្នុងពេលជាមួយគ្នា។ ទន្ទឹមនឹងនេះ កសិដ្ឋានក៏នឹងបន្ថែមពូជថ្មីៗទៀតដើម្បីបំពេញចិត្តរាល់អតិថិជនដែលតែងតែគាំទ្រនិងផ្តល់ទំនុកចិត្តដល់កសិដ្ឋានតាំងពីដើមរៀងមក៕
Article by SRIN SOKMEAN