ធ្មេចបើកៗ នៅតែរយៈពេលជាងកន្លះខែទៀតប៉ុណ្ណោះ កម្ពុជានឹងបានធ្វើជាម្ចាស់ផ្ទះប្រារព្ធព្រឹត្តិការណ៍ ស៊ីហ្គេមលើកទី៣២ ឆ្នាំ២០២៣ ដែលមិនធ្លាប់មានពីមុនមកក្នុងប្រវត្តិសាស្រ្តជាតិ។ ក្នុងចំណោម កីឡាសរុបជាង៣០ប្រភេទដែលនឹងត្រូវដាក់បញ្ចូលក្នុងកម្មវិធីប្រកួតស៊ីហ្គេមខាងមុខនេះ ក៏មានវត្តមានកីឡាទោចក្រយាន ស្ថិតក្នុងលេខរៀងទី៨ នៃបញ្ជីកម្មវិធីប្រកួតផងដែរ។ យុវជន ឆាន ឆៃហ្វុង ជាកីឡាករកង់ភ្នំ (MTB) ដ៏ឆ្នើមមួយរូបប្រចាំសហព័ន្ធកីឡាទោចក្រយាន ដែលធ្លាប់បានកសាងស្នាដៃយ៉ាងច្រើនទាំងលើឆាកជាតិនិងឆាកអន្តរជាតិគួរឲ្យកត់សម្គាល់។ តើកីឡាករជម្រើសជាតិរូបនេះទទួលបានជ័យលាភីអ្វីខ្លះក្នុងអំឡុងពេលថ្មីៗនេះ? ហើយគេហ្វឹកហាត់របៀបណាខ្លះដើម្បីត្រៀមសម្រាប់ការប្រកួតខាងមុខនេះ?
ជួបតាមសារអេឡិចត្រូនិក កីឡាករ ឆាន ឆៃហ្វុង បានផ្តល់បទសម្ភាសន៍ប្រាប់សូវរីនឲ្យដឹងថា ក្នុងរយៈពេលប៉ុន្មានខែចុងក្រោយនេះ ប្អូនពិតជាមានភាពមមាញឹកច្រើនពាក់ព័ន្ធនឹងវិស័យកីឡានេះ ជាពិសេសគឺ ក្នុងខែនេះតែម្តងដែលប្អូនត្រូវព្យាយាមហ្វឹកហាត់កាន់តែខ្លាំងក្រោមការតម្រង់ទិសណែនាំយ៉ាងយកចិត្តទុកដាក់ជាទីបំផុតរបស់ខាងសហព័ន្ធ ព្រោះព្រឹត្តិការណ៍ស៊ីហ្គេមកំពុងរំកិលខិតជិតចូលមកដល់ហើយ។ ម្យ៉ាងវិញទៀត ប្អូន រួមនឹងក្រុមកីឡាករ កីឡាការិនីជម្រើសជាតិមួយចំនួនទៀតក៏ទើបតែបញ្ចប់ការចូលរួមប្រកួតលក្ខណៈអន្តរជាតិពីប្រទេសថៃកាលពីខែមីនាកន្លងទៅថ្មីៗនេះដែរ។ “ សម្រាប់អាជីពជាកីឡាករកង់ភ្នំ មានការហ្វឹកហាត់ជាប្រចាំទៅលើការ បង្កើន Performance (សមត្ថភាព) , Tactical (បច្ចេកទេសយុទ្ធសាស្រ្ត) ស្មារតី និងមានការចំណាយច្រើនទៅលើសម្ភារប្រើប្រាស់ជាប្រចាំ ” កីឡាកររូបនេះបានបកស្រាយ។
ពាក់ព័ន្ធនឹងការត្រៀមខ្លួនឆ្ពោះទៅកាន់ស៊ីហ្គេម យុវកីឡាករជម្រើសជាតិរូបនេះបានបន្ថែមថា “ការត្រៀមស៊ីហ្គេម ខ្ញុំមានការហ្វឹកហាត់ជាប្រចាំតាមកម្មវិធីរបស់លោកគ្រូដើម្បីឆ្ពោះទៅដល់គោលដៅ ហើយមានក្រុម មានជំរំ មានសម្ភារ និងមានផ្លូវសម្រាប់ហ្វឹកហាត់”។ កីឡាកររូបនេះក៏បានបញ្ជាក់ដែរថា សម្រាប់ព្រឹត្តិការណ៍ស៊ី ហ្គេមដែលនឹងប្រារព្ធធ្វើឡើងនៅដើមខែឧសភានេះ រូបគេត្រូវចូលរួមប្រកួតលើវិញ្ញាសាចំនូនពីរ គឺ វិញ្ញាសា Men Elite (ទោល) និងវិញ្ញាសា Team Relay Mixed (បណ្តាក់បុរស-នារី)។ ចំពោះកាលវិភាគនៃការប្រកួតវិញ កម្មវិធីប្រណាំងកង់ភ្នំ ( Cycling MTB) នឹងត្រូវប្រារព្ធធ្វើឡើងរយៈពេលបីថ្ងៃ ចាប់ពីថ្ងៃសៅរ៍ ទី០៦ រហូតដល់ ថ្ងៃចន្ទ ទី០៨ ខែឧសភា ខាងមុខនេះ នៅលើទឹកដីខេត្តសៀមរាបតែម្តង។
គួររំព្ញកដែរថា កីឡាករមកពីក្លិប Empire Cycling Team និងជាសមាជិកក្រុមកង់អាជីព Senior Team កម្រិត Men Elite ខាងលើនេះ បានចូលជាកីឡាករអាជីពក្នុងឆ្នាំ២០២០ ដោយចូលរួមប្រកួតកីឡាថ្នាក់ជាតិ ឆ្នាំ២០២០និងមានការជួយជ្រោមជ្រែងពីសំណាក់លោកគ្រូ អ៊ុច សុខវិបុល និងក្រុមកង់របស់ខ្លួន។ ក្រោយមក រូបគេក៏បានវិវឌ្ឍខ្លួនក្លាយជាកីឡាករទោចក្រយានជម្រើសជាតិក្នុងឆ្នាំ២០២១ ហើយក៏ទទួលបានជោគជ័យជាច្រើនលើករួចមកហើយ ជាអាទិ៍រួមមាន ចំណាត់ថ្នាក់លេខ ៥ កម្មវិធីកីឡាស៊ីហ្គេមលើកទី៣១ (ប្រទេសវៀតណាម), ចំណាត់ថ្នាក់លេខ ២ លើវិញ្ញាសា Men Under 23 និងលេខ៣ លើវិញ្ញាសា Men Elite កម្មវិធី Thailand National Championships ខេត្តចន្ទបុរី ខែមិថុនា ឆ្នាំ២០២២ (ប្រទេសថៃ), ចំណាត់ថ្នាក់លេខ ៤ លើវិញ្ញាសា Men Elite និង វិញ្ញាសា Men Under 23 កម្មវិធី Thailand National Championship ជុំទី១ ខេត្តកញ្ចនបុរី ខែមករា ឆ្នាំ ២០២៣ (ប្រទេសថៃ), ចំណាត់ថ្នាក់លេខ ៤ កម្មវិធី UCI Mountain Bike CUP 1 ខែមីនា ឆ្នាំ២០២៣ លើវិញ្ញាសា XCO Men Under 23 (ប្រទេសថៃ), ចំណាត់ថ្នាក់លេខ ៣ លើវិញ្ញាសា XCO Men Elite និងចំណាត់ថ្នាក់លេខ ៣ លើវិញ្ញាសា XCO Men U23 កម្មវិធី Thailand National MTB Championships ជុំទី៣ ខេត្តពិចិត្រ ខែមីនា ឆ្នាំ២០២៣ (ប្រទេស ថៃ) ។
ជាមួយគ្នានេះដែរ លោក អ៊ុច សុខវិបុល គ្រូបង្វឹកនៃសហព័ន្ធកីឡាទោចក្រយានកម្ពុជា បានមានប្រសាសន៍ថា ឆ្លងកាត់ការប្រកួតសាកល្បងសមត្ថភាពនៅក្រៅស្រុកកន្លងមកនេះ កីឡាករកម្ពុជាពិតជាមានទេពកោសល្យឈានទៅប្រកួតប្រជែងដណ្តើមយកមេដាយជាមួយកីឡាករតំណាងប្រទេសផ្សេងៗ ហើយនេះគឺជាសញ្ញាណវិជ្ជមានសម្រាប់កីឡាប្រភេទប្រយុទ្ធតំណាងកម្ពុជាមួយនេះឆ្ពោះទៅកាន់ស៊ីហ្គេមជាបន្តបន្ទាប់។
“បច្ចុប្បន្ននេះ ជម្រើសជាតិរបស់យើងមានតម្លៃ សហព័ន្ធរបស់យើងក៏មានតម្លៃ ដោយសារតែមានការទទួលស្គាល់ពីបណ្តាសហព័ន្ធនៅអាស៊ីអាគ្នេយ៍របស់យើង ក៏ដូចជាគណៈកម្មការផ្សេងៗ ជាពិសេសចាប់ពីស៊ីហ្គេមលើកទី៣១ មក។ ពេលកម្ពុជាបានបង្ហាញនៅលើឆាកអន្តរជាតិ កីឡាកររបស់យើងមានសក្តានុពលអាចឈានទៅដល់កម្រិតអេលីត បង្ហាញភាពភ្ញាក់ផ្អើល រត់ជួរមុខដាច់ពីរជុំ […] ”។ ទន្ទឹមនឹងនេះ លោកក៏សម្តែងនូវអំណរគុណចំពោះឯកឧត្តម ប៉ាន សូរស័ក្តិ ប្រធានសហព័ន្ធផ្ទាល់ ដែលយកចិត្តទុកដាក់ខ្ពស់តាមរយៈការឧបត្ថម្ភគាំទ្រដល់ក្រុមកីឡាករកម្ពុជាឲ្យចេញទៅវាស់ស្ទង់សមត្ថភាពនៅបរទេស ហើយថែមទាំងបានឧបត្ថម្ភថវិកាចំនួន ជាង១ម៉ឺនដុល្លារដើម្បីចំណាយលើថ្លៃសម្ភារហ្វឹកហាត់នៅជំរំក្នុងខេត្តសៀមរាបទៀតផង។
ជាចុងបញ្ចប់ តាមរយៈវេបសាយទស្សនាវដ្តីសូវរីន កីឡាករ ឆាន ឆៃហ្វុង បានឆ្លើយតបទៅនឹងសំនួរអំពីគោលជំហរប្តេជ្ញាចិត្តត្រៀមប្រកួតស៊ីហ្គេម ២០២៣ នេះប្រកបដោយសុទិដ្ឋិនិយមថា “បាទ! ក្តីសង្ឃឹមនិងការប្តេជ្ញាចិត្តរបស់ខ្ញុំចំពោះស៊ីហ្គេម (គឺថា) ខ្ញុំអាចយកលទ្ធផលល្អមួយសម្រាប់ជូនជាតិសាសន៍របស់ខ្ញុំនិងក្រុមរបស់ខ្ញុំ” ៕
Article by SRIN SOKMEAN