កីឡាលើកទម្ងន់ជាប្រភេទកីឡាមួយដែលមានឥទ្ធិពលជាអន្តរជាតិនិងមានកីឡាករហ្វឹកហាត់ជាច្រើនប្រទេស ទូទាំងសកលលោក។ នៅក្នុងប្រទេសកម្ពុជាយើង ក៏មានសហព័ន្ធកីឡាលើកទម្ងន់នេះដែរ (Cambodia weightlifting federation) ដែលកំពុងតែមានដំណើរការយ៉ាងសកម្មក្នុងការបង្វឹកក្រុមកីឡាករ កីឡាការិនីជម្រើសជាតិ តាមប្រភេទ ទម្ងន់ផ្សេងៗ ដើម្បីត្រៀមឆ្ពោះទៅកាន់ស៊ីហ្គេម (SEA GAMES) លើកទី៣២ នៅក្រុងភ្នំពេញ ដែលនឹងប្រារព្ធធ្វើឡើងចថ្ងៃទី១៣-១៦ ខែឧសភាខាងមុខនេះ។ ជាសក្ខីភាព កញ្ញា គង់ កែវមរកត កីឡាការិនីលើកទម្ងន់ជម្រើសជាតិ បានបង្ហាញពីឆន្ទៈរបស់ខ្លួនចំពោះបេសកកម្មកីឡាក្នុងព្រឹត្តិការណ៍នេះ ព្រមទាំងចែករំលែកបទពិសោធន៍នៃការហ្វឹកហ្វឺនក្នុងនាមជាសមាជិកាក្រុមជម្រើសជាតិ ឲ្យប្រិយមិត្តទាំងឡាយបានយល់ដឹងក្នុងឱកាសដែលប្រជាជាតិខ្មែរទាំងមូលទន្ទឹងរង់ចាំ៦៤ឆ្នាំមកនេះ តាមរយៈគេហទំព័រសូវរីន។
ឆ្លើយតបនឹងសំនួរទីមួយថាតើ កញ្ញាយល់ឃើញយ៉ាងណាខ្លះដែរចំពោះការបង្ហាញវត្តមានប្រកួតលើកដំបូងនៅក្នុងឱកាសស៊ីហ្គេមឆាប់ៗនេះ? កីឡាការិនី គង់ កែវមរកត បានផ្តល់ចម្លើយអមដោយទុកមុខញញឹមនិងទំនុកចិត្តថា “សម្រាប់ខ្ញុំគឺ ខ្ញុំប្តេជ្ញាថានឹងធ្វើឲ្យបានល្អ….ខ្ញុំចាត់ទុកកីឡាស៊ីហ្គេមក្នុងផ្ទះ (ដែលខ្មែរធ្វើជាម្ចាស់ផ្ទះ) នេះជាបទពិសោធន៍ដ៏ធំ។ ខ្ញុំនឹងរៀនសូត្រពីកីឡាករដែលត្រូវមកប្រកួតពីប្រទេសផ្សេងៗ។ ពេលខ្ញុំរៀនសូត្រពីវាហើយ ខ្ញុំនឹងបន្តលេងកីឡាហ្នឹងទៀត។ ខ្ញុំសង្ឃឹមថា ខ្ញុំធ្វើបាននៅស៊ីហ្គេមបន្តបន្ទាប់ទៀត ” ។
ទន្ទឹមនឹងនេះ កញ្ញាបានបង្ហាញក្តីសង្ឃឹមយ៉ាងច្រើនចំពោះមិត្តរួមក្រុមដែលនៅក្នុងសហព័ន្ធដូចគ្នានេះ ថាពិតជាអាចដណ្តើមបានជោគជ័យជូនជាតិ ព្រោះពួកគេសុទ្ធសឹងតែមានសមត្ថភាពរៀងៗខ្លួន ហើយថែមទាំងមានបទពិសោធន៍យ៉ាងក្រាស់ក្រែលពោល គឺដោយសារពួកគេចូលប្រឡូកជាសមាជិកក្រុមកីឡាជម្រើសជាតិនេះមុនរូបនាងទៅទៀត។ ពាក់ព័ន្ធនឹងរឿងបទពិសោធន៍ មរកតបានបញ្ជាក់ថា នាងទើបទទួលបានឱកាសជាប់ជាកីឡាការិនីជម្រើសជាតិកាលពីចុងឆ្នាំមុននេះទេ។ គិតមកដល់ដើមខែឧសភានេះ នាងជាប់តំណែងនេះបានរយៈពេលកន្លះឆ្នាំ មកហើយ។
ថ្វីដ្បិតតែមានបទពិសោធន៍រាងតិចបើធៀបនឹងកីឡាការិនីជម្រើសជាតិរៀមច្បងក៏ដោយ ក៏យុវតីរូបនេះនៅតែមានស្មារតីមិនចុះញ៉មនឹងដំណើរចូលរួមប្រកួតដ៏ខ្លីខាងមុខឡើយ។ ជាក់ស្តែង នាងបានលើកឡើងថា “ខ្ញុំមានទឹកចិត្តជួយសហព័ន្ធ ដោយសារធ្លាប់ចាប់ផ្តើមពីបាតដៃទទេមក។ អ៊ីចឹងទៅ ចង់បន្តជាមួយគ្នាដល់ចប់ចុងចប់ដើម។ ម្យ៉ាងខ្ញុំ ក៏ស្រឡាញ់កីឡាហ្នឹងដែរ ទើបខ្ញុំខំប្រឹង! ” ។ ត្រង់ចំណុចនេះដែរ នាងបានបន្ថែមថា ដំបូងឡើយ ដោយសារមានប្រវត្តិ ផ្តើមចេញពីកីឡាករបាល់ទះ នាងស្រឡាញ់ប្រភេទកីឡាបាល់។ ប៉ុន្តែក្រោយមក ដោយសារតែនាងបានចំណាយពេលតស៊ូចេញទៅហ្វឹកហាត់កីឡាអត្តពលកម្មនៅប្រទេសកូរ៉េ នាងក៏បានបង្វែរចំណង់ចំណូលចិត្តមកផ្តោតលើកីឡាប្រភេទនេះជាង ជាប់រហូតដល់បច្ចុប្បន្ន។
កីឡាការិនីជម្រើសជាតិរូបនេះបានប្រាប់សូវរីនថា ក្នុងមួយថ្ងៃ ត្រូវចំណាយពេលហាត់បីវេន គឺ ពេលព្រឹកព្រលឹម ហាត់កម្លាំងកាយ ពេលព្រឹកម៉ោង៩ ហាត់បច្ចេកទេស Snatch (លើកដុំដែកឲ្យផុតឡើងលើ) និងម៉ោង២រសៀល ហាត់បច្ចេកទេស Clean and Jerk (លើកដុំដែកឲ្យផុតឡើងលើ) ។ ក្នុងមួយសប្តាហ៍ ត្រូវហាត់ជាប់ជាប្រចាំ ពីថ្ងៃច័ន្ទដល់ថ្ងៃសៅរ៍ (ចំពោះថ្ងៃសៅរ៍ ហាត់តែមួយព្រឹក) លើកលែងថ្ងៃអាទិត្យ។ ការហ្វឹកហាត់សម្រាប់ត្រៀមប្រកួត ស៊ីហ្គេម មានទាំងគ្រូបង្វឹកជាជនជាតិខ្មែរ និងជនជាតិបរទេសដើម្បីពង្រឹងសមត្ថភាពរបស់ក្រុមជម្រើសជាតិឲ្យកាន់តែខ្លាំងពូកែទ្វេដង។ ដោយឡែក ក្រុមជម្រើសជាតិដែលហាត់បានរយៈពេល២ឆ្នាំឡើងវិញ មានឱកាសបានចេញទៅហ្វឹកហាត់ដល់ប្រទេសចិនថែមទៀតផង នេះបើតាមការអះអាងរបស់កីឡាការិនីផ្ទាល់។ ចំពោះរូបកញ្ញាវិញ កញ្ញាត្រូវហ្វឹកហាត់ក្នុងស្រុក ហើយត្រូវចូលរួមប្រកួតវិញ្ញាសា នារីទម្ងន់ ៥៩គីឡូក្រាម ក្នុងស៊ីហ្គេម ក្នុងចំណោម១៤ប្រភេទវិញ្ញាសានៃកីឡាលើកទម្ងន់ដែលត្រូវដាក់ប្រកួត។
គួររំព្ញកដែរថា កីឡាការិនីវ័យ២៥ឆ្នាំរូបនេះមានស្រុកកំណើតនៅស្រុកស្ទឹងសែន (បច្ចុប្បន្នក្រុងស្ទឹងសែន) ខេត្តកំពង់ធំ។ កញ្ញាបានចូលជាក្រុមកីឡាការិនីបាល់ទះជម្រើសសាលាប្រចាំវិទ្យាល័យកំពង់ធំ ចាប់តាំងពីថ្នាក់ទី៨ រហូតដល់ថ្នាក់ទី១២។ ក្នុងឆ្នាំ២០១៨ កញ្ញាបានប្រឡងជាប់ជាគ្រូបង្រៀនកម្រិតមូលដ្ឋាន ឯកទេសអប់រំកាយនិងកីឡា បម្រើការនៅវិទ្យាល័យមួយនៃខេត្តសៀមរាប។ លុះដល់ចុងឆ្នាំ២០១៩ ក្រោមការណែនាំពីគ្រូកីឡាលើកទម្ងន់ គួបផ្សំនឹងចំណាប់អារម្មណ៍ចំពោះកីឡាថ្មីសម្រាប់រូបនាងផងនោះ កញ្ញាបានសម្រេចចិត្តងាកមកចូលប្រឡូកកីឡាលើកទម្ងន់ វិញ។ កញ្ញាបានចំណាយពេលហ្វឹកហាត់នៅស្រុកក្រៅ រហូតដល់ខែមីនា ឆ្នាំ២០២២ ទើបបានមកស្រុកខ្មែរហាត់បន្ត ជាប់រហូតមក។ ក្នុងឆាកជីវិតជាកីឡាការិនីអាជីពថ្មីថ្មោង កញ្ញាក៏ធ្លាប់ឈ្នះបានជ័យលាភីពានរង្វាន់កូរ៉េ ឆ្នាំ២០២១ (2021 Korea Cup) ពីប្រទេសកូរ៉េ លើវិញ្ញាសា 2-woman BOBSLEIGH រហូតដល់ទៅពីរជុំ (Race 1 & Race 3) គួរឲ្យមានមោទកភាពសម្រាប់សហព័ន្ធក៏ដូចជាសម្រាប់ប្រជាជាតិកម្ពុជាទាំងមូលដែរ៕
Article by SRIN SOKMEAN