Sovrin
Sovrin
លោក ទាង បូរិន ឬមានឈ្មោះក្រៅថា Din លោកគឺជាវិចិត្រករមួយរូបដែលគេតែងស្គាល់ និងហៅលោកថា ជាម្ចាស់ស្នាដៃគំនូរអប្សរាអត់មុខ។ លោក មានស្រុកកំណើតមកពីខេត្តកំពត ហើយក៏បានបញ្ចប់ការសិក្សាបរិញ្ញាបត្រផ្នែកស្ថាបត្យកម្មនៅឆ្នាំ២០០៥។ ចង់ដឹងថា តើការចាប់ផ្តើមប្រឡូកចូលក្នុងវិស័យគំនូររបស់លោកមានដំណើរដើមទងយ៉ាងណានោះ យើងទៅអានបន្តជាមួយសូវរីនទាំងអស់គ្នា។
ជំនួបសំណេះសំណាលជាមួយក្រុមការងារសូវរីន ស្ថិតនៅទីតាំង Din Art Gallery ដែលជាទីបណ្តុំនៃគំនូរអប្សរាជាច្រើនផ្ទាំងកំពុងតាំងបង្ហាញបង្អួតសម្រស់យ៉ាងស្រស់ប្រណីត លោក ទាង បូរិន បានរំលឹកថា រូបលោកស្រលាញ់ និងអាចគូរគំនូរបានតាំងពីលោកមានអាយុ៤ឆ្នាំមកម៉្លេះ។ រាល់ពេលនៅសាលារៀនមានកម្មវិធីការប្រកួតគំនូរម្តងៗ កុមារា បូរិន តែងប្រឡងបានចំណាត់ថ្នាក់ល្អជានិច្ច ហើយលោកតែងចិញ្ចឹមចិត្តថាទៅថ្ងៃអនាគតលោកចង់ក្លាយជាវិចិត្រករដ៏មានទេពកោសល្យមួយរូប។ កន្លងផុតអស់រយៈពេលជាច្រើនឆ្នាំ រហូតដល់លោកបានបញ្ចាប់ការសិក្សាថ្នាក់ទី១២នៅឆ្នាំ១៩៩៩ លោកបានបន្តការសិក្សាបរិញ្ញាបត្រនៅសាកលវិទ្យាល័យមួយកន្លែងនៅទីក្រុងភ្នំពេញ។ ថ្វីបើលោករៀនជំនាញជាស្ថាបត្យកម្មមែនពិត តែលោកក៏នៅតែបន្តការនូរគំនូររាល់ពេលទំនេរពីការសិក្សា។ អំឡុងពេលនោះ ដោយកំពុងមានជីវភាពខ្វះខាតផងនោះ យុវជន ទាង បូរិនក៏បានឆ្លៀតពេលខ្លះគូរគំនូរសម្រាប់ដាក់លក់ដើម្បីបានកម្រៃ។ “ពេលខ្ញុំឡើងមកភ្នំពេញ មានថ្ងៃមួយខ្ញុំបានឃើញគេស្លៀកពាក់តុបតែងតួអង្គអប្សរា ស្អាតមែនទែន វាជាលើកទីមួយហើយដែលខ្ញុំបានឃើញផ្ទាល់។ វាបានធ្វើឱ្យអារម្មណ៍ខ្ញុំដក់ជាប់នឹងតួអង្គអប្សរា ហេតុនេះហើយទើបគំនូរខ្ញុំតែងគូរជារូបអប្សរា។” វិចិត្រកររូបនេះបានលើកឡើង និងបន្តថា ស្នាដៃដែលនាំឱ្យគេស្គាល់លោកដំបូងគេនោះ គឺជាស្នាដៃរូបទម្រង់អប្សរាដែលលោកបានគូរលក់តាមហាងនៅពេលកំពុងសិក្សានៅសាកលវិទ្យានេះឯង។
ក្រោយបញ្ចប់ការសិក្សា និងធ្វើការផ្នែកគូរប្លង់អស់រយៈ៨ឆ្នាំ នៅឆ្នាំ២០១៥ លោក ទាង បូរិន បានងាកមកគូររូប ដែលជាអាជីពក្នុងក្តីស្រមៃលោកវិញ។ លោកបានបង្កើតវិចិត្រសាលរបស់ខ្លួនឯងដែលមានឈ្មោះថា «DinArt» និងបានបញ្ចេញស្នាដៃជាបន្តបន្ទាប់។ ស្នាដៃគំនូររូបអប្សរារបស់លោកជាច្រើនផ្ទាំង ដែលបានបង្ហាញក្បាច់ជាច្រើនទម្រង់ដោយដៃស្រឡូនទាំងគូ រាំយ៉ាងល្វតល្វន់ ក្នុងឈុតសម្លៀកបំពាក់ខ្មែរ រុំដោយសំពត់ស្បៃចងល្បាប់ ហាក់អង្រួនចិត្តអ្នកដែលបានទស្សនាហើយ សរសើរមិនដាច់ពីមាត់ពីទឹកដៃរបស់វិចិត្រករ។ រូបគំនូរដែលនៅស្ងៀម តែហាក់រស់រវើកទាំងនេះហើយ ដែលបានធ្វើឱ្យរូបលោកមានកេរ្តិ៍ឈ្មោះជាវិចិត្រករដ៏មានភាពប៉ិនប្រសប់រហូតមកដល់បច្ចុប្បន្ន។ លោកបានបន្ថែមដែរថា ស្របជាមួយនឹងអាជីពដែលលោកស្រលាញ់នេះ វាក៏ជាចំណែកមួយដែលលោកអាចបញ្ចូល និងថែរក្សានូវអ្វីដែលជារបស់ខ្មែរចូលទៅក្នុងស្នាដៃរបស់លោកដែលអាចឱ្យបរទេសបានស្គាល់ផងដែរ។ “ជាក់ស្តែងពេលមួយ មានជនជាតិបរទេសគេឃើញរូបគំនូរអប្សរានេះហើយ គឺពួកគាត់បានសួរនាំខ្ញុំអំពីអប្សរាខ្មែរ ហើយពួកគាត់ពិតជាចង់ទស្សនាដោយផ្ទាល់ណាស់ ខ្ញុំលឺហើយពិតជាសប្បាយចិត្តមែនទែន វាក៏ជាកត្តារួមចំណែកមួយក្នុងការផ្សព្វផ្សាយអ្វីដែលខ្មែរមាន។” លោកបានលើកឡើង។
ជាចុងក្រោយ វិចិត្រករ ទាង បូរិន ក៏បានបង្ហើបពីគោលបំណងទៅថ្ងៃអនាគតដែរថា រូបលោកចង់ឱ្យ Din Art Gallery ជាទីកន្លែងដែលអាចផ្តល់ឱកាសដល់ប្អូនជំនាន់ក្រោយដែលគាត់ស្រលាញ់វិស័យគំនូរអាចតាំងបង្ហាញស្នាដៃរបស់ខ្លួននៅទីនេះបាន។ ទន្ទឹមនឹងនេះ លោកក៏ចង់បើកហាងកាហ្វេមួយសម្រាប់វិចិត្រសាលរបស់លោកផងដែរ៕
Article by SOUNG SOKSAN
