Sovrin
Sovrin
Attire Lounge ហាងលក់សម្លៀកបំពាក់បុរសដែលផ្តោតសំខាន់ទៅលើការប្រឹក្សាយោបល់
NEWS one year ago
Attire Lounge គឺជាម៉ាកយីហោក្នុងស្រុកមួយ ដែលត្រូវបានប្រសិទិ្ធនាមឡើងជាហាងលក់សម្លៀកបំពាក់បុរសបែបប្រចាំថ្ងៃ និងផ្លូវការ ដែលបានផ្តោតសំខាន់ទៅលើការប្រឹក្សាយោបល់ជូនដល់អតិថិជនដោយឥតគិតថ្លៃ ដោយជ្រើសរើសសម្លៀកបំពាក់បែបសុភាពបុរសឱ្យស័ក្តិសមទៅតាមតម្រូវការ ចំណង់ចំណូលចិត្ត ស្របជាមួយបរិបទនៃការរស់នៅ ក៏ដូចជាកាលៈទេសៈ ការចូលរួមកម្មវិធី ជាពិសេសឱ្យសមនឹងរូបរាង ពណ៌សម្បុរស្បែករបស់អតិថិជនផ្ទាល់តែម្តង។ Attire Lounge ត្រូវបានផ្តួចផ្តើមឡើងដោយសហស្ថាបនិកដែលជាកូនខ្មែរ៤រូប ដែលមានគោលបំណងចង់លើកកម្ពស់ទៅដល់ការស្លៀកពាក់របស់សុភាពបុរសគ្រប់រូបឱ្យកាន់តែមានទំនុកចិត្ត បង្ហាញអ្វីដែលជាខ្លួនឯង ស្លៀកពាក់អ្វីទៅតាមចំណូលចិត្ត និងចង់ឱ្យហ្វេហ្សិនរបស់បុរសរីកចម្រើនដូចទៅនឹងហ្វេហ្សិនរបស់នារីផងដែរ។
សហស្ថាបនិកទាំង៤រូប
តាមការជំនួបជាមួយលោក ប៉េងអាន និងលោក តុងហួរ ឬត្រូវបានគេស្គាល់លោកថា Key ដែលជាសហស្ថានិក២រូបក្នុងចំណោម៤រូប បានបង្ហើបឱ្យដឹងថា អ្វីដែលជាចំណុចសំខាន់របស់ Attire Lounge នោះគឺ ការផ្តោតទៅលើការប្រឹក្សាយោបល់ជូនដល់អតិថិជន។ “គ្រប់អតិថិជនដែលមកកាន់ Attire Lounge ពួកគាត់នឹងមានអារម្មណ៍ថា ពួកយើងគឺជាមិត្តភ័ក្តិបុរស ឬជាបងប្អូនដែលអាចជជែកអំពីការស្លៀកពាក់ជាមួយពួកគាត់ ដែលមិនមែនត្រឹមតែជាអ្នកលក់ និងអ្នកទិញប៉ុណ្ណោះទេ។ ជាពិសេសគឺ ប្រៀបបីដូចពួកគាត់មានអ្នករៀបចំស្ទាយ៍ផ្ទាល់ខ្លួនសម្រាប់ពួកគាត់ផងដែរ។” សហស្ថាបនិកទាំង២បានលើកឡើង និងបន្តទៀតថា លោកមិនចង់ឱ្យគ្រប់អតិថិជនដែលមកកាន់ទីនេះហើយជ្រើសរើសសម្លៀកបំពាក់ណាមួយដែលមិនសមនឹងគាត់នោះទេ ដូច្នេះពួកគាត់មកកាន់ទីនេះ គឺនឹងត្រឡប់ទៅវិញជាមួយនឹងសម្លៀកបំពាក់ដែលស័ក្តិសមនឹងរូបគាត់។
ទន្ទឹមនឹងការផ្តោតសំខាន់លើការប្រឹក្សាយោបល់ជូនអតិថិជន Attire Lounge ក៏បានព្យាយាមស្វែងយល់យ៉ាងស៊ីជម្រៅបន្ថែមទៅលើការស្លៀករបស់បុរសឱ្យបានត្រឹមត្រូវ និងគិតគូរទៅលើគុណភាព ស្របជាមួយនឹងតម្លៃសមរម្យផងដែរ។ ចំពោះសម្លៀកបំពាក់របស់ម៉ាកយីហោនេះ ត្រូវបាននាំចូលពីបរទេស តួយ៉ាង ប្រទេសថៃ វៀតណាម តៃវ៉ាន់ និងប៉ែកខាងអ៊ឺរ៉ុប ក៏ដូចជាសហការជាមួយអ្នកច្នៃម៉ូតនៅក្នុងស្រុកផងដែរ។
ងាកមកជ្រាបអំពីជម្រើសប្រភេទសម្លៀកបំពាក់ដែលមាននៅ Attire Lounge វិញ ទីនេះបានសម្រិតសម្រាំងទៅលើ៣ប្រភេទគឺ សម្លៀកបំពាក់បែបកូនកម្លោះ សម្លៀកបំពាក់បែបអ្នកធ្វើការនៅការិយាល័យ និងសម្លៀកបំពាក់បែបសុភាពបុរសប្រចាំថ្ងៃ និងផ្លូវការ។ ហើយទីនេះទៀតសោត មិនត្រឹមតែមានលក់ជាប្រភេទអាវធំ អាវសាមី ខោចង្កេះខ្ពស់នោះទេ តែក៏មានស្បែកជើង កាបូបដែលបានឌីហ្សាញ និងផលិតក្នុងស្រុក រួមជាមួយប្រភេទគ្រឿងតុបតែងលម្អបន្ថែមរបស់បុរសជាច្រើនផងដែរ ដែលយើងអាចជ្រើសរើសសម្រាប់លេងស្ទាយ៍ជាមួយនឹងការស្លៀកបំពាក់ឱ្យកាន់តែស័ក្តិសម និងមានភាពស៊ីវិល័យ។
សហស្ថាបនិកទាំង២រូបក៏បានលើកឡើងដែរថា “យើងមិនត្រូវសម្របខ្លួនតាមសម្លៀកបំពាក់នោះទេ តែយើងត្រូវជ្រើសរើសសម្លៀកបំពាក់ដែលសមស្របនឹងខ្លួនយើង។ យើងត្រូវហ៊ានផ្លាស់ប្តូរអ្វីដែលថ្មី បើកចិត្តឱ្យទូលាយ ហើយវាក៏អាចចាប់ផ្តើមពីការផ្លាស់ប្តូរការស្លៀកពាក់ ព្រោះការស្លៀកពាក់មិនត្រឹមតែបង្ហាញថាយើងជានរណានោះទេ តែវាក៏ជាការផ្តល់តម្លៃឱ្យខ្លួនឯង និងអ្នកជុំវិញខ្លួនផងដែរ។”
គួរជម្រាបដែរថា Attire Lounge បើកស្វាគមន៍អតិថិជនជារៀងរាល់ថ្ងៃ ចាប់ពីម៉ោង ១០ព្រឹក ដល់ម៉ោង៧យប់៕
Article by SOUNG SOKSAN
