«នភាល័យ» ហាងកាហ្វេសាមញ្ញ តែផ្តល់នូវបរិយាកាស និងរសជាតិថ្មីដល់អតិថិជន
NEWS 10 months agoអាជីវកម្មហាងកាហ្វេនៅតែបន្តរីកដុះដាលជាបន្តបន្ទាប់ពីមួយថ្ងៃទៅមួយថ្ងៃ ដែលស្ទើរតែមានគ្រប់ច្រកល្ហកទៅហើយនៅទីក្រុងភ្នំពេញ។ រាល់អាជីវកម្មហាងកាហ្វេបង្កើតថ្មីពីមួយកន្លែងទៅមួយកន្លែង រមែងមានភាពទាក់ទាញ ភាពខុសប្លែកពីគ្នា មិនថារសជាតិនៃកាហ្វេ តម្លៃ ការតុងតែងដេគ័រ ឬបរិយាកាសនៃហាងនោះទេ ស្ថាបនិកនៃហាងនីមួយៗតែងរកអ្វីថ្មីសម្រាប់អតិថិជនខ្លួនជានិច្ច។ ជាក់ស្តែងហាងកាហ្វេ «នភាល័យ» គឺជាហាងកាហ្វេមួយដែលទើបនឹងបង្កើតឡើងថ្មីនៅម្តុំក្រុងតាខ្មៅ មានគំនិតផ្តួចផ្តើមឡើងដោយស្ថាបនិកវ័យក្មេងមួយរូបដែលមានវោហារមិនចេះរីងស្ងួត និងមានចិត្តស្រលាញ់លើជំនួញតាំងពីក្មេងមកម្ល៉េះ។
ជំនួបជាមួយយុវជន ឌឿន សុខតង់ ឬគេស្គាល់ថាលោក តៅហ៊ូ មានវ័យ២១ឆ្នាំ ជាម្ចាស់អាជីវកម្មហាងកាហ្វេ «នភាល័យ» បានបង្ហើបអំពីមូលហេតុដែលបង្កើតហាងនេះឡើងថា “ដំបូងឡើយខ្ញុំគិតថានៅទីណាក៏គេបើកលក់កាហ្វេដែរ ខ្ញុំមិនចង់បើកទេ តែមានថ្ងៃមួយខ្ញុំបានជួបរឿងមួយដែលធ្វើឱ្យខ្ញុំបាក់ទឹកចិត្តជាខ្លាំង ខ្ញុំក៏បានរលឹកទៅកាន់ម៉ាក់យាយរបស់ខ្ញុំ។ កាលពីក្មេងតែងឃើញម៉ាក់យាយខ្ញុំឆុងកាហ្វេរាល់ថ្ងៃជារៀងរាល់ព្រឹក ហើយខ្ញុំបានចងចាំក្លិនកាហ្វេនេះជានិច្ចមិនភ្លេចឡើយ ក៏ជំរុញឱ្យខ្ញុំមានកម្លាំងចិត្តមកវិញ ក៏ចាប់អារម្មណ៍បើកហាងកាហ្វេ។ ចាប់តាំងពីពេលនោះមកខ្ញុំក៏អាចបង្កើតហាងដែលមានឈ្មោះ «នភាល័យ» ជាមួយនឹងក្តីស្រលាញ់របស់មកជាមួយគ្នាផងដែរ។” លោកបានបន្តថា អ្វីដែលយើងមិនចូលចិត្ត គិតថាមិនល្អ វាអាចជារឿងមួយដែលល្អសម្រាប់យើង និងអាចកែប្រែឱ្យសុខភាពផ្លូវចិត្តយើងល្អប្រសើរ ប្រសិនបើយើងចាប់ផ្តើមធ្វើវានៅថ្ងៃណាមួយ។
សម្រាប់កាហ្វេដែលជារសជាតិប្រចាំហាងនៅទីនេះ ស្ថាបនិកបង្កើតរូបមន្តឡើងដោយខ្លួនឯងផ្ទាល់ មាន៤រសជាតិគឺ កាហ្វេអំបិល កាហ្វេហឹរ កាហ្វេម្លិះ និងកាហ្វេពពក ដែលមានឱជារសឆ្ងាញ់ប្លែកខុសពីកាហ្វេទឹកដោះគោ ឬកាហ្វេអាយឡាតេទូទៅ។ ក្រឡែកមកការតុបតែងដេគ័រនៃហាងវិញ លោកបន្តប្រាប់មកកាន់សូវរីនថា លោកមិនចង់តុបតែងឱ្យមើលទៅរៀបរយខ្លាំងពេកនោះទេ គឺបែបសាមញ្ញនិយម ដោយព្យាយាមធ្វើយ៉ាងណាឱ្យអតិថិជនដែលអញ្ជើញមកកាន់ទីនេះមានអារម្មណ៍ថាដូចជាតៀមកាហ្វេចិន ឬបរិយាកាសដូចអង្គុយទទួលទានកាហ្វេនៅផ្ទះខ្លួនឯង ដែលផ្តល់នូវអារម្មណ៍ស្រស់ស្រាយ និងមានភាពងាយស្រួល។
មិនតែប៉ុណ្ណោះ ស្ថាបនិកវ័យក្មេងរូបនេះ ចង់ផ្តល់ឱ្យអតិថិជនដែលមកទទួលបានរសជាតិកាហ្វេដែលប្លែកឆ្ងាញ់ និងអាចទទួលទានបានជារៀងរាល់ថ្ងៃ ហើយចំពោះតម្លៃវិញក៏សមរម្យ ដែល១កែវមានតម្លៃចាប់ពី៤០០០៛ តែប៉ុណ្ណោះ។ អ្វីដែលសំខាន់ ហាងកាហ្វេ «នភាល័យ» ក៏ត្រៀមនឹងបើកបន្ថែមសាខាថ្មី និងបង្កើតរសជាតិកាន់តែប្លែកសម្រាប់អតិថិជនផងដែរ។
គួរជម្រាបដែរថា ហាងកាហ្វេ «នភាល័យ» ចាប់បើកទទួលស្វាគមន៍អតិថិជនជារៀងរាល់ថ្ងៃ ចាប់ពីម៉ោង៧ព្រឹកដល់ម៉ោង៥ល្ងាច ហើយចាប់ពីម៉ោង៥ល្ងាចរហូតដល់ម៉ោង១២យប់ នឹងបន្តបើកជាផាប់ ដែលមានលក់មុខម្ហូប និងគ្រឿងក្លែមជាច្រើនមុខ និងភេសជ្ជជាច្រើនប្រភេទផងដែរ។ ដូច្នេះ កុំភ្លេចមកអង្គុយក្រេបរសជាតិកាហ្វេ ជជែកគ្នាលេងកម្សាន្ត ដើម្បីទទួលបានបទពិសោធ៍ថ្មីដល់ខ្លួនឯង៕
Article by SOUNG SOKSAN