Sovrin
Sovrin
ក្រោយភ្ញាក់ពីដំណេក អ្នកប្រាកដជារំពឹងទុកថានឹងមានរឿងល្អៗជាច្រើននឹងកើតឡើងចំពោះអ្នកពេញមួយថ្ងៃ។ ផ្ទុយមកវិញ វាមិនអាចដូចការរំពឹងទុកទាំងស្រុងនោះទេ ជួនកាលអ្នកអាចជួបបញ្ហាស្មុគស្មាញច្រើនជាងភាពរីករាយក៏ថាបាន។ ហេតុដូចនេះដើម្បីបញ្ចៀសនូវរឿងរ៉ាវមិនល្អ ក៏ដូចជាភាពស្មុគស្មាញ ហើយនាំមកវិញនូវថ្ងៃល្អ សូវរីន សូមបង្ហាញនូវគន្លឹះសំខាន់ៗដែលនឹងធ្វើឲ្យអ្នកទទួលបានអារម្មណ៍ស្រស់ស្រាយពេញមួយថ្ងៃ។
ទទួលទានអាហារពេលព្រឹក
ជឿទេថាការទទួលទានអាហារពេលព្រឹកអាចធ្វើឲ្យអ្នកមានអារម្មណ៍ស្រស់ស្រាយ? ជាការពិតណាស់ អាហារពេលព្រឹកគឺពិតជាមានសារៈសំខាន់ចំពោះសុខភាពដែលនឹងធ្វើឲ្យរាងកាយមានថាមពលពេញមួយថ្ងៃ ហើយក៏ដូចជាបានបង្កើនទៅលើស្មារតីនឹងនរ កាត់បន្ថយភាពតានតឹង ព្រមទាំងបង្កើនការចងចាំផងដែរ។ យើងអាចសម្គាល់ឃើញថាអ្នកដែល ទទួលទានអាហារពេលព្រឹកតែងតែមានភាពសកម្មជាងអ្នកដែលមិនទទួលទាន។ ដោយឡែកការតមអាហារពេលព្រឹកអាចធ្វើឲ្យរាងកាយចុះខ្សោយ ជាពិសេសប្រឈមបញ្ហាផ្សេងៗដូចជាឡើងទម្ងន់ កើតជំងឺទឹកនោមផ្អែម ចង់ក្អួតចង្អោរ ល្ហិតល្ហៃ វិលមុខធីងធោង និងប្រព័ន្ធការពាររាងកាយចុះខ្សោយផងដែរ។
សម្រាកឲ្យបានច្រើន
ទោះបីជាអ្នកមានភាពមមាញឹកជាមួយនឹងការងារច្រើនយ៉ាងណាក្តី ប៉ុន្តែអ្នកគួរតែវែកញែកពេលវេលាខ្លះៗក្នុងការស្រូបយកខ្យល់អាកាសបរិសុទ្ធ និងគយគន់ទេសភាពនានា ដើម្បីរំសាយភាពតានតឹងទាំងឡាយដែលកើតមានចំពោះអ្នក។ អ្នកគួរតែចំណាយពេលវេលាខ្លះៗ សម្រាប់មនុស្សនៅជុំវិញខ្លួន ឬមនុស្សជាទីស្រឡាញ់ឲ្យបានច្រើនតាមដែលអាចធ្វើទៅបាន។ កត្តាសំខាន់គេងឲ្យបានគ្រប់គ្រាន់យ៉ាងហោចណាស់ប្រាំបីម៉ោងក្នុងមួយថ្ងៃ និងគួរតែចូលគេងពីព្រលប់។
កាត់បន្ថយគ្រឿងអេឡិចត្រូនិច
អ្នកស្រាវជ្រាវបានរកឃើញថា វិទ្យុសកម្មនៃគ្រឿងអេឡិចត្រូវនិចខ្ពស់អាចធ្វើឲ្យមានការប៉ះទង្គិចដល់ផ្លូវអារម្មណ៍យ៉ាងធ្ងន់ធ្ងរ ជាពិសេសរំខានដល់ដំណេកជាចម្បង។ ហេតុដូចនេះ គួរកាត់បន្ថយនូវការប្រើប្រាស់គ្រឿងអេឡិចត្រូនិចឲ្យបានកាន់តែច្រើនកាន់តែប្រសើរ ដោយជំនួសមកវិញនូវការបង្កើតទំនាក់ទំនងជាមួយមនុស្សជុំវិញខ្លួន ដើរកម្សាន្តលម្ហែអារម្មណ៍ទីជិតឆ្ងាយ ទទួលទានអាហារដែលជាចំណង់ចំណូលចិត្ត និងលេងកីឡាជាដើម។
ការលេងកីឡា
ការលេងកីឡាមិនត្រឹមតែនាំមកនូវសុខភាពល្អដល់អ្នកតែម៉្យាងនោះទេ លើសពីនេះកីឡាក៏អាច
បង្កើតបាននូវបរិយាកាសសប្បាយរីករាយសម្រាប់អ្នកផងដែរ។ បន្ថែមពីនេះទៅទៀត អ្នកគួរតែលេងកីឡាឲ្យបានច្រើន ទើបអ្នកមិនមានអារម្មណ៍ថាឯកា ឬមានភាពតប់ប្រមល់ផ្សេងៗ។
បង្កើតមិត្តភាព
ការចងចំណងមិត្តភាពជាមួយនឹងមនុស្សជុំវិញខ្លួនពិតជាមានសារៈសំខាន់ខ្លាំងបំផុត។ ជាក់ស្តែង នៅ
ពេលដែលយើងកំពុងតែស្ថិតនៅក្នុងភាពតានតឹងខ្លាំងណាមួយ មិនថាការងារការសិក្សាឬការប្រកបមុខរបរនោះទេ អ្នកប្រាកដជាត្រូវការដំបូន្មានល្អៗ ឬការលើកទឹកចិត្តពីមនុស្សដែលនៅជុំវិញខ្លួនអ្នកជាក់ជាមិនខាន។ ដូចនេះ អ្នកគួរតែបង្កើតទំនាក់ទំនងឲ្យបានច្រើន និងរក្សាចំណងមិត្តភាពនោះឲ្យបានគង់វង្សទើបជាការប្រសើរ។
ជាការពិតណាស់នៅក្នុងជីវភាពរស់នៅប្រចាំថ្ងៃរបស់មនុស្សគ្រប់រូបមិនមែនសុទ្ធតែមានភាពសប្បាយរីករាយរហូតនោះទេ ពេលខ្លះក៏មានរឿងល្អ ពេលខ្លះក៏មានរឿងអាក្រក់ ហើយពេលខ្លះទៀតក៏ជួបនូវរឿងដែលនឹកស្មានមិនដល់ផងដែរ។ បើទោះជាយ៉ាងនេះក្តី គ្មានអ្វីដែលអស្ចារ្យជាងការស្រឡាញ់ខ្លួនឯងឲ្យបានច្រើននោះទេ ហើយយើងគួរ ប្រកាន់ខ្ជាប់នូវការថែរក្សាសុខភាព បង្កើនមិត្តភាព រៀនសូត្រពីអ្វីៗដែលនៅជុំវិញខ្លួន និងគួរឆ្លៀតពេលកម្សាន្តអារម្មណ៍ទទួលយកបទពិសោធន៍ថ្មីៗដើម្បីធ្វើឲ្យជីវិតរស់នៅកាន់តែមានន័យឡើងផងដែរ៕
Article by PAN SIVLY
