Sovrin
Sovrin
ក្នុងអំឡុងពេលពិភពលោកនិងប្រទេសកម្ពុជាជួបវិបត្តកូវីដ១៩ មានក្រុមហ៊ុននិងរោងចក្រមួយចំនួនបានបង្ខំចិត្តប្រកាសក្ស័យធន់។ រហូតមកដល់ឆ្នាំ ២០២៤ នេះពិភពលោកក៏បានទើបប្រទះនឹងវិបត្តិសេដ្ឋកិច្ចធ្លាក់ចុះទៀត ហើយមានរោងចក្រកាន់តែច្រើនបានបិទទ្វា ឬខ្លះបានផ្លាស់ប្តូរទីតាំងដើម្បីកាត់បន្ថយការចំណាយលើការជួលដីនិងការចំណាយផ្សេងៗទៀត ហើយក្នុងចំណោមនេាះក៏មានរោងចក្រផលិតស្បែកជើងដ៏ធំមួយកន្លែងនៅឯខណ្ឌទួលគោកផងដែរ។ យ៉ាងណាមិញក្រោមរូបភាពនៃសំណង់ រោងចក្រស្បែកជើងមួយកន្លែងនេះ មិនត្រូវបានគេវៃចោលដើម្បីធ្វើឬសាងសង់អាគារថ្មីនេាះទេ តែវាត្រូវបានគេកែច្នៃជាហាងកាហ្វេមួយដ៏គួរឲ្យទាក់ទាញក្រោមទម្រង់ហាងកាហ្វេបែបក្លាសិកនៃសំណង់រោងចក្រចាស់។
បើជិះពីខាងក្រៅគេនឹងពើបប្រទះភ្នែកនូវកន្លែងអង្គុយបែបបេាះតង់ជាមួយនឹងកៅអី Camping ជាច្រើន ដែលគេត្រៀបត្រាមើលទៅគួរឲ្យទាក់ទាញជាទីបំផុត ក៏ប៉ុន្តែប្រសិនបើគេក្រឡេកមើលទៅខាងក្នុងគេនឹងឃើញ កន្លែងអង្គុយជាច្រើនទៀតក្រោមដំបូលរោងចក្របង្កើតបានជាទិដ្ឋភាពមួយគួរឲ្យចង់ថតរូបនិងថតវីដេអូបំផុត។ ជាងនេះទៅទៀតបើគេដើរចូលទៅក្នុងកាន់តែជ្រៅគេនឹងទៅដល់ឃ្លាំងឡានចាស់ៗដែលគេទុកចោលនិងជាទីកន្លែងថតរូបយ៉ាងហំហួន។ ដោយចិត្តស្រលាញ់និងចង់រក្សារបស់ចាស់ៗទើបម្ចាស់ហាងកាហ្វេមួយនេះព្យាយាមរក្សាទុកនូវរូបភាពសំណង់នៅដដែលហើយបានបន្ថែមនូវរបស់ចាស់ៗជាច្រើនទៀតផង។
ភេសជ្ជៈនៅហាងកាហ្វេមួយនេះក៏ជាអ្វីដែលធ្វើឲ្យភ្ញៀវជាច្រើនចូលចិត្តផងដែរ តួរយ៉ាងដូចជា កាហ្វេអំបិលដែលមានក្លិនឈ្ងុយកាហ្វេជាប់មាត់និងជាតិប្រៃតិចៗជាប់អណ្ដាត។ យើងធ្លាប់តែបានឮនិងបានដឹងពីតែក្រូចឆ្មា ក៏ប៉ុន្តែហាងកាហ្វេមួយមានភេសជ្ជៈម្យ៉ាងដែលមានឈ្មេាះថា តែក្រូចថ្លុង។ ចំណែកឯភេសជ្ជៈប្រចាំហាងមួយទៀតក៏មានរសជាតិឆ្ងាញ់ម្យ៉ាងមិនផ្អែមពេក និង មិនជូរពេកនេាះគឺ ផាសិនទឹកឃ្មុំ។
សម្រាប់អ្នកដែលចូលចិត្តថតរូបនិងចូលចិត្តបែបក្លាសិក ក៏ដូចជាចង់ថតរូបជាមួយនឹងឡានចាស់ៗហាងកាហ្វេមួយនេះអាចជាជម្រើសមួយរបស់លោកអ្នកសម្រាប់ដើរលេងចុងសប្ដាហ៍ជាមួយនឹងមិត្តភក្ដិ។
ហាងកាហ្វេមួយនេះមានឈ្មេាះថា Old Station Café មានទីតាំងស្ថិតលើផ្លូវ 528 ខណ្ឌទួលគោកក្បែររង្វង់មូលកាំកូរ។ ហាងកាហ្វេនេះបើកទ្វារទទួលអតិថិជនចាប់ពីម៉ោង ៧ កន្លះព្រឹករហូតដល់ម៉ោង ១២ យប់៕
Article by SONGK
