Sovrin
Sovrin
គុកអំពិលទ្វារ ប្រាសាទបុរាណលាក់កំបាំងពីភ្នែកទេសចរ មិនឆ្ងាយប៉ុន្មានពីរមណីយដ្ឋានទឹកឆា
TRAVEL & LIVING 4 years ago
ប្រជាប្រិយភាពរបស់ប្រាសាទបុរាណសម័យអង្គរមួយកន្លែងស្ថិតក្នុងទឹកដីខេត្តកំពង់ចាមដែលមានអាយុកាលរាប់ពាន់ឆ្នាំមកហើយហាក់បីដូចជាស្ងប់ស្ងាត់មិនសូវមានអ្នកទេសចរស្គាល់ក្រៅពីអ្នក ស្រាវជ្រាវពីប្រាសាទបុរាណនិងបងប្អូនប្រជាពលរដ្ឋដែលរស់នៅក្នុងភូមិឃុំក្បែរៗនោះប៉ុណ្ណោះ។ ប្រាសាទដែលយើងកំពុងលើកឡើងនេះមានឈ្មោះថា ប្រាសាទគុកអំពិលទ្វារ បច្ចុប្បន្នមានទីតាំងស្ថិតក្នុង ភូមិសាស្រ្តភូមិកកោះ ឃុំសំពងជ័យ ស្រុកជើងព្រៃ ខេត្តកំពង់ចាម។ ទីនេះគួរតែជាគោលដៅទេសចរណ៍វប្បធម៌ថ្មីមួយទៀតរបស់លោកអ្នកដែលធ្វើដំណើរឆ្លងកាត់ស្រុកជើងព្រៃ ឬធ្វើដំណើរមកកាន់តំបន់រមណីយដ្ឋានទឹកឆាដ៏ល្បីល្បាញយូរយារណាស់មកហើយ។
បើយើងធ្វើដំណើរពីរាជធានីភ្នំពេញឆ្លងកាត់ផ្លូវជាតិលេខ៧ឆ្ពោះមកកាន់ទឹកដីខេត្តកំពង់ចាម មក ដល់ចំណុចផ្សារព្រៃទទឹងក្នុងចម្ងាយប្រមាណ៩៦គីឡូម៉ែត្រ យើងត្រូវបត់តាមផ្លូវខាងឆ្វេងជាប់ផ្សារ ដែល គេស្គាល់ថាជាផ្លូវបំបែកមកកាន់រមណីយដ្ឋានទឹកឆា។ យើងត្រូវបន្តដំណើរតាមផ្លូវនោះប្រហែលជាង១០ គីឡូម៉ែត្រទើបឃើញផ្សារតូចមួយឈ្មោះផ្សារអ្នកតាស្នឹង។ នៅពេលមកដល់ចំណុចផ្សារអ្នកតាស្នឹង ត្រូវ បន្តដំណើរទៅត្រង់ជាង៣គីឡូម៉ែត្រ មានផ្លូវបត់ឆ្វេងដៃប្រហែល១គីឡូម៉ែត្រ នោះលោកអ្នកនឹងឃើញ វត្តមួយស្ថិតនៅខាងស្តាំផ្លូវដែលមានស្លាកខ្លោងទ្វារ “វត្តប្រាសាទជ័យមង្គល” ។ ទីនោះហើយដែលជាទីតាំងប្រាសាទគុកអំពិលទ្វារ។
យោងតាមព័ត៌មានជាផ្លូវការរបស់ក្រសួងវប្បធម៌និងវិចិត្រសិល្បៈ ប្រាសាទគុកអំពិលទ្វារមានប៉មចំនួនបីដែលមានរាងបួនជ្រុងស្មើធ្វើពីឥដ្ឋសង់លើខឿនតែមួយបែរមុខទៅទិសខាងកើត រត់ជួរពីជើងទៅត្បូង។ តួប៉មប្រាសាទកណ្តាលធំជាងគេ មានទ្វារបញ្ឆោតធ្វើអំពីឥដ្ឋនៅតាមទិសបីផ្សេងទៀត គឺទិសខាង លិច ខាងជើង និង ខាងត្បូង ហើយមានខ្លោងទ្វារចូលត្រង់ទិសខាងកើតតែមួយប៉ុណ្ណោះ។ នៅជុំវិញប៉មប្រាសាទមានកំពែងថ្មបាយក្រៀមចំនួនពីរជាន់។ សព្វថ្ងៃនេះ ក្នុងចំណោមប៉មប្រាសាទទាំងបីដែលមានចារិកទុកក្នុងឯកសារតាំងពីសម័យបារាំងមកនោះគឺនៅសេសសល់តែប៉មមួយគត់តែប៉ុណ្ណោះ។
ម្យ៉ាងវិញទៀត ក្នុងពេលបច្ចុប្បន្ន យើងក៏មិនអាចឃើញរូបរាងប្រាសាទច្បាស់លាស់ពីចម្ងាយបានដូចពីអតីតកាលនោះដែរ ព្រោះគណៈកម្មការវត្តបានរៀបចំកសាងប្រក់ដំបូលនិងរបងព័ទ្ធជុំវិញថែមទាំងចាក់សាបរៀបជាខឿនមានរបងសត្វនាគតាមគន្លងពុទ្ធសាសនាព្រមទាំងមានសង់រូបសំណាកទេវតាតំណាង ឆ្នាំទាំង១២នៃចន្ទគតិព័ទ្ធជុំវិញតួប្រាសាទនោះ ប្រែក្លាយប្រាសាទដ៏ចំណាស់នេះជាទីគោរពសក្ការបូជាសម្រាប់ពុទ្ធសាសនិកជនក្មេងចាស់ប្រុសស្រីជិតឆ្ងាយដែលចូលមកធ្វើបុណ្យទាននៅទីនេះ។ ជាពិសេស ផ្តែរដ៏ស្រស់ស្អាតមួយផ្ទាំងរំលេចរូបព្រះឥន្ទ្រគង់លើដំរីជាជំនិះនៅស្ថិតស្ថេរគង់វង្សនៅឡើយស្ថិតលើទ្វារប្រាសាទទិសខាងកើតដែលជាចំណាប់អារម្មណ៍របស់បណ្តាអ្នកស្រាវជ្រាវទាំងឡាយ៕
Article by SRIN SOKMEAN
