Sovrin
Sovrin
ថ្ងៃនេះជាទិវាគុណម្តាយ ឬ ទិវាមាតាអន្តរជាតិដែលប្រទេសជាច្រើនទូទាំងពិភពលោកកំពុងប្រារព្ធធ្វើឡើងដើម្បីរំព្ញកអំពីឧបការគុណរបស់អ្នកម្តាយទាំងឡាយដែលបានផ្តល់កំណើតនិងចែករំលែកក្តីស្រឡាញ់មិនចេះរីងស្ងួតដល់បុត្រធីតាគ្រប់រូប។ ក្នុងឱកាសនេះ ប្រសិនបើលោកអ្នកមិនមានជាប់រវល់កិច្ចការអ្វីនោះទេ លោកអ្នកអាចចំណាយពេលនៅផ្ទះទស្សនាភាពយន្តបរទេសណាមួយខាងក្រោមនេះជាមួយក្រុមគ្រួសារជាទីស្រឡាញ់របស់អ្នកដែលយើងសូមធានាថាប្លែកភ្នែកចម្លែកអារម្មណ៍ខុសពីរឿងមុនៗដែលលោកអ្នកធ្លាប់បានដឹងកន្លងមក:
១. ភាពយន្តរឿងកូរ៉េចំណងជើង Mother (ផលិតឆ្នាំ២០០៩)
ផលិតករភាពយន្តកូរ៉េឈ្មោះ បុង ជូនហូ (Bong Joon Ho) បានបង្កើតសាច់រឿងបែបឧក្រិដ្ឋកម្មដ៏អង់អាចពុះពារដែលឆ្លុះបញ្ចាំងអំពីអ្នកម្តាយមួយរូបគឺ លោកស្រី គីម យ៉េចា (Kim Hye-ja) ដែលមាន បេសកកម្មតាមស្រាវជ្រាវបំបែកសំណុំរឿងឃាតកម្មក្មេងស្រីម្នាក់ដែលកូនប្រុសរបស់គាត់ឈ្មោះ វ៉ុន ប៊ីន (Won Bin) ត្រូវបានគេចាប់ខ្លួនដោយសារសង្ស័យាប់ពាក់ព័ន្ធនឹងរឿងនេះ។ ខ្សែភាពយន្តមួយនេះបង្កប់នូវ ឈុតឆាកច្រើនរសជាតិទាំងបែបស៊ីបអង្កេត កំប្លែង និងភ័យរន្ធត់ ដែលច្បាស់ជាមិនអាចថតចេញជាកុន បានទេប្រសិនបើរឿងនេះធ្លាក់ទៅដៃអ្នកដឹកនាំរឿងស្ទើរ។ នៅក្នុងអត្ថបទវិភាគកុននលើទំព័រកាសែត Time គេបានវាយតម្លៃសាច់រឿងនេះថា តួអង្គលោកស្រី គីម ដែលជាម្តាយ គឺជាកំពូលម្តាយក្នុងចំណោម ម្តាយដែលគួរឲ្យញាក់សាច់ហ៊ានលះបង់គ្រប់បែបយ៉ាងដើម្បីកូន។
២. ភាពយន្តរឿងអាមេរិកាំងចំណងជើង Mother (ផលិតឆ្នាំ១៩៩៦)
ភាពយន្តនេះជាស្នាដៃផលិតរបស់អ្នកដឹកនាំរឿងឈ្មោះ អាល់ប៊ើត ប្រ៊ូកស៍ (Albert Brooks) ដែលនិយាយអំពីអ្នកនិពន្ធឈ្មោះ ចន វ័យខ្ទង់៤០ឆ្នាំ ដែលបនលែងលះភរិយា ហើយបានផ្លាស់មករស់ នៅជាមួយម្តាយបង្កើតរបស់ខ្លួនគឺលោកស្រី ប៊ីតរ៉ាយ (Beatrice) ដែលសម្តែងជាតួអង្គកំពូលកាចឆ្នាស ដោយតារាសម្តែងជើងចាស់ ដេបប៊ី រ៉េយ៍ណូលស៍ (Debbie Reynolds) គឺថាសម្តែងជាជើងឯកម្តាយដែល បញ្ចេញស្នាមញឹមញឹមតែបង្កប់កំណួចមិនធម្មតាឡើយ។ សំណើចដែលផ្ទុះឡើងក្នុងផ្ទៃរឿងទាំងមូលគឺ កើតឡើងមកពីការដុតគ្នាទៅវិញទៅមកដោយប្រើពាក្យសម្តីឌឺដងផ្លែផ្កានិងការរអ៊ូរទាំមិនចេះចប់ឡើងសាំរបស់អ្នកម្តាយ។
៣. ភាពយន្តរឿងម៉ាឡេស៊ីចំណងជើង MaMa (ផលិតឆ្នាំ២០១៣)
ភាពយន្តនេះជារឿងនិទានតំណាលដ៍គួរឲ្យភ័យរន្ធត់របស់អ្នកនិពន្ធ អ៊ែនឌី មូសឈីតទី (Andy Muschietti) ស្តីពីប្តីប្រពន្ធពីរនាក់ឈ្មោះ លូខាស (Lucas) និង អ៊ែនណាប៊េល (Annabel) ដែលបានយក ក្មួយស្រីរបស់លូខាសមកចិញ្ចឹមក្រោយពេលដែលរកឃើញពួកគេរស់នៅដូចជាសត្វក្នុងផ្ទះឈើចាស់ បែកបាក់មួយខ្នងនៅក្នុងព្រៃ។ ក្មេងស្រីទាំងនោះត្រូវបានចិញ្ចឹមបីបាច់ថែរក្សាអស់ពេលជាច្រើនឆ្នាំ ប៉ុន្តែពួកគេទាំងអស់គ្នាតែងតែត្រូវបានតាមយាយីធ្វើបាបដោយវិញ្ញាណចម្លែកដែលគេហៅថា Mama ។ ព្រលឹង Mama នឹងមិនទៅណាឆ្ងាយទៅពួកគេឡើយ ព្រោះនាងមិនទាន់ដាច់ចិត្តប្រគល់ភារកិច្ចមើល ថែទាំក្មេងស្រីទាំងនេះទៅអ្នកផ្សេងឡើយ។ លោក ហ្គីលឡឺម៉ូ ឌែល តូរ៉ូ (Guillermo Del Toro) ត្រូវទទួលបន្ទុកលើការផលិតរឿងដែលយកលំនាំតាមឆ្អឹងរឿងខ្លី Mamá ដើមរបស់លោក មូសឈីតទី។
៤.ភាពយន្តរឿងអេស្ប៉ាញ-បារាំងចំណងជើង Madre (ផលិតឆ្នាំ២០២០)
ភាពយន្តនេះជារឿងខ្នាតខ្លីប៉ុន្តែបានជំរុញឲ្យស្នាដៃរបស់អ្នកដឹករឿង រ៉ូឌ្រីងហ្គូ សូរ៉ូហ្គូយ៉េន (Rodrigo Sorogoyen) ជាប់ជាភាពយន្តជម្រើសពានរង្វាន់អូស្ការ។ រឿងនេះជាប្រភេទរឿងសោនាដកម្មផ្លូវចិត្តឆ្លុះបញ្ចាំងអំពីអ្នកម្តាយមួយរូបឈ្មោះ Madrid ដែលបានទទួលទូរសព្ទកូនប្រុសអាយុ៦ឆ្នាំរបស់នាង ដែលខលមកប្រាប់នាងថាឪពុករបស់គេបានទុកគេចោលតែម្នាក់ឯងនៅលើឆ្នេរសមុទ្រក្នុងប្រទេសបារាំង។ ក្រោយពេល១០ឆ្នាំដែលកូនប្រុសនាងបានបាត់ខ្លួនទៅ នាងក៏បានផ្លាស់មករស់នៅជិតឆ្នេរដែលកូន ប្រុសនាងបានបាត់ខ្លួននោះ។ នាងបានជួបក្មេងប្រុសកំលោះម្នាក់នៅកន្លែងដែលនាងធ្វើការហើយ មាន ទំនាក់ទំនងជាមួយគ្នារហូតបង្កើតបានជារឿងរ៉ាវប៉ះទង្គិចផ្លូវចិត្តនឹកស្មានមិនដល់។
Article by SRIN SOKMEAN
