Sovrin
Sovrin
មានដឹងអត់អាហារណាខ្លះញុំាហើយធ្វើឲ្យសក់ដុះលឿន និងមានសុខភាពល្អ?
TRAVEL & LIVING 2 years ago
និយាយទៅសក់ដូចទៅនឹងស្បែករបស់យើងដែរ រាល់ពេលមានសញ្ញាអ្វីលេចឡើង វាបង្ហាញពីសុខភាពផ្នែកខាងក្នុងនៃរាងកាយរបស់យើង។ ជាទូទៅ កោសិកាដែលបង្កើតសរសៃសក់តម្រូវមានការផ្គត់ផ្គង់ពីសារធាតុចិញ្ចឹមឲ្យបានត្រឹមត្រូវ និងទៀងទាត់ ហើយសារធាតុទាំងនោះរួមមាន ប្រូតេអ៊ីន វីតាមីន និង ជាតិខនិជ ដែលនឹងធ្វើឲ្យសក់ភ្លឺ ទន់រលោង ដុះលឿន និងមានសុខភាពល្អ។ ដូច្នេះ អាហារដែលផ្ទុកនូវសារធាតុពីធម្មជាតិទាំងនេះមានដូចជា៖
១. ប្រូតេអ៊ីន (Protein)
សក់ត្រូវបានបង្កើតឡើងដោយប្រូតេអ៊ីន។ ដូច្នេះ អ្នកត្រូវប្រាកដថាអ្នកទទួលយកប្រូតេអីុនគ្រប់គ្រាន់តាមរយៈរបបអាហារប្រចាំថ្ងៃ ព្រោះប្រូតេអីុននេះនឹងជួយឲ្យសក់រឹងមាំ និងមានសុខភាពល្អ។ ករណីទទួលយកប្រូតេអីុនមិនគ្រប់គ្រាន់ សក់របស់អ្នកនឹងចាប់ផ្តើមស្ងួត ផុយ និងខ្សោយ។ ជាពិសេស វាជាលទ្ធផលធ្វើឲ្យសក់ដុះយឺត និងជ្រុះសក់ផងដែរ។ អាហារសម្បូរទៅដោយប្រូតេអីុនមានដូចជា សាច់មាន់ ត្រី ស៊ុត ទឹកដោះគោ ឬ ផលិតផលធ្វើពីទឹកដោះគោ ព្រមទាំងប្រភពគ្រាប់ធញ្ញជាតិដូចជា ពពួកគ្រាប់សណ្តែក និងគ្រាប់ផ្លែឈើ ជាដើម។
២. ជាតិដែក (Iron)
ជាតិដែកគឺជាខនិជដ៏សំខាន់ចំពោះសក់ អ្នកដែលកង្វះជាតិដែករមែងជួបបញ្ហាជ្រុះសក់នេះឯង។ ប្ញសសក់ត្រូវបានចិញ្ចឹមដោយសារធាតុចិញ្ចឹមពីឈាម។ ជាក់ស្តែង នៅពេលជាតិដែកធ្លាក់ចុះក្រោមកម្រិតមួយ វានឹងធ្វើឲ្យយើងស្លេកស្លាំង។ ការបង្អាក់សារធាតុចិញ្ចឹមទៅផ្គត់ផ្គង់ឫសសក់បែបនេះជាហេតុធ្វើឲ្យប៉ះពាល់ដល់ការលូតលាស់សក់ និងអាចជាលទ្ធផលធ្វើឲ្យសក់ជ្រុះ។ យើងអាចបង្គ្រប់ជាតិដែកក្នុងខ្លួនមកវិញតាមរយៈការបរិភោគអាហារពពួកសាច់ក្រហម សាច់មាន់ ត្រី។ សូម្បីបន្លែ ដូចជា ស្ពៃអេពីណា (Spinach) សណ្តែក ខាត់ណាខៀវ ស្ពៃក្រញាញ់ និងសាលាដបៃតងសុទ្ធសឹងសម្បូរទៅដោយជាតិដែកផងដែរ។
៣. វីតាមីនស៊ី (Vitamin C)
វីតាមីនស៊ីជាជំនួយការដ៏សំខាន់ដែលស្រូបយកជាតិដែក ដូច្នេះអាហារដែលផ្ទុកទៅដោយវីតាមីនស៊ីខ្ពស់គឺល្អបំផុតក្នុងការបរិភោគជាមួយនឹងអាហារដែលមានផ្ទុកជាតិដែក។ វីតាមីនស៊ីក៏ជាសារធាតុប្រឆាំងអុកស៊ីតកាំដែលត្រូវបានរាងកាយប្រើប្រាស់ជាប្រចាំ វាក៏មានតួនាទីជំរុញដល់ការផលិតខូឡេជិនដែលជួយពង្រឹងសរសៃឈាមក្នុងការចិញ្ចឹមសរសៃសក់។ អាហារដែលផ្ទុកវីតាមីនស៊ីខ្ពស់មានដូចជា ប្ល៊ូប៊ឺរី ខាត់ណាខៀវ ត្របែក គីវី ក្រូច ល្ហុង ស្ត្រប៊ឺរី និងដំឡូងជ្វា។
៤. អូមេហ្គា៣ (Omega-3)
ជាការពិត អូមេហ្គា៣ គឺជាជាតិខ្លាញ់ដ៏សំខាន់មួយដែលរាងកាយរបស់យើងមិនអាចផលិតបានតែយ៉ាងណាមិញយើងអាចទទួលយកវាបានតាមរយៈរបបអាហារ។ ជាតិអូមេហ្គា៣ មានអត្ថប្រយោជន៍ជួយឲ្យស្បែកក្បាលមានសុខភាពល្អ។ វាជួយផ្តល់និងរក្សាជាតិប្រេងទាំងនៅលើស្បែកក្បាល និងសក់។ អាហារផ្ទុកដោយខ្លាញ់អូមេហ្គា៣ រួមមាន ត្រីសាម៉ុន ត្រីហឺររីង (Herring) ត្រីសាឌីន ត្រីសាបាក់ ត្រីព្រួលទឹកសាប (trout) រួមជាមួយផ្លែឈើដូចជា ផ្លែប៊័រ គ្រាប់ល្ពៅ និងគ្រាប់វ៉ុលណាត់។
៥. វីតាមីនអា (Vitamin A)
រាងកាយត្រូវការវីតាមីនអាដើម្បីផលិតសេបាំ (Sebum)។ សេបាំ ជាសារធាតុប្រេងឬខ្លាញ់បង្កើតឡើងដោយក្រពេញប្រេងសក់ដែលវានឹងជួយបន្ទន់ធ្វើឲ្យស្បែកក្បាលមានសុខភាពល្អ។ ការគ្មានប្រេងសេបាំអាចបង្កឲ្យស្បែកក្បាលរមាស់ និងសក់ស្ងួត។ អាហារសម្រាប់ជំរុញដល់ការផលិតផលប្រេងសេបាំភាគច្រើនជាបន្លែផ្លែឈើពពួកមានពណ៌ទឹកក្រូចនិងពណ៌លឿង ដូចជា ការ៉ុត ល្ពៅ និងដំឡូងជ្វា ជាដើម ដែលវាផ្ទុកខ្ពស់ទៅដោយសារធាតុបេតាការ៉ូទីន (beta-carotene) សម្រាប់ផលិតវីតាមីនអា។
៦. សង្ក័សី (zinc) និងសេលេញ៉ូម (Selenium)
សារធាតុខនិជដ៏សំខាន់ដែលមានតួនាទីការពារស្បែកក្បាលគឺ ស័ង្កសី និងសេលេញ៉ូម។ ការកង្វះស័ង្កសីអាចប្រឈមបញ្ហាជ្រុះសក់ សក់ស្ងួត និងឡើងអង្គែ។ គ្រាប់ធញ្ញជាតិ និងគ្រាប់ផ្លែឈើ ជាប្រភពសម្បូរទៅដោយជាតិស័ង្កសី ហើយបើសាច់វិញមានដូចជា អយស្ទ័រ សាច់គោ និងស៊ុត ជាដើម។
៧. វីតាមីនអឺ (Vitamin E)
ព្រះអាទិត្យអាចបំផ្លាញសក់របស់យើងដូចដែលវាបំផ្លាញស្បែករបស់យើងដែរ។ ដូច្នេះ អ្នកត្រូវប្រាកដថាទទួលទានអាហារដែលមានវីតាមីនអឺខ្ពស់ដើម្បីការពារសក់របស់អ្នក។ គ្រាប់ផ្លែឈើជាប្រភពអាហារបំប៉នមួយទៀតដែលផ្តល់នូវជាតិស័ង្កសី សេលេញ៉ូម ក៏ដូចជាវីតាមីនអឺផងដែរ។ ដូចនេះ បើអាចគួរបញ្ចូលពួកវាទៅក្នុងរបបអាហារប្រចាំថ្ងៃរបស់អ្នក។
៨. បាយអូទិន (Biotin)
បាយអូទីនជាផ្នែកមួយនៃក្រុម B (វីតាមីន B7)។ រាងកាយទាំងមូលត្រូវការបាយអូទិន ដើម្បីជួយបំប្លែងសារធាតុចិញ្ចឹមមួយចំនួនទៅជាថាមពល។ វាក៏ដើរតួយ៉ាងសំខាន់ក្នុងការទ្រទ្រង់សុខភាពសក់, ស្បែក និងក្រចក។ ការមានបាយអូទីនតិចអាចបង្កឲ្យសក់ស្រួយ ផុយ បែកចុង និងជ្រុះ។ អ្នកអាចទទួលយកបាយអូទិនតាមរយៈអាហារដូចជា គ្រាប់ផ្លែឈើ ថ្លើមសត្វ ស៊ុតលឿង ម្សៅសណ្តែកសៀង និងម្សៅដំបែ៕
Article by SOUNG SOKSAN
