Sovrin
Sovrin
ប្រាសាទព្រះធាតុបារាយណ៍ ជាប្រាសាទបុរាណមួយមានអាយុកាលជាយូរលង់ណាស់មកហើយ ដែលជាអតីតរាជធានីទួលបាសាន កសាងឡើងនៅសតវត្សទី១១ និងត្រូវបានសាងសង់ឡើងពីថ្មបាយក្រៀម និងថ្មភក់ជាគ្រឿងសំណង់ប្រាសាទ ស្ថិតក្នុងរចនាបថបាភួន។ ប្រាសាទនេះ មានច្រកទ្វារចំនួន២ គឺទ្វារនៅទិសខាងកើត និងខាងលិច ចំណែកឯទិសខាងត្បូង និងខាងជើងជាទ្វារបញ្ឆោត។
ស្ថិតក្នុងភូមិស្យាអំពិល ឃុំបារាយណ៍ ស្រុកស្រីសន្ធរ ខេត្តកំពង់ចាម ប្រាសាទព្រះធាតុបារាយណ៍សាងសង់នៅលើទីទួល ដីលើកជារាងចតុកោណកែង មាន២ជាន់ថ្នាក់ កំពុងបង្ហាញខ្លួនបង្អួតសម្រស់នៅកណ្តាលវាលស្រែដ៏ធំល្វឹងល្វើយ។ នៅប៉ែកខាងកើតនៃប្រាសាទនេះ មានបារាយណ៍ធំមួយ មានប្រវែងទទឹង៤៥០ម៉ែត្រ បណ្តោយ៧៥០ម៉ែត្រ ដែលអ្នកស្រុកនៅទីនោះហៅថា «ស្រែបឹង»។ ប្រាសាទនេះស្ថិតនៅតំបន់ភាគខាងត្បូង និងខាងកើត នៃទន្លេមេគង្គ និងទន្លេតូច។ ប្រជាជនដែលរស់នៅក្នុងតំបន់ប្រាសាទ ភាគច្រើនប្រកបមុខរបរចិញ្ចឹមជីវិត ដោយការធ្វើកសិកម្មទាំងរដូវវស្សា ទាំងរដូវប្រាំង និងមុខរបរសំខាន់មួយទៀតគឺការនេសាទ។
កន្លងផុតទៅអស់រយៈពេលជាច្រើនឆ្នាំ ផ្នែកខ្លះនៃប្រាសាទត្រូវបានទទួលរងការបាក់បែកមួយចំនួនធំ បន្សល់ទុកនៅតែទ្វារ ហោជាង ផ្តែរ និងចម្លាក់នៅតាមចែងប្រាសាទដែលនៅរក្សារូបរាងយ៉ាងល្អវិចិត្រ។ ចំពោះចម្លាក់ដែលនៅលើផ្តែរត្រូវបានឆ្លាក់និយាយពីរឿងទេវកថា តួយ៉ាង ផ្តែរកូរសមុទ្រទឹកដោះ ផ្តែររឿងរាមកេរ្តិ៍ ត្រង់ឈុតសុគ្រីពប្រយុទ្ធជាមួយពាលី ផ្តែរព្រះឥសូររាំ ផ្តែរព្រះវិស្ណុផ្ទុំលើនាគ និងផ្តែរមួយចំនួនទៀត។ ក្រៅពីនេះ ក៏មានហោជាងមានចម្លាក់ព្រះភារុណជិះលើហង្ស និងចម្លាក់រូបនាគនៅតាមចែងប្រាសាទ៕
Article by SOUNG SOKSAN
