Sovrin
Sovrin
ផ្សិតគឺជារុក្ខជាតិមួយប្រភេទដែលគេនិយមយកមកចម្អិនម្ហូបអាហារសម្រាប់ទទួលទាន។ ក្រៅពីមានរសជាតិឆ្ងាញ់ ងាយស្រួលរក ផ្សិតក៏ជាប្រភេទបន្លែដែលមានសារជាតិចិញ្ចឹមច្រើនមិនចាញ់បន្លែផ្សេងទៀតប៉ុន្មានឡើយ។ តួយ៉ាង ផ្សិតសម្បូរទៅដោយប្រូតេអ៊ីន កាបូអ៊ីដ្រាត ជាពិសេសផ្ទុកដោយសារធាតុប្រឆាំងអុកស៊ីតកម្ម បេតាគ្លុយកង់(Beta-glucan) អ៊ីអ៊ែរហ្គោធីវីន អាស៊ីតខ្លាញ់ និងមេឡានីន ដែលជាសារធាតុជីវសាស្រ្តដែលមានប្រយោជន៍ក្នុងការទ្រទ្រង់សុខភាពស្បែក។ ខាងក្រោមនេះជាអត្ថប្រយោជន៍ទាំង៥ចំពោះស្បែកនៅពេលអ្នកទទួលទានផ្សិត។
1. ជួយទប់ស្កាត់ការកើតមុន៖ Beta-glucan គឺជាប្រភេទនៃជាតិសរសៃរលាយដែលមាននៅក្នុងផ្សិត។ ជាតិសរសៃជួយពង្រឹងប្រព័ន្ធភាពស៊ាំដោយការលើកកម្ពស់ការផលិត Macrophage ។ សមាសធាតុទាំងនេះប្រឆាំងនឹងបាក់តេរីដែលបង្កគ្រោះថ្នាក់ និងការឆ្លងមេរោគលើស្បែក ហើយក៏បង្កើនល្បឿនដំណើរការព្យាបាលមុខរបួសដោយការធ្វើឱ្យស៊ីតូគីន និងកោសិកាភាពស៊ាំក្នុងរាងកាយសកម្ម។ ទាំងនេះក៏អាចរួមចំណែកដល់ការកកើតមុន និងជួយកាត់បន្ថយស្នាមមុន។
2. ពង្រឹងការការពារកាំរស្មីយូវី៖ Ergothioneine គឺជាអាស៊ីតអាមីណូដ៏មានឥទ្ធិពលដែលមានលក្ខណៈសម្បត្តិប្រឆាំងអុកស៊ីតកម្ម។ វាជួយកាត់បន្ថយភាពតានតឹងអុកស៊ីតកម្ម និងធ្វើឱ្យកោសិកាស្បែកដែលមានសុខភាពល្អអាចនៅបានរយៈពេលយូរ។ វាក៏អាចជួយព្រឹងការការពារ ការប្រឆាំងពីការបំពុលបរិស្ថាន និងជួសជុល DNA រួមទាំងកោសិកាដែលខូចដោយសារពន្លឺព្រះអាទិត្យផងដែរ។
3. ជួយរក្សាជាតិទឹកដល់ស្បែក៖ ភាគច្រើនផ្សិតមួយចំនួនដែលអាចបរិភោគបានគឺសម្បូរទៅដោយអាស៊ីតខ្លាញ់ Polyunsaturated ដូចជា omega-3s។ ទាំងនេះមានសារៈសំខាន់ណាស់ក្នុងការកែលម្អមុខងាររបាំងស្បែក។ ខ្លាញ់ទាំងនេះមានផ្ទុកសារធាតុ Polysaccharides ដែលអាចផ្ទុកបានរហូតដល់ទៅ ៥០០ ដងនៃទម្ងន់របស់ពួកវាពេលនៅក្នុងទឹក។ ហេតុដូច្នេះហើយ ទើបវាអាចជួយឱ្យកោសិកាស្បែកអាចទប់ជាតិសំណើមនៅខាងក្នុងបានល្អ និងធ្វើឱ្យស្បែកទន់។
4. ជួយប្រឆាំងភាពចាស់៖ អត្ថប្រយោជន៍មួយក្នុងចំណោមអត្ថប្រយោជន៍ផ្សេងទៀតគឺការជួយប្រឆាំងភាពចាស់។ ផ្សិតសម្បូរទៅដោយសារធាតុប្រឆាំងអុកស៊ីតកម្ម សមាសធាតុទាំងនេះប្រឆាំងនឹងភាពតានតឹងអុកស៊ីតកម្មនៅក្នុងរាងកាយដែលនាំមកនូវភាពប្រសើរឡើងគួរឱ្យកត់សម្គាល់ចំពោះកោសិកា។ លក្ខណៈកោសិកាដែលប្រសើរឡើងក៏ជួយបន្ថយដំណើរការនៃភាពចាស់តាមធម្មជាតិរបស់ស្បែកបានយ៉ាងមានប្រសិទ្ធភាពផងដែរ។
5. ជំនួយស្បែកភ្លឺថ្លា៖ ផ្សិតមានផ្ទុកសារធាតុមេឡានីន(Melanin) ជាសារធាតុដែលជួយការការពារដល់ស្បែក។ មេឡានីននៃផ្សិតដើរតួជាសារធាតុប្រឆាំងអុកស៊ីតកម្មដែលជួយស្រូបយកកាំរស្មី UV ដូច្នេះការពារកោសិកាស្បែកពីការបំផ្លាញដោយពន្លឺព្រះអាទិត្យ។ ដូចគ្នានេះផងដែរអាស៊ីត kojic ដែលជាសមាសធាតុធម្មជាតិមាននៅក្នុងផ្សិតរារាំងការសំយោគមេឡានីនច្រើន។ នាំឱ្យស្បែកភ្លឺ និងកែតម្រូវចំណុចខ្មៅ ជាពិសេសជួយធ្វើឱ្យស្បែកមានពណ៌ស្មើគ្នា។
ផ្សិតដែលមានគុណសម្បត្តិទាំងនេះ ភាគច្រើនគេរកឃើញមាននៅក្នុងផ្សិតដែលអាចទទួលទានបានមានដូចជា ផ្សិតស៊ីតាគិ(Shiitake), ផ្សិត Reishi, ផ្សិត Chaga, ផ្សិត Tremella ឬយើងតែងហៅថាផ្សិតផ្កាថ្ម រួមទាំងផ្សិតដែលអាចបរិភោគបានមួយចំនួនទៀត។
ជាការពិត ផ្សិតផ្តល់អត្ថប្រយោជន៍ច្រើនដល់ស្បែកតាមរយៈការបញ្ចូលវាទៅក្នុងរបបអាហារប្រចាំថ្ងៃ។ តែយ៉ាងណា ថ្វីបើវាមានគុណសម្បត្តិច្រើន តែគួរគប្បីបរិភោគផ្សិតក្នុងបរិមាណមួយសមស្រប និងត្រូវប្រាកដថាលាងសម្អាតបានស្អាតមុនយកទៅចម្អិនម្ហូបដើម្បីទទួលទាន៕
Article by SOUNG SOKSAN
